Acts6
1ऊ घड़ी, बड़ी मनी लोग चेला बन रहलन हल। यूनानी भाषा बोले वाला यहूदी, इब्रानी भाषा बोले वाला यहूदी विश्वासी के बारे में शिकायत करे लगलन काहेकि उनकर सेवा के बीच में विधवा लोग के हरेक दिन सही मात्रा में खाना नऽ मिल रहल हल।2जब बारहो प्रेरितवन उनकर बात सुनलन, तऽ ऊ यरूशलेम में रहे वाला बाकि सभे चेलवन के जमा करलन। तऽ प्रेरित ओखनी से कहलन, “जदि हम प्रचार करे ला आउर परमेश्वर के वचन सिखावे ला छोड़ के लोगवन के खाना बाँटे ला सेवा बंद कर दे ही, तऽ ई बढ़ियाँ नऽ होत!3येहिसे हे भईवन, अपने में से सातगो सुनामी आदमियन के चुन लऽ, जिनकर बारे में तूँ जानऽ हऽ कि परमेश्वर के पवित्र आत्मा उनका मार्ग देखावऽ हथन आउर जौन बड़ी बुद्धिमान हथन। तऽ हम उनका ई काम करे के आज्ञा देम।4हमनी अपन समय प्रार्थना करे में, प्रचार करे में आउर यीशु के बारे में सन्देश सिखावे के सेवा में लगल रहम।”5प्रेरितवन के सलाह से बाकि सभे विश्वासी खुश होलन। येहिसे ऊ स्तिफनुस के चुनलन, जे परमेश्वर पर मजबूत विश्वास रखऽ हलन आउर जेकरा पवित्र आत्मा पूरा तरह से काबू में कईले हल। ओखनी फिलिप्पुस, प्रुखुरुस, नीकानोर, तीमोन, परमिनास आउर अन्ताकिया के नीकुलाउस के भी चुनलन। जे पहिले गैर-यहूदी हल आउर अब यहूदी धरम अपना चुकल हल। 6तब समूह लोग ई सातो आदमी के प्रेरित भीर ले अईलन। आउर प्रेरितवन ओखनी लागी प्रार्थना करलन, आउर ओखनी में से हरेक माथा पर हाथ रख के उनका ऊ काम करे लागी आज्ञा देलन। 7येहिसे ऊ बड़ी मनी लोग के परमेश्वर के संदेश सुनईते रहलन। यरूशलेम में यीशु पर विश्वास करे वालन चेलवन के गिनती बढ़ते गेल। ओखनी में से बड़ी मनी यहूदी याजक भी हलन जौन ई सन्देश के पालन कर रहलन कि उनका यीशु पर कईसे भरोसा करे के चाही।8परमेश्वर स्तिफनुस के लोगवन के बीच केतना चिन्ह आउर अचरज काम करे के अनुग्रह आउर सामर्थ देलन हल, जेकरा से पता चलऽ हल कि यीशु के बारे में सन्देश सच हल।9बाकि कुछ लोग स्तिफनुस के विरोध कर रहलन हल, ओखनी यहूदी हलन जौन रोजदिन के जईसन एगो आराधनालय में जमा होवऽ हलन जेकरा दासत्व-मुक्त आराधनालय कहल जा हल, आउर कुरेने आउर सिकन्दरिया के शहरवन आउर किलिकिया आउर आसिया के प्रान्त से भी लोग हलन। ओखनी सभे स्तिफनुस से बहस करे लगलन। 10बाकि ओखनी ई साबित नऽ कर पईलन कि ऊ जौन कहलन ऊ गलत हल, काहेकि परमेश्वर के पवित्र आत्मा उनका बड़ी बुद्धिमानी से बोले ला सक्षम बनईलन।11येहिसे ऊ चुपके से कुछ घूँस दे के लोगवन के स्तिफनुस पर झूठा आरोप लगावे लागी राजी करलन आउर कहलन, “हमनी एकरा मूसा आउर परमेश्वर के बारे में निन्दा के बात बोलते सुनली हे।”12तऽ ऊ स्तिफनुस पर सभे यहूदियन के, मतलब पुरनियन आउर यहूदी शास्त्रियन के गोस्सा देलईलन, आउर सभे उनका पकड़ के यहूदी महासभा में ले गेलन।13ऊ कुछ लोग के बोलईलन आउर पईसा दे के झूठा गवाही देवे ला कहलन, “ई आदमी ई पवित्र मन्दिर आउर मूसा के परमेश्वर से मिलल व्यवस्था के बारे में बुरा बात कहते रहऽ हे।14एकर मतलब ई हे कि हम इनका ई कहते सुनली हे कि यीशु नासरी ई शहर के मन्दिर के नाश कर देतन आउर हमनी के ऊ रीति-रिवाज के माने लागी कहतन जौन मूसा हमनी के पुरखावन के सिखईलन हल।”15आउर महासभा में बईठल सभे लोग स्तिफनुस के देखलन आउर देखलन कि उनकर चेहरा स्वर्गदूत के चेहरा जईसन हल।
Bridge Connectivity Solutions Pvt. Ltd.