Acts5
1विश्वासियन में से हनन्याह नाम के एगो आदमी हल, आउर ओकर मेहरारू के नाम सफीरा हल। ऊ भी कुछ जमीन बेचलन हल।2बाकि ऊ जमीन के बदले जौन पईसा उनका मिलल हल, ओकरा में से कुछ अपना भीर रख लेलन आउर ई बात उनकर मेहरारू के पता चल गेल कि ऊ अईसन करलन हे। आउर बाकि पईसा लाके प्रेरितवन के दे देलन।3तब पतरस कहलन, "हनन्याह, तूँ शैतान के अपना मन के ऊपर पूरा तरह से हावी होवे ला देलऽ हे ताकि तूँ पवित्र आत्मा के धोखा देवे के कोशिश करऽ। तोरा अईसन गन्दा काम नऽ करे के चाहऽ हल। तोरा जमीन बेचे से जौन पईसा मिलल हल, ओकरा में से कुछ अपना भीर रख लेलऽ हे। आउर तूँ हमरा सभे पईसा नऽ देलऽ।4ऊ जमीन के बेचे से पहिले, तूँ ओकर असली मालिक हलऽ, आउर ओकरा बेचला के बाद भी ऊ पईसा तोरे अधिकार में हल। येहिसे तोरा कहियो भी हृदय से अईसन गलत काम करे के जरुरत नऽ हल। तूँ खाली हमरा धोखा देवे के कोशिश नऽ कर रहलऽ हे! नऽ, तूँ तऽ खुद परमेश्वर के धोखा देवे के कोशिश करलऽ हे!"5जब हनन्याह ई बात सुनलक, तऽ ऊ तुरन्त गिर गेल आउर जेतना लोग ओकर मौत के बारे में सुनलन, ओखनी सभे बड़ी जादे डेरा गेलन।6कुछ जवान आदमी आगे अईलन, आउर ओकर लाश के कपड़ा में लपेटलन, आउर बाहरसी ले जा के दफना दे देलन।7लमसम तीन घंटा के बाद ओकर मेहरारू ऊ घर आयेल जहाँ पतरस हलन, बाकि ओकरा पता नऽ हल कि कौची होल हल।8तब पतरस ओकरा ऊ पईसा देखईलन जौन हनन्याह लईलक हल, फिन सफीरा से पूछलन, “हमरा बतावऽ, का ई ओही पईसा हे जौन तोहनी दूनो के ऊ जमीन के बदले मिलल हल जौन तूँ बेचलऽ हल?” ऊ कहलक, “हाँ, हमरा एतनहीं मिलल हल।”9तऽ पतरस ओकरा से कहलन, “तोहनी दूनो बड़ी गलत काम करलऽ हे! तोहनी दूनो प्रभु के आत्मा के धोखा देवे के कोशिश करे ला समझौता करलऽ हे! सुनऽ! तूँ ऊ लोग के गोड़ के आहट सुन सकलऽ हे जौन तोर पति के दफनईलन हे। ओखनी ई दुआरी के ठीक बाहरसी हथन, आउर ओखनी तोरा भी बाहरसी ले जईतन!”10आउर सफीरा तुरन्त पतरस के गोड़ पर गिर के मर गेल। तब ऊ जवान लोग अन्दर अईलन, आउर देखलन कि ओहू मर गेल हे, तऽ ओकर लाश के बाहरसी ले जा के ओकर मरद भीर ले जा के गाड़ देलन।11यरूशलेम में रहे वालन सभे कलीसिया के विश्वासियन ई बात से बड़ी डर गेलन कि परमेश्वर हनन्याह आउर सफीरा के साथे कौची करलन हल। आउर जेतना लोग ई बात के सुनलन, तऽ ऊ लोग भी बड़ी डेरा गेलन।12परमेश्वर प्रेरितवन के केतना चिन्ह अनोखा के लायक बना रहलन हल, जेकरा से लोगवन के बीच में उनकर उपदेश के सच्चाई पता चलऽ हल। सभे विश्वासी रोजदिन मन्दिर के अँगना में सुलैमान के ओसारा में जमा होवऽ हलन।13बाकि सभे लोग जे यीशु पर विश्वास नऽ करऽ हलन, आउर विश्वासियन के साथे रहे से डरऽ हलन। तईयो, ऊ लोग विश्वासियन के बड़ी आदर करते रहऽ हलन।14आउर भी ढेरमनी औरत आउर मरद प्रभु यीशु पर विश्वास करे लगलन आउर ओखनी विश्वासियन के झुण्ड में शामिल होते गेलन।15येहिसे लोग बेमार लोग के सड़क पर लाके खटिया पर सुतावे लगलन जेकरा से जब पतरस अईतन तऽ कम से कम उनकर परछाहीं ओखनी में से कुछ पर पड़ जाय आउर ओखनी चंगा हो जाय।16यरूशलेम के अगल-बगल के नगर से बड़का भीड़ प्रेरितवन भीर आवऽ हल, जे बेमार आउर अशुद्ध आत्मावन के सतावल लोग के लावऽ हलन, आउर परमेश्वर ओखनी सभे के चंगा करलन।17तब महायाजक आउर उनकर साथे के सभे लोग जौन सदूकी हलन, प्रेरितवन से बड़ी जलन करे लगलन।18येहिसे ऊ मन्दिर के पहरदारवन के हुकूम देलन कि ऊ प्रेरितवन के पकड़ के सार्वजनिक जेल में डाल देलन।19बाकि रात के घड़ी प्रभु परमेश्वर के दने से एगो स्वर्गदूत जेल के दुआरी खोललन आउर प्रेरितवन के बाहरसी बोलईलन तब स्वर्गदूत कहलन।20प्रेरितवन से कहलन, “मन्दिर के अँगना में जा, ऊहाँ खड़ा होके लोगवन के अनन्त जिनगी ला ई सुसमाचार सुनावऽ।”21ई सुन के पतरस आउर यूहन्ना भोरिये होतहीं मन्दिर में अईलन आउर लोगवन के फिन से यीशु के बारे सिखावे लगलन। येही बीच में महायाजक आउर उनकर साथियन यहूदी महासभा के दोसर सदस्यवन के बोलईलन, ओखनी सभे इस्राएल के अगुवा हलन। जखनी ऊ जमा होलन, तऽ ओखनी जेल में पहरदारवन के भेज के प्रेरितवन के भीतरे आवेला कहलन।22बाकि जब सेवक जेल में पहुँच के देखलन कि प्रेरित ऊहाँ नऽ हथन, तऽ ओखनी लौटके महासभा में जा के कहे लगलन,23“हम देखली कि जेल के दुआरी बड़ी बरियार से बंद हल आउर दुआरी पर पहरदार खड़ा हल। बाकि जब हम दुआरी खोल के ऊ आदमियन के पकड़े लागी भीतरे गेली, तऽ ओखनी में से कोई भी जेल के भीतरे नऽ हल।”24जब मन्दिर के पहरदारवन के अधिकारी आउर प्रधान याजक ई सुनलन, तऽ ऊ बड़ी जादे डेरा गेलन, आउर सोचे लगलन कि प्रेरितवन के जौरे का होल?25तऽ कोई आके उनका जानकारी देलन, “सुनऽ! अखनी ऊ लोग जिनका तूँ जेल में डाललऽ हल, मन्दिर में खड़ा होके लोगवन के उपदेश दे रहलन हे!”26तऽ मन्दिर के सेवकवन के प्रधान अपन सिपाहियन साथे मन्दिर के अँगना में गेलन, आउर प्रेरितवन के सभास्थल में ले अईलन। बाकि ऊ उनका साथे बुरा बर्ताव नऽ करलन, काहेकि ऊ डरऽ हलन कि कहीं लोग उनका पत्थर मार के मार देतन।27जब सेनापति आउर उनकर सिपाही दूनो प्रेरितवन के महासभा में ले अईलन, तऽ सदस्यवन के सोझे खड़ा होवे ला आज्ञा देलन। आउर एकरा पर महायाजक उनका से सवाल जबाब करलन।28ऊ उनका से कहलन, “हम तोरा आज्ञा देली हल कि तूँ ऊ आदमी यीशु के बारे में लोगवन के मत सिखावऽ! बाकि तूँ हमर आज्ञा नऽ मान लऽ आउर तूँ पूरा यरूशलेम में लोगवन के उनकर बारे में सिखईलऽ! एकर बदले, तूँ ई देखावे के कोशिश कर रहलऽ हे कि हम ही ऊ आदमी के मरे लागी जिम्मेवार ही!”29बाकि पतरस अपन आउर दोसरा प्रेरित दने से जबाब देलन, “हमरा ओही करे ला हे जौन परमेश्वर हमरा करे के आज्ञा देलन हे, नऽ कि ऊ जौन तोहनी सभे हमरा करे ला कहऽ हऽ!30तूँही हऽ जौन यीशु के क्रूस पर चढ़ा के मार देलऽ! बाकि परमेश्वर, जिनकर उपासना हमनी के पुरखावन करऽ हलन, यीशु के मरला के बाद फिन से जिलईलन।31परमेश्वर यीशु के कोई आउर से जादे इज्जत देलन हे। ऊ उनका हमनी के उद्धारकर्ता आउर हमनी पर राज करे लागी बनईलन हे। ऊ हमनी इस्राएलियन के मन फिराव करे ला आज्ञा देलन हे, जेकरा से ऊ हमनी के हमर पापवन लागी मांफ कर सकतन।32हम लोगवन के ई बात बतावऽ ही, जे हमरा पता हे कि यीशु के साथे जे होल हल। पवित्र आत्मा भी, जिनका परमेश्वर हमरा भीर भेजलन हे, जौन उनकर आज्ञा मानऽ हथन, गवाह हथन कि ई सभे बात सच हे।”33जब महासभा के सदस्यवन ई सुनलन तऽ ऊ प्रेरितवन पर बड़ी गोस्सा होलन आउर उनका मार देवे ला चाहऽ हलन।34बाकि ऊहाँ एगो सभा हलन जेकर नाम गमलीएल हल। ऊ फरीसी झुण्ड के सदस्य हलन। ऊ लोगवन के यहूदी व्यवस्था सिखावऽ हलन आउर सभे यहूदी उनकर इज्जत करऽ हलन। ऊ सभा के सामने खड़ा होलन आउर ऊ पहरदारवन से कहलन कि ऊ प्रेरितवन के कुछ समय लागी कोठरी से निकास के बाहरसी ले जाय के आज्ञा देलन।35जब पहरदारवन प्रेरितवन के बाहरसी के लेके चल गेलन, तऽ ऊ बाकि ऊ सभा के सदस्यवन से कहलन, "हे साथी इस्राएलियन, तूँ सोच लऽ कि तूँ ई लोग के साथे का करे ला चाहऽ हऽ।36काहेकि कुछ साल पहिले थियूदास नाम के एगो आदमी सरकार के खिलाफ विद्रोह करलन। ऊ लोगवन से कहलन कि ऊ एगो खास आदमी हथन, आउर करीब चार सौ लोग भरोसा कर के उनकर जौरे हो गेलन। बाकि ऊ मारल गेलन, आउर जेतना लोग उनकर बात मानऽ हलन सभे तित्तर-बित्तर हो गेलन। येहिसे ऊ अपन योजना के मुताबिक कुछो भी नऽ कर पईलन।37एकर बाद, जब ऊ कर लगावे लागी लोगवन के नाम लिखाई कर रहलन हल, तऽ गलील प्रान्त के यहूदा नामक एगो आदमी विद्रोह करलन आउर कुछ लोगवन के अपन पीछे कर लेलन। बाकि ऊ भी मारल गेलन, आउर जेतना लोग उनकर बात मानऽ हलन, ऊ सभे तित्तर-बित्तर हो गेलन।38येहिसे अखनी हम तोरा से कहऽ ही: ई लोग के हानि मत पहुँचावऽ! उनका छोड़ दऽ! हम ई येहिसे कहऽ ही काहेकि जदि जे कुछ अखनी हो रहल हे ऊ खाली आदमी के योजना हे, तऽ कोई नऽ कोई उनका रोकतन। ऊ असफल हो जईतन।39बाकि परमेश्वर उनका ई सभे काम करे के आज्ञा देलन हे, तऽ तूँ उनका रोक नऽ पईवऽ, काहेकि तूँ जान जईवऽ कि तूँ परमेश्वर के खिलाफ काम कर रहलऽ हे!" सभा के अन्य सदस्यवन गमलीएल के बात मानलन।40तऽ ओखनी मन्दिर के पहरदारवन से कहलन कि प्रेरितवन के लाके पिटल जाय। येहिसे पहरदारवन उनका सभास्थल में ले जा के पिटलन। तऽ सभा के लोगवन उनका आज्ञा देलन कि ऊ लोगवन से फिन कहियो यीशु के बारे में बात नऽ करतन, आउर ओखनी प्रेरितवन के छोड़ देलन।41तब प्रेरित सभा से बाहरसी निकस के आनन्द से कहलन, कि परमेश्वर उनका येहिसे इज्जत करलन कि हमनी यीशु के नाम लागी पीछे हो लेली हे, कि लोग हमरा बेईज्जत करतन।42एकर बाद, प्रेरित हर दिन मन्दिर में आउर अलग-अलग लोगवन के घर में जईते आउर सिखईते आउर सुसमाचार बतईते रहलन कि यीशु ही मसीह हथन।
Bridge Connectivity Solutions Pvt. Ltd.