Acts4
1येही बीच, मन्दिर के अँगना में कुछ याजक, मन्दिर के पहरदार आउर सदूकी दल के कुछ लोग हलन। जब पतरस आउर यूहन्ना लोगवन से बात कर रहलन हल, तऽ ई सभे लोग उनका भीर अईलन।2ई सभे लोग बड़ी गोस्साल हलन काहेकि ऊ दूनो प्रेरित, लोगवन के यीशु के बारे में सिखा रहलन हल। ऊ ओखनी के बता रहल हल कि परमेश्वर यीशु के मार देला के बाद फिन से जी उठलन हल।3अगला दिन बिहने ई लोग पतरस आउर यूहन्ना के पकड़ के जेल में डाल देलन। आउर यहूदी महासभा के पतरस आउर यूहन्ना से पूछताछ करे लागी अगला दिन तक इंतजार करे पड़ल काहेकि साँझ हो गेल हल।4बाकि पतरस के बात सुन के बड़ी मनी लोग यीशु विश्वास करलन। औरतियन आउर बच्चवन के छोड़ के यीशु पर विश्वास करे वालन के गिनती बढ़ के पाँच हजार हो गेल।5अगला दिन बिहने महायाजक अन्य मुख्य शासक, यहूदी व्यवस्था के शास्त्रियन आउर पुरनिया यहूदी महासभा के दोसर सदस्यवन के बोलईलन, आउर ओखनी यरूशलेम में एक जगह जौर होलन।6आउर ऊहाँ पुरनका महायाजक हन्ना हलन, ऊहाँ नया महायाजक कैफा, यूहन्ना, सिकन्दर आउर महायाजक के आउर भी रिश्तेदार लोग हलन।7ऊ पहरदारवन के आज्ञा देलन कि ऊ पतरस आउर यूहन्ना के कोठरी में ले अईलन। फिन ऊ पतरस आउर यूहन्ना से पूछलन, “तोरा कौन नाम से ऊ आदमी के ठीक करे के सामर्थ देलन जौन चल नऽ सकऽ हलन?”8जब पवित्र आत्मा पतरस के सामर्थ देलन, तऽ पतरस उनका से कहलन, हे इस्राएलियन, जे हमर अधिकारी लोग, आउर हे अन्य पुरनियन, हमर बात सुनऽ!9आज तूँ हमरा पूछ रहलऽ हे कि हम एगो अईसन आदमी लागी का बढ़ियाँ काम करली जौन चल नऽ सकल हल आउर तूँ हमरा सवाल पूछऽ हऽ कि ऊ कईसे ठीक हो गेलन। येहिसे हम तोरा आउर बाकि सभे इस्राएलियन के ई बतावऽ ही:10येहिसे हम चाहऽ ही कि तूँ आउर हमर सभे साथी इस्राएली ई जान लऽ: ई येहिसे हे काहेकि नासरत के यीशु मसीह नासरी के नाम से इनका चंगा करलन हे येहिसे ई आदमी तोर सामने खड़ा हो सकल हे। परमेश्वर के मानना हे कि ई तूँही हलऽ जौन उनका यीशु के क्रूस पर चढ़ईलऽ हल, बाकि परमेश्वर उनका मरल में से फिन से जिन्दा कर देलन।11नासरत के मसीह यीशु ओही हथन जिनका बारे में पवित्रशास्त्र में लिखल हे: जौन पत्थर के “राजमिस्त्रियन फेंक देलन हल, ओही भवन के सभे खास पत्थर बन गेल।” 12खाली यीशु ही हमनी के बचा सकलन हे, काहेकि परमेश्वर स्वर्ग के निचे पूरा दुनियाँ में हमरा जईसन कोई दोसरा नाम नऽ देलन जौन हमरा हमर पापवन के दोष से उद्धार कर सकत!13यहूदी अगुवन के एहसास होल कि पतरस आउर यूहन्ना उनका से नऽ डरऽ हे। एखनी दूनो लोग साधारण आदमी हलन जौन पाठशाला में पढ़ाई-लिखाई नऽ करलन हल। येहिसे अगुवा हैरान रह गेलन। उनका पता हल कि ई सभे लोग यीशु के साथे समय बिता चुकलन हल।14आउर ओखनी ऊ आदमी के जौन चंगा होलन हल, पतरस आउर यूहन्ना के साथे खड़ा देखलन, येहिसे ऊ उनकर खिलाफ में कुछ नऽ कह सकलन।15यहूदी अगुवा पहरदारवन से कहलन कि ऊ पतरस, यूहन्ना आउर चंगा होल आदमी के ऊ कोठरी से बाहरसी ले जईतन जेज्जा ओखनी जमा हलन। जब ओखनी अईसन करलन, तऽ अगुवन पतरस आउर यूहन्ना के बारे में आपस में बातचीत करलन।16ऊ कहलन, “हम ई दूनो लोग के सजा देवे लागी कुछ भी नऽ कर सकऽ ही! यरूशलेम में रहे वालन सभे लोग जानऽ हथन कि ऊ एगो अचरज काम करलन हे आउर एगो चिन्ह देखईलन हे, येहिसे हम लोगवन से ई नऽ कह सकली हे कि अईसन नऽ होल हे!17बाकि हमनी के दोसरा लोग के ई नऽ बतावे के चाही कि ऊ ई यीशु के बारे में का सिखा रहलन हे। येहिसे हमनी के ई लोग से कहे के चाही कि जदि ऊ दोसरा के ऊ आदमी के बारे में बतईते रहतन, जे ई आदमी के चंगा करे ला सामर्थ देलन हे, तऽ हम उनका सजा देम।”18तऽ यहूदियन पहरदारवन से कहलन कि ऊ दूनो प्रेरितवन पतरस आउर यूहन्ना के फिन से कोठरी में ले अईतन आउर ओखनी से कहलन कि ऊ अब कोई से यीशु के नाम के बारे में नऽ बोलतन आउर नऽ सिखईतन।19बाकि पतरस आउर यूहन्ना कहलन, “का परमेश्वर ई चाहतन कि हम तोर बात मानम, आउर उनकर बात नऽ मानम? हम तोरा ई न्याय करे देम कि तोरा का सही लगऽ हे।20बाकि हम तोर बात नऽ मान सकऽ ही, काहेकि हम लोगवन के ऊ बात के बतावे ला नऽ छोड़म, जे हम यीशु के करते देखलन हे, आउर जे हम उनका सिखईते सुनली हे।”21तऽ यहूदी अगुवन पतरस आउर यूहन्ना धमका के फिन से कहलन कि ओखनी उनकर आज्ञा के नऽ तोड़तन, बाकि ओखनी उनका सजा नऽ देवे ला तय करलन, काहेकि यरूशलेम के सभे लोग ऊ आदमी के बारे में जौन चल नऽ सकल हल, परमेश्वर के स्तुति कर रहलन हल।22जौन आदमी पर ई चिन्ह चमत्कार करल गेल हल, ओकर उमर चालीस साल से जादे हल।23जब पतरस आउर यूहन्ना महासभा से छूटलन, तऽ ऊ दोसरा विश्वासियन भीर गेलन आउर उनका ऊ सभे कुछ बतईलन जौन प्रधान याजक आउर यहूदी पुरनियन उनका से कहलन हल।24जब विश्वासियन ई सुनलन, तऽ ओखनी सभे एक मन होके परमेश्वर से प्रार्थना करे लगलन, “हे परमेश्वर! तूँ आसमान, धरती, महासागर आउर ओकरा में जे कुछ भी हे, सभे बनईलन हे।25तोर पवित्र आत्मा हमर पुरखा राजा दाऊद के जौन तोर सेवक हलन, ई बात लिखवईलन: अन्यजातियन के लोग काहे गोस्सा होलन? आउर जाति-जाति परमेश्वर के खिलाफ बेकार के योजना काहे बनईलन?26धरती के राजा परमेश्वर के शासक से लड़े लागी तईयार हो गेलन, आउर शासक उनका साथे मिल गेलन ताकि प्रभु परमेश्वर के आउर ऊ अभिषिक्त आदमी के जिनका ऊ मसीह होवे लागी चुन लेलन हल, विरोध करलन। 27ई सच हे कि राजा हेरोदेस आउर पुन्तियुस पिलातुस, अन्यजाति आउर इस्राएलियन के साथे मिल के पवित्र सेवक यीशु के खिलाफ में ई नगर में अईलन, जिनका हे परमेश्वर, तूँ मसीह ठहरा के अपन सेवा ला चुन लऽ हे। 28तूँ उनका अईसन करे देलऽ काहेकि तूँ ढेर पहिलहीं तय कर लेलऽ हल कि अईसहीं होत।29अब हे प्रभु, सुनऽ, कि ओखनी का कह रहलन हे कि ऊ हमरा कौन सजा देतन! हम जे तोर सेवक ही, हम तोर सभे लोग के यीशु के बारे में संदेश देवे में मदत करऽ!30अपन पवित्र सेवक यीशु के नाम पर चंगाई, चिन्ह आउर अचरज के काम करे लागी अपन सामर्थ के इस्तेमाल करऽ!”31जब विश्वासियन प्रार्थना कर लेलन, तऽ ऊ जगह जेज्जा ओखनी जमा होल हलन, हिल गेल। आउर पवित्र आत्मा उनका सभे तरह के सामर्थ देलन, कि जौन वचन परमेश्वर ओखनी के कहे ला कहलन हल, ऊ निडर होके कहलन, आउर ओखनी ओईसहीं करलन।32यीशु पर विश्वास करे वाला लोग ई बात पूरा मन से सहमत हलन कि ओखनी का सोचऽ हथन आउर का चाहऽ हथन। ओखनी में से कोई भी ई नऽ कहलन कि उनकर अकेले के कुछ संपत्ति हे। एकर बदले, उनका भीर जे कुछ हल, ओकरा एक दोसरा में साझा कर दे हलन33प्रेरितवन दोसरा से बड़ी सामर्थ से गवाही बतईलन कि परमेश्वर प्रभु यीशु के फिन से जिन्दा करलन हे। आउर परमेश्वर सभे विश्वासियन पर बड़ी अनुग्रह कर रहलन हे।34कुछ विश्वासी जौन जमीन चाहे घर के मालिक हलन, कहियो-कहियो अपन कुछ संपत्ति बेच दे हलन। फिन ऊ बेचल गेल चिजवन के पईसा लावऽ हलन।35आउर प्रेरितवन के हाथ में पईसा दे हलन, आउर प्रेरित जौन कोई विश्वासी लोग के जईसन जरुरत होवऽ हल, ओकरा पईसा बाँट दे हलन। जेकरा से विश्वासियन में से कोई के कोई चीज के कमी नऽ होवे।36लेवी गोत्र के यूसुफ नाम के एगो आदमी, जौन साइप्रस द्वीप से अईलन हल। प्रेरित उनकर नाम बरनबास रखलन; यहूदियन के भाषा में ऊ नाम के मतलब हे एगो अईसन आदमी जौन हमेशा दोसरा आदमी के उत्साहित करऽ हे।37ऊ एगो खेत बेचलन आउर ओकर पईसा प्रेरित भीर लेके अईलन जेकरा से ऊ दोसरा विश्वासियन के देतन।
Bridge Connectivity Solutions Pvt. Ltd.