Acts27
1जल्दी ही राजपाल फईसला करलन कि पौलुस के जहाज से इटली देश भेजे ला सही रहत। हम, लूका, ओकरा जौरे यात्रा कर रहली हल। ऊ पौलुस आउर कुछ दोसर कैदियन के एगो सिपाही अधिकारी के अधीन कर देलन जेकर नाम यूलियुस हल। ई आदमी सिपाहियन के एगो दल के हिस्सा हल जे सीधे सूबेदार के सूचना दे हल।2तऽ यूलियुस हमनी के आसिया के अद्रमुत्तियुम शहर से एगो जहाज पर चढ़ईलन, जे आसिया प्रान्त के किनारे अलग अलग जगह पर जाय वाला हल। अईसे कर के हमनी समुद्र के राह से अपन यात्रा शुरु करली। मकिदुनिया के थिस्सलुनीके शहर के अरिस्तर्खुस नाम के एगो आदमी हमनी जौरे गेलन।3अगला दिन जब हम सीदोन बंदरगाह शहर पहुँचली, तऽ ऊहाँ यूलियुस पौलुस से बढ़ियाँ व्यवहार करलन आउर ओकरा सीदोन उनका अपन दोस्तवन से मिले जाय ला इजाजत दे देलन, जौन उनकर देख-भाल करतन।4तब जहाज सीदोन से रवाना हो गेल, आउर हमनी साइप्रस टापू के किनारे से होके चलली, जौन हवा से सुरक्षित हल, काहेकि हवा हमर खिलाफ हल।5फिन हमनी किलिकिया आउर पंफूलिया के तट भीर से होते समुद्र पार हो गेली। जहाज लूसिया के मूरा नाम के जगह पर पहुँचल। ऊहाँ हम जहाज से उतर गेली।6मूरा में, सूबेदार के एगो जहाज मिलल जौन सिकन्दरिया से आयेल हल आउर ई जहाज जल्दिये इतालिया जाय वाला हल। येहिसे ऊ हमरा ऊ जहाज पर चढ़े लागी कहलन आउर हम ऊहाँ से निकस गेली।7हम ढेर दिन तक धीरे-धीरे चलते-चलते कनिदुस भीर पहुँचली, बाकि ऊहाँ पहुँचे में हमरा बड़ी दिक्कत होल, काहेकि हवा हमर खिलाफ हल। ओकर बाद, हवा बड़ी प्रचण्ड हो गेल आउर जहाज के सीधे पच्छिम दने बढ़े नऽ देलक। ओकर बाद, एकर बदले, हम क्रेते टापू के किनारे के साथे-साथे चलली, जेज्जा हवा तेज नऽ चल रहल हल, आउर हम सलमोने भीर पहुँचली, जौन पानी में फैलल एगो जमीन के एगो टुकड़ा हल।8हवा अखनी भी तेज हल, आउर जहाज तेजी से आगे नऽ बढ़ रहल हल। येहिसे हम धीरे-धीरे क्रेते के तट पर आगे बढ़ते रहली। आखिर में एगो बंदरगाह पहुँचली जेकर नाम जेकर नाम शुभलंगरबारी हल। ई लसया शहर भीर हली।9काहेकि कई दिन से हवा पच्छिम से बह रहल हल, येहिसे कैसरिया से लेके सुन्दर बंदरगाह तक के सफर कप्तान आउर सूबेदार के योजना से ज्यादा समय ले रहल हल। आउर जहाज के चलावे ला खतरनाक हो गेल हल, काहेकि साल के आखिर उपवास के समय हल आउर तूफान आवे वाला हल। तब पौलुस जहाज पर सवार लोग से कहलन, 10आउर ऊ कहलन, “हे दोस्तवन, परमेश्वर हमरा बतईलन हे कि जदि हम जहाज चलईते रहम, तऽ हमरा नुकसान होत आउर हम बड़ी कुछ खो देम। एगो बड़का तूफान जहाज आउर ओकर माल के नष्ट कर देत आउर हमनी सभे के जान से मार डालत।”11बाकि रोमी सूबेदार पौलुस के बात पर विश्वास नऽ करलन, बाकि ऊ जहाज के चलावे वाला आउर मालिक के बात पर विश्वास करलन, आउर जब ऊ उनका से कहलन जहाज सुरक्षित रहल।12ऊ बंदरगाह जाड़ा के समय में रहे लागी एगो बढ़ियाँ जगह नऽ हल, येहिसे ज्यादातर नाविक ऊहाँ से समुद्र में जाय के सलाह देलन। उनका उम्मीद हल कि ऊ फीनिक्स पहुँच के ऊहाँ जाड़ा काट पईतन। फीनिक्स क्रेते में एगो शहर हे। ईहाँ दक्खिन-पच्छिम आउर उत्तर पच्छिम दूनो तरफ से हवा चलऽ हे।13दक्खिन से हल्का हवा चल रहल हल, येहिगुने जहाज के चालक दल सोचलन कि ऊ आसानी से फीनिक्स पहुँच जईतन। येहिगुने ओखनी जहाज के लँगर समुद्र से ऊपर उठईलन आउर जहाज के क्रेते टापू के तट भीर ले गेलन।14बाकि कुछ ही समय बाद, किनारे से बड़ी तेज तूफानी हवा चलल। ई ओईसन हवा हल जेकरा यूरकुलीन कहल जा हे, जेकरा, "पूर्वोत्तर" हवा भी बोलल जा हे।15ई तूफानी हवा जहाज के अगला हिस्सा पर एतना तेजी से चल रहल हल कि हम ओकरा में नऽ जा सकऽ हली। येहिगुने नाविकवन हवा के दिशा में जाय के फईसला करलन। ई हमनी के बड़ी तेजी से समुद्र पार ढकेल देलक।16जबकि, नाविक जहाज के एगो छोटा सा द्वीप के किनारे ले जाय में सफल रहतन जे हवा से सुरक्षित हल। द्वीप के नाम हल कौदा। ई ढेर मुश्किल हल, बाकि नाविक आखिर में जिनगी रक्षक नाव पर नियंत्रण पावे में सक्षम रहतन।17नाविकवन जिनगी रक्षक नाव पर चढ़ईलन। फिन ओखनी एकर रस्सियन के जहाज के पतवार के चारो पट्टी लपेट देलन। उनका डर होल कि ऊ सुरतिस के गीला रेत में फँस जईतन। येहिगुने ओखनी पाल उतार देलन जेकरा से धीरे-धीरे चल सकत। एकर मतलब हल कि ऊ जहाज के नऽ चलऽ सकलन हे, आउर ई हवा के दिशा में ही चल गेल।18बाकि हवा आउर लहर जहाज के लगातार हिला रहल हल। येहिसे अगला दिन मल्लाह जहाज में रखल चीज फेंकेला शुरु कर देलन19अंधड़ के तिसरका दिन मल्लाह लोग जहाज के हल्का करे लागी ज्यादातर साज-समान पाल, रस्सियन आउर डण्डा समुद्र में फेंक देलन। ओखनी ई काम अपन हाथ से करलन हल।20ढेर दिन तक हवा बड़ी तेज चलते रहलन आउर दिन-रात आसमान में करिया बादल छईले रहल, जेकरा से नऽ तऽ सूरज जना रहलन हल, आउर नऽ तरेगन। हमनी बचे के सऊँसे आशा छोड़ देली हल कि हम जिन्दा रहम।21हमनी में से कोई नऽ ढेर दिन से कुछ नऽ खईलऽ हल। फिन एक दिन पौलुस हमनी के सोझे खड़ा होके कहलन, “हे भईवन, तोरा हमर बात माने के चाहऽ हल कि हमरा क्रेते से जहाज नऽ चलावे के चाही। जदि अईसन होत तऽ हमरा ई विपत्ति आउर नुकसान नऽ उठावे पड़त।22बाकि अब डरऽ मत, काहेकि हमनी में से कोई के प्राण नऽ लेतन ढाढ़स रखऽ। तूफान जहाज के बर्बाद कर देत, बाकि हमनी के नऽ।23हम ई येहिसे जानऽ ही, काहेकि परमेश्वर जे हमनी के रक्षा करऽ हथन आउर जे हमरा दोसरा के उनकर बारे में बतावे आउर सेवा करे लागी कहलन हे, कल रात एगो स्वर्गदूत भेजलन जौन आके हमरा भीर खड़ा होलन।24स्वर्गदूत हमरा से कहलन, ‘हे पौलुस, डरऽ मत। तोरा रोमी राजा कैसर के सामने खड़ा होवे ला जरुरी हे। आउर देखऽ, परमेश्वर सभे के जे तोरा जौरे यात्रा करऽ हथन, तोरा देलन हे।’25येहिसे हमर दोस्तवन, ढाढ़स रखऽ काहेकि हमर विश्वास हे कि परमेश्वर एकरा ठीक ओईसहीं पूरा करतन, जईसे स्वर्गदूत हमरा से कहलन हल।26बाकि जहाज कोई टापू पर जा के दुर्घटनाग्रस्त हो जायेत आउर हम ऊहाँ किनारे पर उतरम।”27तूफान के शुरु होवे के चौदहवाँ रात, जखनी तूफान अखनियो जहाज के खुला अद्रिया समुद्र में उड़ा रहल हल, तऽ लगभग आधा रात के मल्लाह सोचलन कि जहाज किनारे पर पहुँचे वाला हे।28येहिसे ऊ पानी के गहराई नापे लागी रस्सी नीचे गिरईलन। जेकर छोर पर वजन बाँधल हल। जब ऊ रस्सी के फिन से ऊपरे खिचलन, तऽ ऊ नापलन कि पानी चालीस मीटर गबड़ा हे। थोड़ा देर बाद ऊ फिन से नापलन तऽ पानी तीस मीटर नीचे हे।29उनका डर हल कि कहीं जहाज चट्टान से टकरा नऽ जाय, येहिसे ऊ जहाज के पिछला भाग से चार लँगर डाललन आउर प्रार्थना करलन कि जल्दी ही भोर हो जाय जेकरा से ऊ देख सकतन कि जहाज कहाँ जा रहल हे।30कुछ मल्लाह जहाज से भागे के योजना बना रहलन हल, येहिसे ऊ जिनगी रक्षक नाव के समुद्र में उतारलन। ऊ अईसन देखावा करलन कि ऊ जहाज के अगला भाग से कुछ लँगर नीचे उतार सकतन, जेकरा से कोई के पता नऽ होवे कि ऊ का करे जा रहलन हे।31बाकि पौलुस सूबेदार आउर सिपाहियन से कहलन, “जदि ऊ नाविक जहाज पर नऽ रहतन, तऽ तोर बचे के कोई उम्मीद नऽ हे।”32तऽ सिपाहियन रस्सी के काट देलन आउर जिनगी रक्षक नाव के पानी में गिरा देलन।33भोर होवे से ठीक पहिले पौलुस जहाज पर मौजूद सभे लोग से कहलन, “तोहनी लोग चौदह दिन से इंतजार कर रहलऽ हे आउर कुछ नऽ खा रहलऽ हे।34येहिसे अखनी हम तोरा से विनती करऽ ही कि जिन्दा रहे लागी कुछ खा आउर काहेकि तोरा उद्धार लागी ई करे पड़त। आँधी से तोहनी में से कोई नऽ मरतन बाकि जदि तूँ नऽ खईवऽ तऽ मर जईवऽ।” 35ई कहलऽ के बाद पौलुस, सभे के देखते-देखते, रोटी लेलन आउर परमेश्वर के धन्यवाद करलन, आउर रोटी तोड़ के खाय लगलन।36तब ऊ सभे खुश होलन आउर ओखनी खाना खईलन।37जहाज पर हमनी सभे के मिला के दू सौ छिहतर प्राणी हलन।38जब सभे लोग अघा गेलन, तऽ ऊ बचलकन गेहूँ समुद्र में फेंक के जहाज के बोझा के हल्का कर देलन।39भोर होते-होते हमरा जमीन देखाई देवे लगल हल, बाकि मल्लाह के नऽ पता हल कि हम कहाँ ही। जबकि, उनका एगो खाड़ी आउर पानी के किनारे बालू के एगो बड़का इलाका देखाई दे रहल हल। ऊ जहाज के किनारे फैलल जगह पर लावे के फईसला करलन।40तब ऊ लँगर के खोल के समुद्र में छोड़ देलन, आउर ओखनी जहाज के पतवार के बन्धन खोल देलन, आउर ओखनी आगे के पाल उठा देलन, कि हवा उनकर भीतरे चलई, आउर जहाज के किनारे दने लेके मोड़ देलन।41बाकि जहाज तेज लहर में चल गेलन आउर लहरवन के नीचे बालू के टिल्हा पर जा के लगल। जहाज के अगला भाग ऊहें अटक गेल आउर आगे नऽ बढ़ सकल। आउर बड़का-बड़का लहर जहाज के पिछला भाग से टकराय लगल आउर ऊ टूटे लगल।42सिपाहियन के योजना हल कि सभे कैदियन के मार डाली जेकरा से कोई तैर के भाग नऽ सकतन।43बाकि अधिकारी पौलुस के बचावे ला चाहऽ हलन, येहिसे ऊ सिपाहियन के अईसन करे से रोकलन, आउर आज्ञा देलन कि जौन कोई तैर सकऽ हे, ऊ पानी में कूद के जे तैर सकऽ हथन ऊ तैर के सुखल जमीन पर आ जईतन।44फिन ऊ ओखनी से कहल जे तैर नऽ सकऽ हलन कि ऊ कोई अईसन चीज के पकड़ लेतन जे तैर के किनारे के तरफ चल जाय। कुछ लोग लकड़ी के तख्ती के पकड़ लेलक जे लहरवन के चलते जहाज से अलग हो गेल हल। कुछ लोगवन जहाज से अईसन चिजवन पकड़ लेलक जे तैर सकऽ हल। हमनी ओही करली जे ऊ कहलन हल, आउर अईसे कर के हमनी सभे सुरक्षित सुखल जमीन पर पहुँच गेली।
Bridge Connectivity Solutions Pvt. Ltd.