Acts26
1तब राजा अग्रिप्पा पौलुस से कहलन, “अब हम तोरा अपना दने से बोले के हुकूम दे ही।” तब पौलुस हाथ बढ़ा के ई इशारा करलन कि ऊ बोले वाला हथन। ऊ ई कह के अपन बचाव करलन,2“हे राजा अग्रिप्पा, हम खुद के धन्य मानऽ ही कि आज हम तोरा अपन सच्चाई बता सकली हे। हम तोरा बतायेम कि यहूदी अगुवा काहे गलत कह रहलन हे कि हम बुरा काम करली हे।3हम बड़ी धन्य ही काहेकि तूँ हमनी यहूदियन के रीति-रिवाज आउर ऊ सवाल के बारे में बड़ी कुछ जानऽ हऽ जेकरा पर हमनी बहस करऽ ही। येहिसे कृपा कर के हमर पूरा घटना सुनऽ।”4“हमर सभे यहूदी भाई जानऽ हथन कि बचपने से हम अपन जाति के बीच जिनगी के ढंग से जीते आ रहली हे। ऊ जानऽ हथन कि हम हमेशा यहूदियन के बीच में रहली हे आउर हम यरूशलेम में शिक्षा पईली हे। 5ऊ हमरा बचपन से ही जानऽ हथन। आउर जदि ऊ चाहतन तऽ तोरा गवाही बता सकऽ हथन कि एगो फरीसी के तोर पर हम अपन धरम के सभे से कट्टर रीति-रिवाज के जिनगी बड़ी कड़ाई से पालन करऽ हली।6आज हम येहिसे परीक्षा में ही काहेकि हम पूरा विश्वास के साथे ई आशा कर रहली हे कि परमेश्वर ओही करतन जौन ऊ हमर पुरखावन के प्रतिज्ञा करलन हल, हमरा पर मुकदमा चल रहल हे।7हमर बारह यहूदी गोत्र भी पूरा विश्वास के साथे परमेश्वर के वादा के पूरा करे के आशा कर रहलन हे, काहेकि ऊ उनकर आदर करऽ हथन आउर एतना लगन से उनकर आराधना करऽ हथन। आउर तईयो हे सज्जन राजा, ई यहूदी अगुवा कह रहलन हे कि हम गलती करली हे, काहेकि हमहूँ आत्मविश्वास के साथ इंतजार कर रहली हे।8तोहनी में से कोई काहे सोचऽ हथन कि परमेश्वर मरलकन के जिन्दा नऽ कर सकऽ हथन?।9बाकि हम ई बात जरुर कहम कि एक बेरा हमरा भी यीशु पर विश्वास करे ला बड़ी मुश्किल लगऽ हल। हमरा विश्वास हल कि हमरा नासरत नगर के लोगवन के यीशु नासरी के नाम पर विश्वास करे से रोके लागी हरेक तरह के कोशिश करे के चाही।10जब हम यरूशलेम में रहऽ हली तऽ हम येही करली, हम बड़ी मनी पवित्र विश्वासियन के जेल में बंद कर देली। ऊहाँ के मुख्य याजक हमरा अईसन करे के अधिकार देलन हल। आउर जब महासभा ई तय कर रहल हल कि विश्वासियन के मारे ला हे कि नऽ, तऽ हम उनकर पक्ष में मतदान करली।11हम हरेक आराधनालय में, हमरा जहाँ भी हमरा यीशु में विश्वास करे वाला लोग मिलल, ओकरा हम सजा देते रहली। हम उनका निन्दा कहेला मजबूर करे के कोशिश करली कि ओखनी यीशु में विश्वास नऽ करतन। हम उनका से एतना नाराज हली कि हम ओखनी के खोजे ला दोसर शहर में भी गेली।12हम उनका से कहली कि हम दमिश्क शहर में विश्वासियन के गिरफ्तार करे ला चाहऽ ही, येहिगुने प्रधान याजकवन हमरा अईसन करे के अधिकार देलन। येहिसे हम दमिश्क चल गेली।13हे राजा, जखनी हम ऊहाँ से जा रहली हल तऽ हम आसमान में एगो चमकदार इंजोर देखली। जबकि दूपहर के समय हल तईयो ऊ इंजोर सूरज से भी जादे चमकदार हल! ऊ हमर चारो दने, आउर हमर साथे यात्रा करेवालन के चारो दने चमक रहल हल।14हमनी सभे जमीन पर गिर गेली आउर हम कोई के आवाज सुनली जौन हमरा से इब्रानी भाषा में बोल रहलन हल। ऊ कहलन, ‘शाऊल, शाऊल, तोरा हमर खिलाफ हमरा से लड़े के नऽ चाही। तूँ अपने आप के क्षति पहुँचा रहल हे, जईसे कि कोई नुकीला चीज पर लात मारऽ हे।’15तब हम पूछली, ‘हे प्रभु! हमरा बतावऽ कि तूँ कौन हऽ?’ आउर जे आदमी हर से बात कर रहलन हल, ऊ कहलन, हम यीशु ही! हमहीं ऊ ही जिनकर खिलाफ तूँ लड़ रहलऽ हे।16बाकि जमीन से उठ जा। हम तोरा अपन सेवक बनावे ला तोरा सामने अईली हे। हम चाहऽ ही कि तूँ दोसरा के गवाही दऽ कि हम कौन ही, काहेकि तूँ हमरा देखल हे। हम तोरा बाद में अपना बारे में आउर भी बतायेम आउर हम चाहऽ ही कि ई बात दोसरा के भी बता दऽ। 17हम तोरा यहूदियन आउर अन्यजातियन दूनो लोग भीर भेज रहली हे। हम तोरा ओखनी से बचायेम।18हम चाहऽ ही कि तूँ ओखनी के ई पछाने में मदत करऽ कि हम सचमुच में कौन ही। हम चाहऽ ही कि तूँ ओखनी के अईसे जिये में मदत करऽ जे परमेश्वर के खुश करऽ हे। हम चाहऽ ही कि ओखनी जानतन, कि परमेश्वर ओखनी के शैतान के अधिकार से मुक्त कर सकलन हे। हम चाहऽ ही कि ओखनी जानतन, कि परमेश्वर उनकर पापवन के मांफ करतन। हम चाहऽ ही कि ओखनी ऊ सभे अच्छा चीज पईतन जेकरा से परमेश्वर ओखनी के पवित्र करऽ हथन, काहेकि ओखनी हमरा पर विश्वास करऽ हथन, जेकरा ऊ हमेशा ला पा लेतन।19येहिसे, हे राजा अग्रिप्पा! हम ओही करली जौन परमेश्वर हमरा स्वर्गीय दर्शन में करे ला कहलन हल।20सभे से पहिले, हम दमिश्क में यहूदियन से बात करली। फिन हम यरूशलेम आउर यहूदिया प्रान्त के देहात में यहूदियन से बात करली, हम ऊ इलाका में रहे वालन अन्यजातियन से बात भी करली। हम उनका से कहली कि उनका पाप करे ला छोड़ के मन फिरावे के चाही आउर सही तरीका से जिये ला परमेश्वर से मदत माँगे के चाही। हम उनका से ई भी कहली कि उनका अईसन काम करे के चाही, जेकरा से पता चले कि ओखनी पाप करे ला छोड़ देलन हे।21काहेकि हम ई संदेश सुनईली हल, येहिसे जब हम आराधनालय में हली, तऽ कुछ यहूदियन हमरा पकड़ लेलन आउर हमरा मार डाले के कोशिश करलन।22काहेकि परमेश्वर हमर सहायता करलन हे, येहिसे हम आज तक ई सभे बात के प्रचार करते गवाही देते अईली हे। हम साधारण लोग के चाहे ऊ कोई भी जाति के काहे नऽ रहतन, हम ई बतईते अईली हे कि भविष्यद्वक्तावन आउर मूसा का कहलन हल।23ऊ कहलन कि मसीह दुःख उठईतन आउर मर जईतन, ऊ कहलन कि ऊ मरल के पुनरुत्थान में से पहिला आदमी होतन। ऊ ई भी कहलन कि ऊ अपन यहूदी लोगवन आउर अन्यजातियन दूनो के परमेश्वर कईसे बचा सकलन हे।” 24एकरा से पहिले पौलुस आगे कुछ आउर कह पईतन, फेस्तुस गरज के कहलन: “पौलुस, तूँ पागल हो गेलऽ हे! तूँ बड़ी जादे पढ़ाई करलऽ हे आउर येही वजह से तूँ पागल हो गेल हे!”25पौलुस जबाब देलन, “हे महामहिम फेस्तुस, हम पागल नऽ ही। बलुक हम जौन कह रहली हे ऊ सच हे आउर एकदम सही हे।26हम तोरा आश्वासन दे सकली हे कि हम पागल नऽ ही, काहेकि हे राजा अग्रिप्पा ऊ सभे बात के जानऽ हथन, जेकर चर्चा हम कर रहली हे, आउर हमरा विश्वास हे कि ऊ ई सभे बात से परिचित हथन। काहेकि ई सभे बात सभे के सामने घटित होल हे एकरा में से कोई भी बात गुप्त में नऽ होल हे।”27“हे राजा अग्रिप्पा, का तूँ भविष्यद्वक्तावन के लिखल बात पर विश्वास करऽ हऽ? हम जानऽ ही कि तूँ ऊ सभे बात पर विश्वास करऽ हऽ।”28अब अग्रिप्पा बीच में टोक के पौलुस से कहलन, "का तूँ थोड़ा ही समझावे से हमरा मसीही बनावे ला चाहऽ हऽ!"29पौलुस जबाब देलन, “हो सकऽ हे तोरा आउर जादे सुने के जरुरत हे चाहे तूँ अखनी फईसला कर सकल हे। बाकि हम परमेश्वर से प्रार्थना करऽ ही तूँ आउर ओखनी सभे लोग जौन आज हमर बात सुन रहलन हे, ओखनियो ई सिकड़वन के तोड़ के हमरा जईसन बन जईतन!”30जखनी पौलुस ई बात बोलहीं रहलन हल तब राजा खड़ा होलन, आउर अधिकारी बिरनीके आउर उनका जौरे आयेल सभे प्रमुख लोग भी खड़ा हो गेलन।31आउर कोठरी से बाहरसी निकस के आपस में कहे लगलन, “हमनी के ई आदमी के नऽ तऽ फाँसी देवे के चाही आउर नऽ ही सिकड़ में रखे के चाही, काहेकि ई अईसन कुछो भी नऽ करलन हे जेकरा ला ऊ अईसन करतन।”32तऽ अग्रिप्पा फेस्तुस से कहलन, “जदि ई आदमी कैसर से दोहाई नऽ करतन हल तऽ तूँ उनका छोड़ सकऽ हल।”
Bridge Connectivity Solutions Pvt. Ltd.