Acts23
1तब पौलुस यहूदी महासभा के सदस्यवन दने देखलन आउर कहलन: “हे हमर भईवन, हम पूरा जिनगी भर अपन परमेश्वर के विवेक से अच्छा मन से व्यवहार करली हे। हम अईसन कुछ नऽ जानऽ ही जे हम गलत करली हे।”2जब महायाजक हनन्याह पौलुस के ई बात सुनलन, तऽ ऊ पौलुस के ई बात सुनलन, तऽ ऊ पौलुस भीर खड़ा आदमियन से कहलन कि उनकर मुँह पर थप्पड़ मारऽ।3तब पौलुस हनन्याह महायाजक से कहलन, “हे कपटी, परमेश्वर तोर सजा देतन! तूँ ऊहें बईठके हमर फईसला कर रहलऽ हे, आउर परमेश्वर मूसा के जौन व्यवस्था देलन हल, ओकरे मुताबिक न्याय कर रहलन हे। बाकि तूँ खुद ऊ व्यवस्थावन के तोड़ऽ हऽ, काहेकि तूँ हमरा मार डाले के आज्ञा देलऽ, बाकि ई साबित नऽ करलऽ कि हम कोई गलत काम करली हे! 4जौन लोग पौलुस भीर खड़ा हलन, ऊ उनका से कहलन, "तोरा परमेश्वर के सेवक, हमर महायाजक से बुरा-भला नऽ कहे के चाही!”5पौलुस जबाब देलन, “हे हमर भईवन, हमरा दुःख हे कि हम अईसन कहली। हम नऽ जानऽ हली कि जौन आदमी तोरा में से एगो के हमरा मारे लागी कहलन, ऊ महायाजक हथन। जदि हमरा ई पता होत, तऽ हम हमर महायाजक के बारे में बुरा-भला नऽ कहती हल, काहेकि हम जानऽ ही कि हमर यहूदी व्यवस्था में लिखल हे, 'अपन कोई शासक के बुराई मत करऽ!” 6पौलुस जानऽ हलन कि सभा के कुछ लोग सदूकी हथन आउर कुछ फरीसी। येहिसे ऊ सभा में चिल्ला के कहलन, “हे हमर भईवन, हम भी एगो फरीसी ही आउर हमर परिवार के सभे लोग भी फरीसी हलन। हमरा ईहाँ येहिसे मुकदमा करल गेल हे काहेकि हमरा आशा हे कि एक दिन परमेश्वर मरलकन के पुनरुत्थान करतन।”7ओखनी ई बात से एतना नाराज हलन काहेकि सदूकी ई नऽ मान हलन कि मरला के बाद लोग फिन से जिन्दा हो जईतन। ओखनी ई भी नऽ मान हलन कि स्वर्गदूत चाहे दोसरा तरह के आत्मा होवऽ हे, बाकि फरीसी ई बात पर विश्वास कर हथन।8काहेकि सदूकी मानऽ हलन कि मरला के बाद लोगवन के पुनरुत्थान नऽ होत। ऊ ई भी मानऽ हलन कि कोई स्वर्गदूत चाहे दोसरा तरह के आत्मा नऽ होवे। बाकि फरीसी ई सभे बात पर विश्वास करऽ हलन।9ऊ अपने में झगड़ते-झगड़ते एक दोसरा पर चिल्लाय लगल। तब कुछ शास्त्री जौन फरीसी हलन, खड़ा होलन आउर ओकरा में से एगो कहलन, “हमर विचार से ई आदमी कोई गलत काम नऽ करलन हे। हो सकऽ हे कि कोई स्वर्गदूत चाहे कोई आत्मा एकरा से बात करलन हे आउर ई सच कह रहलन हे।”10तब फरीसी आउर सदूकी अपने में मारपीट करे लगलन, आउर सरदार के डर हल कि कहीं ऊ पौलुस के बोटी-बोटी नऽ कर देत। येहिसे ऊ सिपाहियन के गढ़ से नीचे मन्दिर के अँगना में आवे लागी कहलन। ऊ उनका से कहलन कि ओखनी पौलुस के महासभा के सदस्यवन से अलग ले जईतन आउर उनका ऊपर छौनी में ले अईतन।11ऊ रात पौलुस प्रभु यीशु के अपना भीर अईते आउर खड़ा होते देखलन। प्रभु उनका से कहलन, “हिम्मत रखऽ! तूँ ईहाँ यरूशलेम में लोगवन के हमर बारे में गवाही देलऽ हे, येहिसे तोरा रोम शहर में भी लोगवन के हमर बारे में गवाही देवे के चाही।”12अगला दिन भोरिये कुछ यहूदी जौन पौलुस से नफरत करऽ हलन, जमा होलन आउर उनका मार देवे के बारे में बातचीत करलन। ऊ अपने में कहलन, कि जब तक ऊ मर नऽ जाय, तब तक हम कुछ भी नऽ खायेम, नऽ पियम। ऊ परमेश्वर से प्रार्थना करलन कि जदि ऊ अपन वादा पूरा नऽ करतन, तऽ ऊ उनका श्राप देतन।13चालीस से ज्यादा यहूदी आदमी पौलुस के मार देवे ला चाहऽ हलन।14ऊ प्रधान याजक आउर यहूदी पुरनियन भीर गेलन आउर उनका से कहलन, “परमेश्वर हमर प्रतिज्ञा सुनलन हे कि जब तक हम पौलुस के मार नऽ देम, तब तक नऽ तऽ कुछ खायेम आउर नऽ ही कुछ पियम।15येहिसे हम तोरा से निवेदन करऽ ही कि तूँ सरदार भीर जा आउर उनका से कहऽ कि ऊ पूरा यहूदी सभा के तरफ से पौलुस के हमरा भीर ले आवऽ कि आउर जादे गहराई से जाँच होवे। सरदार से कहलन कि तूँ पौलुस से कुछ आउर बात करे ला चाहऽ हथन। जब तक ऊ ईहाँ अईतन, हम उनका मार देवे ला इंतजार करम।”16बाकि पौलुस के बहिन के बेटा सुनलन कि ऊ का करे के योजना बना रहलन हे, येहिसे ऊ किला में गेलन आउर पौलुस के बतईलन।17जब पौलुस ई सुनलन, तऽ ऊ एगो सूबेदार के बोलईलन आउर उनका से कहलन, “ई जवान आदमी के सरदार भीर ले जा, काहेकि ई उनका से कुछ कहेला चाहऽ हथन।”18तब सिपाही ऊ जवान आदमी के सरदार भीर ले गेलन आउर कहलन, “कैदी पौलुस हमरा बोलईलन आउर विनती करलन, ‘कृपा कर के ई जवान आदमी के सरदार भीर ले जा, काहेकि ऊ उनका से कुछ कहेला चाहऽ हलन।’”19सिपाहियन के सरदार जवान आदमी के हाथ पकड़ के उनका अपना भीर ले जा के पूछलन, “तोरा हमरा से का कहेला हे?”20ऊ जवान कहलन, “कुछ यहूदी लोग हथन जौन कल पौलुस के अपन सभा में लावे ला चाहऽ हलन। ऊ कहतन कि ऊ उनका से कुछ आउर सवाल पूछेला चाहऽ हथन। बाकि ई सच नऽ हे। 21ऊ जौन कहऽ हथन, ऊ मत करऽ, काहेकि चालीस से जादे यहूदी आदमी लुकल हथन आउर पौलुस के मार देवे के फिराक में बईठल हथन, जब ऊ सभा के राह में से गुजरतन। ऊ परमेश्वर से ई भी प्रतिज्ञा करलन हे कि जब तक ऊ पौलुस के मार नऽ देतन, तब तक ऊ कुछ भी नऽ खईतन, नऽ पियतन। ऊ अईसन करे ला तईयार हथन, आउर अखनी भी ऊ करे लागी इंतजार कर रहलन हे कि तूँ ऊ काम करे लागी राजी हो जा, जौन ऊ तोरा करे लागी कह रहलन हे।”22सरदार जवान से कहलन, “कोई के मत बतईहऽ कि तूँ हमरा उनकर योजना के बारे में बतईलऽ हे।” फिन ऊ जवान के भेज देलन।23तब सरदार अपन दूगो सूबेदार के बोल के कहलन, “दू सौ सिपाही के यात्रा ला तईयार करऽ। सत्तर सिपाही घोड़सवार आउर दू सौ भाला लेवल सिपाही के लेलऽ। तोहनी सभे के सभे आज रात नौ बजे कैसरिया शहर के जाय लागी तईयार हो जा।24आउर पौलुस लागी घोड़ा लेलऽ, आउर ओकरा सुरक्षित हाकिम फेलिक्स के महल तक ले जा।”25तब सेनापति के एगो चिट्ठी लिखलन, जौन ई तरह से हल:26“हम क्लौदियुस लूसियास ही आउर तोरा चिट्ठी लिख रहली हे। हे फेलिक्स तूँ हमर अधिकारी हऽ आउर हम तोरा आदर करऽ ही। हम तोरा प्रणाम करऽ ही।27हम ई आदमी पौलुस के तोरा भीर येहिसे भेजली हे कि कुछ यहूदियन उनका पकड़ के मार देवे ला चाहऽ हलन, बाकि हम सुनली कि आउर कोई हमरा बता रहलन हे कि ऊ रोमी हथन, येहिसे हम अपन सिपाहियन के साथे जा के उनका छुड़ा लेलन।28हम जाने ला चाहऽ हली कि यहूदी लोग उनकर बारे में का कह रहलन हे कि ऊ गलत काम करलन हे, येहिसे हम उनका उनकर यहूदी सभा में ले गेली।29जब ऊ उनका से सवाल पूछ रहलन हल, तऽ हम सुन रहली हल आउर ऊ उनका जबाब देलन। ओखनी उनका पर जौन दोष लगईलन हल, ऊ यहूदियन के व्यवस्था से सम्बंधित हल। बाकि पौलुस हमनी के रोमी व्यवस्था के उल्लंघन नऽ करलन हे। येहिसे हमर अधिकारियन के मौत के सजा नऽ देवे के चाही, नऽ उनका बन्धन में डाले के चाही।30कोई हमरा बतईलन कि कुछ यहूदी ई आदमी के मारे ला योजना बना रहलन हे, येहिसे हम इनका तोरा भीर भेजली हे, ताकि तूँ ऊहाँ उनकर न्यायोचित न्याय कर सकत।31तब सिपाहियन सरदार के आज्ञा के मुताबिक पौलुस के पकड़ लेलन, आउर रात ही रात उनका अपना साथे अन्तिपत्रिस नगर में चल गेलन।32अगला दिन, पैदल सिपहियन यरूशलेम में लौट गेलन आउर घोड़ा पर सवार सिपाही पौलुस के साथे कैसरिया के यात्रा पर आगे बढ़ गेलन।33जब ऊ कैसरिया नगर में पहुँचलन, तऽ ऊ अधिकारी के चिट्ठी देलन आउर पौलुस के उनकर सामने खड़ा करलन।34अधिकारी चिट्ठी के पढ़लन आउर फिन पौलुस से पूछलन, "तूँ कौन प्रान्त से हऽ?” पौलुस जबाब देलन, “हम किलिकिया से ही।”35तब रोमी अधिकारी पौलुस से कहलन, “जब ऊ लोग अईतन जौन तोरा पर दोष लगईलन हे, तऽ हम तोरा में से हरेक के बात सुनम आउर फिन तोर मामला के बारे में फईसला करम।” फिन ऊ आज्ञा देलन कि पौलुस के ऊ महल में रखवाली ला रखल जाय जेकरा राजा हेरोदेस महान बनवईलन हल।
Bridge Connectivity Solutions Pvt. Ltd.