Acts21
1फिन इफिसुस कलीसिया के पुरनियन के विदागी करे के बाद हम जहाज पर चढ़ली आउर सीधे पानी के राह से कोस टापू पर पहुँचली, ऊहाँ जहाज रात भर लागी रुकल। अगला दिन हम कोस से जहाज पर सवार होके रुदुस टापू पर पहुँचली, ऊहाँ जहाज फिन रुकल। ओकर अगला दिन हम पतरा शहर पहुँचली, जहाज ऊहाँ से आगे नऽ जा रहल हल।2पतरा में हम ऊ जहाज के छोड़ देली, बाकि हमरा पता चलल कि एगो आउर जहाज हे जौन जल्दिये रवाना होत आउर फीनीके के इलाका में जायेत। येहिसे हम ऊ जहाज पर चढ़ गेली, आउर ऊ जहाज रवाना हो गेल।3अखनी जब हम समुद्र पार कर रहली हल, तऽ हमरा साइप्रस द्वीप देखाई देलक। हम ऊ टापू के दक्खिन में चल गेली आउर तब तक नाव से यात्रा करते रहली जब तक हम सीरिया प्रान्त सोर शहर में नऽ पहुँच गेली। आउर जहाज के ऊहाँ ढेर दिन तक रुके पड़ल काहेकि ओकर मजदूरवन के माल उतारे ला हल।4बाकि हमरा पता चलल कि सोर के चेलवन कहाँ रहऽ हथन, येहिसे हम ऊहाँ गेली आउर सात दिन ला उनका साथे रहली। काहेकि परमेश्वर के आत्मा लोग के बतईलन कि जदि पौलुस यरूशलेम में जईतन तऽ बड़ी तकलीफ होत। येहिसे ऊ पौलुस के ऊहाँ नऽ जाय ला प्रोत्साहित करलन।5बाकि जब जहाज के फिन से रवाना होवे के समय आयेल, तऽ हम यरूशलेम दने जाय लागी तईयार हो गेली। आउर जब हम सोर से निकसली, तऽ सभे मरद, अपन मेहरारूवन आउर लईकन के समेत हमरा साथे समुद्र के किनारे गेलन। आउर हमनी सभे ओही रेत पर घुटना टेक के प्रार्थना करली।6बाकि जब हमनी सभे एक दोसरा के विदा करली, आउर हमनी जे पौलुस के साथे यात्रा कर रहली हल, आउर उनका साथे जहाज पर चढ़ गेली, आउर बाकि विश्वासी सोर में अपन-अपन घरे लौट गेलन।7सोर से निकस के हम ओही जहाज पर चढ़ के पतुलिमयिस नगर में पहुँचली, आउर ऊहाँ विश्वासी लोग हलन, हमनी उनकर स्वागत करली, आउर ऊ रात उनका भीर ठहरली।8अगला दिन हम पतुलिमयिस से रवाना होली आउर कैसरिया शहर में पहुँचली, जेज्जा हम फिलिप्पुस से मिले ला गेली, ऊ दोसरा के चेला बनावे लागी तरीका बतावे ला मशहूर हलन। ऊ ओखनी सात लोग में से एगो हलन जेकरा यरूशलेम के मसीही लोग विश्वासियन विधवा के देख भाल करे लागी चुनलन हल। ऊ हमरा अपन घर में रहे लागी नेऊता देलन।9उनकर चारगो कुँवारी बेटी हल। ऊ पवित्र आत्मा के द्वारा बतावल गेल संदेश हमेशा भविष्यद्वाणी करऽ हल।10जब हम ढेर दिन तक फिलिप्पुस के घर में रहली, तऽ अगबुस नाम के एगो भविष्यद्वक्ता यहूदिया प्रान्त से कैसरिया में अईलन, आउर पवित्र आत्मा के द्वारा देवल गेल वचन के बार-बार सुनावऽ हलन।11जखनी ऊ हमरा भीर अईलन तऽ ऊ पौलुस के कमरबन्द उतारलन आउर अपन हाथ-गोड़ बाँध लेलन, फिन ऊ कहलन, “पवित्र आत्मा कहऽ हथन, ‘यरूशलेम में यहूदी अगुवाई कमरबन्द के मालिक के हाथ-गोड़ बाँधतन आउर फिन अन्यजातियन से कहतन कि ऊ ओखनी के अपराधी मान के पकड़ लेतन।’”12जब हमनी में से बाकि लोग ई सुनलन, तऽ हम आउर ऊहाँ मौजूद दोसरा विश्वासी लोग पौलुस से विनती करली, “कृपा कर के यरूशलेम मत जा!”13पौलुस उनका से कहलन, “रोवे-धोवे ला बंद करऽ आउर हमरा जाय से रोके के कोशिश मत करऽ आउर रोके मन मत तोड़ा! रोवऽ मत काहेकि हम प्रभु यीशु के सेवा करे लागी जेल जाय आउर यरूशलेम में मरे लागी भी तईयार ही।”14जब हम जान लेली कि पौलुस यरूशलेम जाय ला राजी हथन, तऽ हम उनका रोके के कोशिश नऽ करली, बलुक कहली, "प्रभु के इच्छा पूरा होवे!"15फिन कैसरिया में ऊ दिन के बाद हम अपन समान समेटली आउर यरूशलेम के सड़क के राह से जाय ला निकस गेली।16कैसरिया के कुछ चेलवन भी हमरा साथे गेलन हल आउर हमरा मनासोन नाम के एगो आदमी के घर में ठहरा देलन, जौन साइप्रस टापू के रहे वाला हलन, आउर जब लोगवन उनकर बारे में सुसमाचार सुनईलन हल, तब से ऊ उनका पर विश्वास करलन हल।17जब हम यरूशलेम पहुँचली, तऽ विश्वासियन के एक झुण्ड खुशी-खुशी हमरा स्वागत करलन।18अगला दिन पौलुस आउर हमनी सभे ऊहाँ कलीसिया के पुरनिया याकूब से बात करे लागी गेली, ऊ यरूशलेम में कलीसिया के झुण्ड के एगो मुख्य अगुवा हलन। बाकि सभे अगुवा भी ऊहाँ मौजूद हलन।19पौलुस उनका नमस्कार करलन आउर फिन ऊ सभे बात के वर्णन करलन जौन परमेश्वर उनका सेवकाई के द्वारा अन्यजातियन के बीच करे के सामर्थ देलन हल।20जब याकूब आउर दोसरा पुरनियन ई सुनलन, कि परमेश्वर का करलन हे तऽ ओखनी परमेश्वर के महिमा करलन। फिन ओखनी में से एगो पौलुस से कहलन, “भाई, तूँ जानऽ हऽ कि हमनी हजारो यहूदी जन ही, जौन प्रभु यीशु पर विश्वास करली हे। आउर तूँ ई भी जानऽ हऽ कि हमनी सभे मूसा के द्वारा देवल गेल व्यवस्था के पालन बड़ी उत्साहित होके करऽ ही।21बाकि लोगवन हमनी के साथी यहूदी विश्वासियन से कहलन हे कि जब तूँ अन्यजातियन लोगवन के साथ रहऽ हऽ तऽ तोहनी उनकर बीच में रहे वाला यहूदियन से कहऽ हऽ कि ओखनी मूसा के व्यवस्था के पालन करे ला छोड़ देतन। लोग कहऽ हथन कि तूँ ओखनी सभे यहूदी विश्वासियन से कहऽ हऽ कि ऊ अपन बेटवन के खतना नऽ करतन, आउर हमनी दोसरा के रीति रिवाज पर नऽ चलऽ। हमरा विश्वास नऽ होवऽ हे कि ओखनी तोरा बारे में सच कह रहलन हे।22बाकि हमर यहूदी भाई ई जरुर जान लेतन कि तूँ यरूशलेम में अईलऽ हे। ऊ तोर बारे में जे कुछ ओखनी सुनलन हे ओकरा वजह से तोरा पर गोस्सा होतन। येहिसे तोरा उनका देखावे ला कुछ करे पड़त कि जौन कुछ ऊ तोरा बारे में सुनलन हे, ऊ सच नऽ हे।23येहिसे जौन हम तोरा जईसन सुझाव दे ही, ओही करऽ। हमनी में से चारगो आदमी हे, जौन परमेश्वर से मनौता मानलन हे।24एखनी के साथे मन्दिर के अँगना में जा आउर ऊहाँ शुद्ध हो जा ऊ सभे करमकांड के करऽ जौन तोरा आउर उनका लागी मन्दिर में आराधना करे लागी जरुरी हे। फिन जब उनका ला बलि चढ़ावे के समय होवे, जे उनका चढ़ावे के जरुरत हे, काहेकि ओखनी ई वादा करलन हे तऽ ऊ जौन कुछ भी चढ़ावा हथन, ओकर भुगतान करतन। ओकर बाद, ऊ अपन माथा के मुड़वा सकऽ हथन ताकि ई देखा सकतन कि ऊ ओही करलन हे जौन ऊ कहलन हल कि ऊ करतन। जब लोग तोरा ओखनी के साथे मन्दिर के अँगना में देखतन, तऽ ऊ जान जईतन कि तोरा बारे में जौन कुछ बतावल गेल हे ऊ सच नऽ हे। एकर बदले, ओखनी सभे ई जान जईतन कि तूँ हमर सभे यहूदी व्यवस्था के पालन करऽ हऽ। 25अन्यजातियन विश्वासियन लागी ईहाँ हमनी यरूशलेम के पुरनियन ई बारे में बात करली हे कि उनका हमर कौन व्यवस्था के पालन करे के चाही, आउर हम उनका एगो चिट्ठी लिखली जेकरा में हम के फईसला लेली हल, ओकरा बतईली। हम लिखली हे कि उनका नऽ व्यभिचार नऽ कोई मूर्ति के बलि चढ़ावल गेल मांस, गला घोंटल गेल मांस के खाय के चाही, उनका कोई भी तरह के लहू नऽ खाय के चाही, आउर उनका अईसन जानवर के मांस नऽ खाय के चाही जेकरा लोग गला घोंट के मार देलन हे। हम उनका ई भी बतईली हे कि उनका कोई अईसन आदमी के साथे शारीरिक सम्बन्ध नऽ बनावे के चाही जेकरा से उनकर वियाह नऽ होल हे।”26पौलुस ओही करे ला सहमति जतईलन जे याकूब आउर दोसर अगुवा उनका से करे ला कहलन हल। अगला दिन ऊ चारगो आदमी के साथ लेलन आउर साथ मिल के ऊ सभे शुद्ध होके विधि-विधान के पूरा करलन जे मन्दिर में आराधना लागी जरुरी हल। ओकर बाद पौलुस मन्दिर के अँगना में गेलन आउर याजक से कहलन कि ई लोग ऊ सभे कुछ करलन हे जे ओखनी परमेश्वर से वादा करलन हल कि ओखनी करतन, ऊ याजकवन से कहलन कि उनका खाली ओही बलिदान चढ़ावे के जरुरत हे, जे व्यवस्था के मुताबिक जरुरी हे। पौलुस ऊ आदमियन के साथ मन्दिर के अँगना में तब तक जईते रहलन जब तक ओखनी में से सभे कोई जरुरी बलिदान नऽ चढ़ा लेलन 27अखनी जबकि सात दिन बीत गेल, तऽ ऊ अपन मनौता पूरा करलऽ के बाद अपन साधारण जिनगी में लौट अईलन हल। जब खुद के शुद्ध करे के सात दिन पूरा होवे ला हल। ऊ घड़ी के कुछ लोग आसिया के कुछ यहूदियन पौलुस के मन्दिर के अँगना में देखलन, ऊ उनका पर बड़ी गोस्सा होलन। आउर आराधनालय में मौजूद बड़ी मनी लोग यहूदियन के भी नाराज कर देलन। तऽ आसिया के यहूदियन पौलुस के पकड़ लेलन।28ओखनी चिल्ला के कहलन, “हे साथी इस्राएलियन, आवऽ, आउर ई आदमी के दण्ड देवे में हमर मदत करऽ! ई जेज्जा भी जा हथन लोग के सिखावऽ हथन कि यहूदी लोग कोई खास नऽ हथन। ऊ लोगवन के सिखावऽ हथन कि उनका अब मूसा के व्यवस्था के पालन करे के जरुरत नऽ हे। ऊ ईहाँ तक हमनी के मन्दिर के अँगना में गैरयहूदी के भी ले अईलन हे, जेकरा से ई शुद्ध जगह अशुद्ध हो गेल हे!”29ओखनी ई बात येहिसे कहलन हल काहेकि ओखनी पौलुस के यरूशलेम में त्रुफिमुस के साथे घूमते देखलन हल। ऊ इफिसुस के एगो गैरयहूदी हलन। यहूदी गैर-यहूदियन के मन्दिर के प्रांगण के कुछ भाग में रहे के इजाजत नऽ दे हलन। आसिया के कुछ यहूदियन सोचलन कि पौलुस ऊ दिन त्रुफिमुस के आराधनालय के अँगना में ले अईलन हे।30जब नगर के लोग सुनलन कि आराधनालय में हुल्लड़ हो रहल हे, तऽ ओखनी दौड़ के ऊहाँ अईलन। भीड़ पौलुस के पकड़ लेलक आउर ओकरा घसीट के मन्दिर के बाहरसी ले गेलन। आउर मन्दिर के पहरदार तुरन्त मन्दिर के दुआरी के बंद कर देलक, जेकरा से कि लोग मन्दिर के भीतरे कोई हुल्लड़ नऽ मचा सकतन।31जब ओखनी पौलुस के मार देवे के कोशिश कर रहलन हल, तऽ कोई मन्दिर भीर के किला में दौड़के रोमी सरदार के बतईलन कि यरूशलेम में बड़ी मनी लोग मन्दिर में दंगा कर रहलन हे।32सूबेदारवन तुरन्त कुछ आउर सिपाहियन के एगो बड़का झुण्ड के जमा करलन आउर ओखनी किला के सीढ़ियन से नीचे उतर के मन्दिर के ऊ जगह पर पहुँचलन जहाँ भीड़ जमा हल। जब लोगवन के भीड़ जौन पौलुस पर चिल्ला रहलन हल आउर पौलुस के पीट रहल हल, ओखनी सेनापति आउर सिपाहियन के अईते देखलन, तब उनका पीटे ला बंद कर देलन।33तऽ सेनापति पौलुस भीर आके उनका पकड़ लेलन आउर सिपाहियन के आज्ञा देलन कि ओकर दूनो हाथ में एक-एकगो सिकड़ बाँध देवल जाय। फिन भीड़ में से लोगवन में से पूछलन, “ई आदमी कौन हे, आउर ई का करलन हे?”34बाकि जे लोग ऊहाँ हलन ओखनी में से कोई कुछ चिल्ला रहलन हल, आउर दोसरा कोई कुछ। आउर जब हालत एतना उलझ गेल, कि सरदार सच्चाई समझ नऽ पईलन कि पौलुस कौन हथन। तऽ ऊ आज्ञा देलन कि पौलुस के मन्दिर के अँगना से सटल किला में ले जायल जाय ताकि ऊहाँ उनका से पूछ-ताछ करल जा सकत।35तब सिपाही पौलुस के किला के सीढ़ी पर ले गेलन, बाकि बड़ी मनी लोग पौलुस के पीछे चलते रहलन, आउर पौलुस के मार देवे के कोशिश करते रहलन। तऽ सरदार सिपाहियन के आज्ञा देलन, कि पौलुस के किला के सीढ़ी पर ले जा।36सेनापति जानऽ हलन कि पौलुस खतरा में हथन, काहेकि सिपाहियन के पीछा करे वाला भीड़ चिल्ला रहल हल, “ओकरा मार दऽ! ओकरा मार दऽ!”37जब सिपाही पौलुस के गढ़ वाला किला में लेके जा रहलन हल, तऽ ऊ सेनापति से यूनानी भाषा में पूछलन, “का हम तोरा से बात कर सकली हे?” सेनापति कहलन, “हमरा अचरज हे कि तूँ यूनानी भाषा भी बोल सकलऽ हे!38एकर मतलब ई हे कि तूँ मिस्र के ओही मिस्री आदमी हऽ, जे कुछ समय पहिले रोमी सरकार के खिलाफ विद्रोह करलऽ हल। ऊ अपना साथे चार हजार हथियारबंद लोग के लेके जंगल में गेलन हल, ताकि हमनी उनका पकड़ नऽ सकम।”39पौलुस जबाब देलन, “हम यहूदी ही। हम जनम तरसुस में होल हे, जौन किलिकिया प्रान्त के एगो खास शहर हे। हम तोरा से विनती करऽ ही कि हमरा लोगवन से बात करे के इजाजत देवल जाय।”40तब सेनापति पौलुस के बोले ला इजाजत देलन। तब पौलुस किला के सीढ़ी पर खड़ा होलन आउर हाथ से लोगवन के शान्त होवे के इशारा करलन। जब भीड़ के लोग शान्त हो गेलन, तऽ पौलुस उनका से उनकर अपन इब्रानी भाषा में बात करलन।
Bridge Connectivity Solutions Pvt. Ltd.