Acts2
1जौन दिन यहूदी पिन्तेकुस्त के परव मना रहलन हल, तऽ सभे विश्वासी यरूशलेम में एक जगह पर जमा हलन। 2ऊ घड़ी एकबैग आसमान से आँधी के सनसनाहट के आवाज अईते सुनाई देलक। जईसे कोई तेज अंधड़ चल रहल हे। जौन घर में जेज्जा ओखनी बईठल हलन, ऊहाँ मौजूद सभे लोग आवाज सुनलन;3तऽ ओखनी आग के लपट के जईसन कुछ देखलन। ई लपट एक दोसरा से अलग हो गेल आउर सभे विश्वासी पर उतर आयेल।4तब सभे विश्वासियन पवित्र आत्मा से भर गेलन, आउर अन्य-अन्य भाषा में बोले लगलन, जईसन पवित्र आत्मा हरेक के बोले के सामर्थ देलन हल।5ऊ घड़ी संसार के सभे देश के यहूदी लोग पिन्तेकुस्त के परव मनावे लागी यरूशलेम में ठहरल हलन। ऊ यहूदी लोग हलन जौन आसमान के निचे सच्चा मन से परमेश्वर के अाराधना करऽ हलन। ओखनी कई जाति अलग-अलग देश से अईलन हल।6जखनी ओखनी आँधी के जईसन जोर से आवाज सुनलन, तऽ एगो बड़ी भीड़ ओज्जा जमा हो गेल, जेज्जा विश्वासियन हलन। आउर भीड़ हैरान कर रहल हल काहेकि ओकरा से हरेक विश्वासियन में से सभे के अपने भाषा में बोलते सुन रहलन हल।7आउर ओखनी बड़ी हैरान होलन, आउर अपने में कहे लगलन, “ई सभे जे बोल रहलन हे, ई गलील से अईलन हे, बाकि एखनी हमनी के भाषा कईसे जानऽ हथन?8बाकि हमनी सभे ओखनी के अपन भाषा बोलते सुन रहली हे जौन हम जनमे से सिखली हे! 9हमनी में से कुछ पारथी, मेदी आउर एलामी के क्षेत्र से हथन, आउर हमनी में से कुछ मेसोपोटामिया, यहूदिया, कप्पदूकिया, पुन्तुस आउर आसिया के क्षेत्र से हथन।10आउर कुछ लोग फ्रूगिया आउर पंफूलिया आउर मिस्र आउर लीबिया देश के ऊ इलाका से अईलन हे, जौन कुरेने नगर भीर हे। आउर कुछ हमनियो ही जौन रोमी शहर से यरूशलेम अईली हे।11ओखनी में मुख्य यहूदियन आउर गैर-यहूदी भी शामिल हथन जौन हमनी यहूदियन के जईसन विश्वास करऽ हथन। आउर हमनी में से कुछ लोग क्रेती द्वीप आउर अरब क्षेत्र से ही। तऽ फिन ई लोग हमनी के भाषा कईसे बोल रहलन हे कि परमेश्वर कौची-कौची बड़का-बड़का काम करलन हे?”12आउर सभे लोग अचरज करे लगलन, आउर समझ नऽ सकलन कि का सोचम। येहिसे एक दोसरा से पूछे लगलन, ई का हो रहल हे?"13बाकि ओखनी में से कुछ दोसर लोग ई देख के रोमियन के मजाक उड़ईलन। ऊ कहलन, "ई सभे लोग अईसन बात कर रहलन हे काहेकि ओखनी बड़ी जादे मीठा दाखमधु पी लेलन हे!"14तब पतरस दोसरकन ग्यारह प्रेरितवन के साथे खड़ा होलन, आउर लोगवन के भीड़ से जोर आवाज में कहे लगलन; “हे यहूदिया के लोगवन आउर हे यरूशलेम में रहे वालन, हमर बात सुनऽ, आउर हम तोरा समझायेम कि का हो रहल हे!15तोहनी में से केतना लोग समझ रहलऽ हे, कि हम नशा में ही, बाकि हम नशा में नऽ ही। अखनी सवेरे के तिसरका पहर होल हे, आउर ईहाँ के लोग दिन के ई घड़ी कहियो भी नशा नऽ कर हथन!16एकर बजाय, हमरा साथे जौन होल हे ऊ हैरानी के बात हे जेकर बारे में भविष्यद्वक्ता योएल बड़ी पहिले लिखलन हल:17परमेश्वर कहऽ हथन, कि अंतिम दिन के बखत, 'सभे लोग के अपन आत्मा उण्डेल देम, आउर तोर बेटवन आउर बेटियन, आदमियन के भविष्यद्वाणी सुनईतन, आउर हम जवानकन के दर्शन देखायेम, आउर हम पुरनियन के सपना देखायेम।18आउर ऊ दिन में हम अपन दास के अपन आत्मा देम, कि ओखनी लोगवन के हमर भविष्यद्वाणी कर सकतन।19हम आसमान में अचरज काम होवे देम, आउर धरती पर चिन्ह देखायेम, कि चमत्कार आउर अनोखा बात घटित होत। ईहाँ धरती पर हरेक जगह लहू, आग आउर धुआँ होत।20आसमान में लोग के सूरज करिया देखाई देत, आउर चाँद उनका लहू के जईसन लाल देखाई देत। ई बात तब घटित होत जखनी हम, प्रभु परमेश्वर, सभे लोगवन के फईसला करे ला आयेम।21ऊ समय से पहिले, जे कोई प्रभु के नाम से अपन पापवन के दोष से बचावे लागी पुकारतन, आउर ऊ बच जईतन।” 22पतरस आगे कहलन, “हे हमर भाई इस्राएलियन, हमर बात सुनऽ! जब यीशु नासरी तोर बीच में रहऽ हलन, तऽ परमेश्वर उनका बड़ी अचरज आउर सामर्थ के काम आउर ई चिन्ह देखा के साबित करलन कि ऊ परमेश्वर दने से हथन। तूँ खुद जानऽ हऽ कि ई सच हे।23जबकि तूँ जानऽ हलऽ कि तूँ ई यीशु के उनकर दुश्मन के हाथ में सौंप देलन, बाकि परमेश्वर पहिले से ई योजना बना के रखलन हल आउर ऊ सभे कुछ जानऽ हलन। फिन ऊ ओखनी के उकसईलन, जौन परमेश्वर के व्यवस्थाहीन हलन कि ऊ यीशु के मार डालतन। ओखनी उनका क्रूस पर चढ़ा के अईसन करलन।24ऊ मर गेलन हल, बाकि परमेश्वर उनका जिन्दा करलन, काहेकि उनका मरल रहे ला अनहोना हल। परमेश्वर यीशु के फिन से जिन्दा करलन।25बड़ी पहिले हमनी के पुरखा राजा दाऊद मसीहा के बारे लिखलन हल, 'हम जानऽ हली कि हे प्रभु परमेश्वर, तूँ हर घड़ी हमर सुनवऽ। तूँ हमर ठीक बगल में हऽ, येहिसे हम ओखनी से नऽ डरम जौन हमरा नुकसान पहुँचावे ला चाहऽ हथन।26हे परमेश्वर, हमर मन येही चलते आनन्द से तोर स्तुति करत, आउर हमरा पूरा भरोसा हे कि तूँही हमर आशा के डेरा हऽ देह के मरलकन में से जिन्दा करवऽ।27हे परमेश्वर तूँ हमर प्राण मरलकन के जगह अधोलोक में रहे नऽ देवऽ, आउर नऽ हमर देह के नष्ट होवे देवऽ। काहेकि हम तोर 'पवित्र सेवक' ही, आउर हमेशा से तोर आज्ञा मानऽ ही।28तूँ हमरा फिन से जिनगी के राह देखईलऽ हे। तूँ हमरा बड़ी खुश करवऽ काहेकि तूँ हमेशा ला हमरा साथे रहवऽ।” 29पतरस आके कहलन, “तूँ जे हमरा जईसन यहूदी हऽ हम तोरा विश्वास के साथे बता सकऽ ही कि हमर प्राचीन पुरखा राजा दाऊद मर गेलन आउर लोग उनका दफना देलन हे। आउर उनकर देह आज भी ओही कब्र में हे जेज्जा उनका दफनावल गेल हल।30राजा दाऊद एगो भविष्यद्वक्ता हलन आउर ऊ जानऽ हलन कि परमेश्वर उनका से वादा करलन हे कि उनकर वंशजवन में से एगो सिंहासन बनतन। 31बड़ी समय पहिले, दाऊद के पता हल कि परमेश्वर का करतन। ऊ कहलन कि परमेश्वर यीशु मसीह के मरला के बाद फिन से जी उठतन। परमेश्वर उनका अधोलोक में नऽ रहे देतन आउर नऽ उनकर देह के नाश होवे देतन। 32जब यीशु मरलन, तऽ परमेश्वर उनका जिन्दा करलन, आउर हमनी सभे उनकर चेला गवाह ही आउर जानऽ ही, काहेकि हमनी उनका देखली हे।33परमेश्वर यीशु के स्वर्ग में राज करे के द्वारा बड़ी बड़का आदर देलन हे। यीशु अपन पिता परमेश्वर से पवित्र आत्मा प्राप्त करलन हे, जईसन कि परमेश्वर प्रतिज्ञा करलन हल। येहिसे यीशु हमरा पवित्र आत्मा उदारता से देलन हे, आउर परमेश्वर ऊ दान के ऊ बात के द्वारा साबित करलन हे, जौन तूँ देखऽ आउर सुनऽ हऽ।34हम जानऽ ही कि दाऊद अपन बारे में नऽ कह रहलन हे, काहेकि दाऊद यीशु के जईसन स्वर्ग में नऽ गेलन हल। एकर अलावे, दाऊद खुद मसीहा के बारे में कहलन: 'प्रभु परमेश्वर हमर प्रभु मसीहा से कहलन, "जहाँ हम ही, ऊहाँ राज करऽ, 35जखनी तक कि हम तोर दुश्मन के पूरा तरह से तोर गोड़ के चौकी नऽ कर देम।”36पतरस ई कह के बात खतम करलन, “जबकि हम चाहऽ ही कि तूँ आउर सभे इस्राएली के सभे लोग ई निश्चय जान लऽ कि परमेश्वर यीशु के प्रभु आउर मसीह दूनो बनईलन हे, ओही यीशु के जिनका तोहनी क्रूस पर चढ़ा के मार देलऽ हल।”37जखनी लोग पतरस आउर दोसरा प्रेरित के बात सुनलन, तऽ उनका हृदय में एहसास होल कि ओखनी गलत काम करलन हे। तब लोगवन उनका पूछलन, “अखनी हमनी का करूँ?”38पतरस उनका जबाब देलन, “तोहनी में से सभे कोई अपन-अपन पाप से मन फिरावऽ। काहेकि अखनी तूँ विश्वास करऽ हऽ कि यीशु मसीह तोरा ला का-का करलन हे, येहिसे हम तोरा यीशु मसीह के नाम में बपतिस्मा देम, जेकरा से ई पता चलत कि परमेश्वर तोर पाप मांफ कर देलन हे आउर ऊ तोरा अपन पवित्र आत्मा भी देतन।”39परमेश्वर तोरा आउर तोर लईकवन लागी, आउर ओखनी सभे लागी जौन यीशु पर विश्वास करऽ हथन, ईहाँ तक कि जे ईहाँ से दूर रहऽ हथन, अईसन करे के प्रतिज्ञा करलन हे। प्रभु हमनी के परमेश्वर ओखनी सभे के अपन पवित्रात्मा देतन जिनका ऊ अपन प्रजा बनावे लागी बोलावऽ हथन!" 40पतरस आउर भी बड़ी कुछ कहलन, आउर कड़ा शब्द में उनका से बात करलन। ऊ उनका से कहलन, "परमेश्वर से निवेदन करऽ कि ऊ तोरा बचईतन ताकि जहिया ऊ ई सभे दुष्ट लोगवन के, जौन यीशु के इंकार कर देलन हे, सजा देतन तऽ तोरा सजा नऽ देतन!"41येहिसे जेतना लोग पतरस के सन्देश पर विश्वास करलन, ओखनी बपतिस्मा लेलन। आउर ओही दिन लमसम तीन हजार आत्मा विश्वासियन के झुण्ड में मिल गेलन।42जौन शिक्षा प्रेरितवन दे हलन ओखनी ओकर पालन लगातार करते रहऽ हलन। ऊ रोजदिन दोसर विश्वासियन के साथे रोजदिन संगति रखऽ हलन, आउर ओखनी रोजदिन एक्केगो साथे भोजन करऽ हलन आउर प्रार्थना करऽ हलन।43आउर यरूशलेम के सभे आत्मा पर परमेश्वर के डर आउर मान सम्मान करऽ हलन, काहेकि प्रेरित बड़ी तरह के अचरज के काम करऽ हलन आउर चिन्ह देखावऽ हलन।44ओखनी सभे जौन यीशु पर विश्वास करऽ हलन, आउर एक्केगो बात पर विश्वास करऽ हलन आउर रोजदिन एक दोसर से मिलऽ हलन। आउर उनका भीर जे कुछ भी हल, ऊ सभे एक दोसरा में साझा करते रहऽ हलन।45आउर समय-समय पर ओखनी में से ढेरमनी अपन जमीन-जायदाद आउर अपन दोसर चिजवन में से कुछ बेच-बेच के ऊ धन में से जेकर जईसन जरुरत होवऽ हल ओकर मुताबिक दोसरा के बाँट दे हलन।46ओखनी हर दिन एक मन होके आराधनालय में जमा होवऽ हलन, आउर फिन अपन-अपन घर में मिल-जुल के खाना खा हलन। जब ओखनी एक साथे खाना खा रहलन हल, तऽ ओखनी खुश हलन, आउर उनका भीर जौन कुछ हल ऊ एगो दोसरा के बाँटऽ दे हलन।47जखनी ओखनी अईसन करऽ हलन तब ऊ परमेश्वर स्तुति करऽ हलन, आउर यरूशलेम के सभे लोग के कृपादृष्टि मिलऽ हल। आउर जखनी ई बात होवऽ हल, तऽ प्रभु यीशु रोजदिन ओखनी के गिनती बढ़ते जा हल जौन अपन पापवन के सजा से बच जा हलन।
Bridge Connectivity Solutions Pvt. Ltd.