Acts1
1प्रिय थियुफिलुस, अपन पहिलका किताब में जौन हम तोरा ला लिखली हल, हम ऊ ढेरमनी चीज के बारे में लिखली हल जौन यीशु करलन आउर सिखईलन, 2ऊ दिन तक जौन दिन परमेश्वर उनका स्वर्ग पर उठा लेलन। स्वर्ग जाय से पहिले, ऊ पवित्र आत्मा के शक्ति से प्रेरितवन के चुनलन आउर ऊ बात के आज्ञा देलन जौन ऊ बतावे लागी चाहऽ हलन।3क्रूस पर यीशु के दुःख सहला आउर मरला के बाद ऊ फिन जिन्दा हो गेलन। बाकि ऊ चालीस दिन तक रह के देखाई दे देलन, प्रेरितवन उनका केतना बार देखलन। ऊ केतना तरीका से ऊ प्रकट करलन कि ऊ फिन से जिन्दा हो गेलन हे। ऊ ओखनी के ई बारे में बात करलन कि परमेश्वर अपन राज में लोगवन के जिनगी पर कईसे राज करतन।4एक बार जब यीशु प्रेरितवन के साथे भोजन कर रहलन, हल तऽ ऊ उनका से कहलन, “यरूशलेम के मत छोड़िहऽ। एकर बदले, ईहाँ तब ला आसरा देखिहऽ जब ला कि हमर पिता अपन आत्मा तोरा पर नऽ भेज देतन जईसे ऊ भेजे ला प्रतिज्ञा करलन हल। तूँ हमरा ई बारे में तोरा से बात करते सुनलऽ हे। 5यूहन्ना लोगवन के पानी से बपतिस्मा देलन, बाकि कुछ दिन के बाद परमेश्वर तोरा पवित्र आत्मा से बपतिस्मा देतन।” 6जब प्रेरितवन एगो आउर अवसर पर यीशु जौरे हलन, तऽ एक दिन प्रेरित यीशु से मिललन, तऽ ऊ उनका से पूछलन, “हे प्रभु, का तूँ अब राजा दाऊद के जईसन हमनी इस्राएली लोगवन के राजा बनवऽ, जौन बड़ी समय पहिले राज करऽ हलन?7यीशु उनका से कहलन कि तोरा ई जाने के जरुरत नऽ हे कि ई घड़ी आउर कल कखनी आउर केतना दिन में होत। हमर पिता अपन अधिकार में करलन हे कि ऊ हमरा कहिया राजा बनईतन।8बाकि पवित्र आत्मा तोरा भीर आके तोरा सामर्थी बनईतन। तब तूँ यरूशलेम आउर यहूदिया आउर सामरिया आउर समूचे धरती में लोगवन के हमर बारे में गवाही बतईवऽ।”9ई कह के ऊ स्वर्ग पर चढ़ गेलन, आउर बादल उनका ऊ देखे से छिपा लेलक। 10जब ऊ ऊपरे जा रहलन हल, तऽ प्रेरित अखनियो भी आसमान दने देख रहलन हल, कि एकबैग उजला कपड़ा पेहेनले दूगो आदमी उनका भीर आके खड़ा हो गेलन। ओखनी स्वर्गदूत हलन।11ओखनी में से एगो कहलन, “हे गलीली लोग, तोरा अब ईहाँ खड़ा होके आसमान दने निहारे के जरुरत नऽ हे! एक दिन येही यीशु, जिनका परमेश्वर तोहनी बीच से स्वर्ग पर उठा लेलन हे, ओईसहीं फिन धरती पर वापस अईतन, जईसे तूँ अखनी उनका स्वर्ग में जईते देख लऽ हे।” 12फिन ऊ दूनो स्वर्गदूत के चल गेलऽ के बाद प्रेरित जैतून नामक पहाड़ से, जौन यरूशलेम शहर से थोड़ा दूरी पर हल, सब्त के यात्रा कर के यरूशलेम लौट गेलन। 13नगर में प्रवेश कर के ऊ जौन घर में ठहरलन हल, ओकर ऊपरे वाला कोठरी पर गेलन। जेतना लोग ऊहाँ हलन ओखनी में पतरस, यूहन्ना, याकूब, अन्द्रियास, फिलिप्पुस आउर थोमा, बरतुल्मै आउर मत्ती, हलफई के बेटा याकूब आउर शमौन जेलोतेस आउर याकूब के बेटा यहूदा भी शामिल हलन।14ई सभे प्रेरित हर घड़ी एक मन होके प्रार्थना करे में लगल रहलन। उनका साथे प्रार्थना करे वाला अन्य लोगवन आउर ऊ औरतियन भी शामिल हल जौन यीशु के साथे हलन, मरियम जौन यीशु के माय हलन, आउर उनकर छोटा भाई भी हलन।15आउर कुछ दिन के बाद में पतरस, भईवन के बीच में खड़ा होके कहलन, आउर नामवन के भीड़ लगभग एक सौ बीसगो हल,16“हे हमर साथी विश्वासियन, राजा दाऊद बड़ी पहिले पवित्रशास्त्र में कुछ अईसन बात लिखलन हल, जे उनका कहे के मुताबिक ओईसहीं होवे ला जरुरी हल। पवित्र आत्मा, जौन जानऽ हलन कि यहूदा ही ऊ आदमी होतन जौन ऊ वचन के पूरा करतन, ऊ दाऊद के बतईलन कि का लिखे ला हे जे यीशु के पकड़वईलन हल। 17जबकि यीशु हमनी में से बाकि लोगवन के साथे यहूदा के भी प्रेरित रूप में सेवा करे लागी चुनलन हल, बाकि यहूदा ऊ आदमी हल, जे यीशु के पकड़े वाला लोग के राह देखईलक हल।”18जब यहूदा यीशु के साथे धोखा देवे अधर्म करलन, तब यहूदी अगुवन उनका पईसा देलन। बाद में यहूदा ऊ पईसा उनका लौटा देलक। जब यहूदा खुद के फाँसी पर लटकईलक, तऽ ओकर देह धरती पर गिर गेल। ओकर पेट फट गेल आउर ओकर पूरा अंतड़ी बाहरसी निकास गेल। येहिसे यहूदी अगुवन ओही पईसा से एगो खेत खरीदलन।19यरूशलेम के रहवईयन सभे लोग ई सुनलन, येहिसे ऊ खेत के नाम अपन अरामी भाषा में 'हकलदमा' मतलब लहू के खेत रखलन, काहेकि ऊ ऊ जगह हल ईहाँ कोई मरऽ हल।20पतरस आगे एहु कहलन, "हम देखऽ ही कि यहूदा के साथे जौन होल हल ऊ भजन संहिता के किताब में लिखल गेल हे, कि ओकर वंश नाश हो जाय; हो सकऽ हे कि ओकरा में कोई भी नऽ बसत। अईसन लगऽ हे कि दाऊद के द्वारा लिखल गेल ई सभे दोसरा वचन भी यहूदा के बारे में बतावऽ हे: कोई आउर ओकर अगुवा बन के ओकर काम सम्हारतन। 21"येहिगुने ई जरुरी हे कि हम प्रेरितवन लागी यहूदा के जगह पर एगो अईसन आदमी के चुनम, जे ऊ घड़ी हमनी के जौरे रहल हल, जखनी प्रभु यीशु मसीह हमनी के जौरे हलन।22मानऽ ऊ घड़ी से जब यूहन्ना बपतिस्मा देवे वाला यीशु के बपतिस्मा देलन, ऊ दिन लागी जब यीशु हमनी के छोड़ के स्वर्ग चल गेलन। यहूदा के जगह लेवे वाला मिल के लोगवन के यीशु के बारे में गवाह बतावे के चाही आउर एहु बतावे के चाही कि ऊ मरला के बाद कईसे दूबारा जी उठलन।23येहिसे प्रेरितवन आउर दोसर विश्वासियन दूगो आदमियन के नाम बतईलन। एगो यूसुफ जौन बरसब्बास हल, जेकरा उपनाम यूस्तुस भी हल, आउर दोसरा आदमी मत्तियाह हल।24ओखनी प्रार्थना कर के कहलन, “हे प्रभु, तूँ तऽ सभे के हृदय के जानऽ हऽ, येहिगुने बतावऽ कि ई दूनो में से तूँ केकरा चुन लऽ हे।25ई सेवकाई आउर प्रेरिताई में ऊ जगह लेतन जेकरा छोड़ के यहूदा अपन जगह जाय लागी मुड़लन हल।”26तब ओखनी ऊ दूनो में से कोई एगो के चुने लागी चिट्ठी डाललन, आउर चिट्ठी मत्तियाह के नाम के निकसल, आउर ऊ दोसर ग्यारह प्रेरितवन के साथे एगो प्रेरित हो गेलन।
Bridge Connectivity Solutions Pvt. Ltd.