Acts16
1पौलुस आउर सीलास दिरबे आउर लुस्त्रा के नगर में जा के ऊहाँ के विश्वासियन से भेंट करलन। कि लुस्त्रा में तीमुथियुस नाम के एगो चेला रहऽ हलन, जिनकर माय यहूदी हलन जे यीशु पर विश्वास करऽ हलन, बाकि उनकर बाबूजी यूनानी हलन। काहेकि ई आदमी यहूदी नऽ हलन, येहिसे ऊ मूसा के व्यवस्था के पालन नऽ करऽ हलन।2लुस्त्रा आउर इकुनियुम के सभे विश्वासियन भाई तीमुथियुस के बारे में बढ़ियाँ गवाही कहलन।3आउर पौलुस चाहऽ हलन कि जब ऊ दोसर जगह में जईतन तऽ तीमुथियुस के अपना साथे ले जईतन हल, येहिसे ऊ कोई के तीमुथियुस के खतना करे ला कहलन। पौलुस अईसन येहिसे करलन जेकरा से ऊ जगहवन पर रहे वालन यहूदी तीमुथियुस के कबूल कर सकतन, काहेकि ऊ जानऽ हलन कि उनकर गैरयहूदी बाबूजी उनकर खतना नऽ करलन हल।4येहिसे तीमुथियुस पौलुस आउर सीलास के साथे चल गेलन, आउर ऊ कई दोसरा नगर में गेलन, आउर हरेक नगर में विश्वासियन के ऊ फईसला सुनईलन, जौन यरूशलेम के प्रेरितवन आउर पुरनिया लोग ओखनी के करे ला कहलन हल।5ओखनी ऊ नगर के विश्वासियन के प्रभु यीशु आउर भी जादे मजबूती से विश्वास करे में मदत करलन, आउर हरेक दिन जादे से जादे लोग विश्वासी बनते चल गेलन।6पौलुस आउर उनकर साथी आसिया प्रान्त में यीशु के बारे में सुसमाचार बाँटे ला चाहऽ हथन, बाकि पवित्र आत्मा देखईलन कि ऊ नऽ चाहऽ हथन कि ऊ अईसन करतन। येहिसे फ्रूगिया आउर गलातिया प्रान्त से होके चल गेलन। ई पता लगावे के कोशिश करते-करते कि पवित्र आत्मा उनका केज्जा सुसमाचार बाँटे ला चाहऽ हथन।7जब ऊ मूसिया प्रान्त के निकट पहुँचलन तऽ उत्तर दने बितूनिया प्रान्त में जाय ला चाहऽ हलन, बाकि यीशु के आत्मा उनका ऊहाँ फिन जा के सुसमाचार सुनावे से रोक देलन।8येहिसे ऊ मूसिया प्रान्त से होके समुद्र के किनारे त्रोआस नाम के शहर में पहुँचलन। जे समुद्र के किनारे हे।9ओही रात परमेश्वर पौलुस के दर्शन देलन, जेकरा में ऊ मकिदुनिया के एगो आदमी देखलन जे उनका से विनती कर कह रहलन हल, कि मकिदुनिया प्रान्त में आवऽ आउर हमर मदत करऽ।10हम, लूका, पौलुस आउर उनकर साथियन के साथे त्रोआस में गेली। जब ऊ ई दर्शन देखलन तऽ हम मकिदुनिया ला तुरन्त तईयार करली, काहेकि हम विश्वास करली कि परमेश्वर हमरा ऊहाँ के लोग के साथे सुसमाचार सुनावे लागी बोलईलन हे।11हमनी नाव पर चढ़ली आउर त्रोआस से सुमात्राके टापू पहुँचली आउर दोसरा दिन नियापुलिस शहर में पहुँचली।12फिन हमनी नियापुलिस शहर से निकस के फिलिप्पी पहुँचली। ई मकिदुनिया के एगो बड़ी खास नगर हल, जेज्जा बड़ी मनी रोमी बसिन्दा रहऽ हलन। हमनी फिलिप्पी में रहे के कुछ दिन तक फईसला करली।13सब्त के दिन हम शहर के फाटक के बाहरसी निकस के नदी के किनारे गेली। जबकि शहर में कोई आराधनालय नऽ हल, येहिसे हम जानऽ हली कि यहूदी लोग अईसन जगह प्रार्थना करे लागी जमा होतन। जखनी हम ऊहाँ पहुँचली, तऽ हम देखली कि कुछ औरतियन प्रार्थना करे लागी जमा होलन हल। येहिसे हम बईठ गेली आउर उनका यीशु के बारे में बतावे लगली।14पौलुस के बात सुन जौन औरतियन रहलन हल, ओकरा में से एगो लुदिया नाम के औरत हल। आउर ऊ थुआतीरा नगर के रहे वाली हल। ऊ एगो व्यापारी हल आउर बैंगनी कपड़ा बेचऽ हल। आउर ऊ इस्राएल के परमेश्वर पर विश्वास आउर आराधना करऽ हल। प्रभु परमेश्वर उनकर मन के पौलुस के बात समझे के लायक बनईलन कि पौलुस का कह रहलन हल आउर ऊ उनका पर विश्वास करलन।15पौलुस लुदिया आउर उनकर घर में रहे वालन लोग के भी बपतिस्मा देलन। तऽ ऊ उनका से कहलन, “जदि तूँ समझलऽ हे कि हम प्रभु यीशु पर सच्चा दिल से विश्वास करऽ ही, तऽ कृपा कर के हमर घरे आवऽ आउर ईहें रहऽ।” येहिसे हम उनकर नेऊता कबूल करली आउर उनकर घर में ठहरली।16दोसरा दिन, जब हम ऊ जगह जा रहली हल जेज्जा लोग प्रार्थना कर लागी जमा होवऽ हलन, तऽ हमर मुलाकात एगो जवान औरत से होल जौन एगो दासी हल। आउर एगो दुष्टात्मा ओकरा लोग के बारे में भविष्य बतावे के शक्ति दे रहल हल। लोग उनकर मालिक के बड़ी पईसा दे हलन, जेकरा से बदले में ऊ ओखनी के बतावऽ हल, कि उनका साथे का होवे वाला हे।17ई जवान औरत पौलुस आउर हमनी सभे के जौरे सभे जगह जा हल। आउर ऊ चिल्लईते रह हल, “आउर कहे लगल ई सभे लोग ऊ परमप्रधान परमेश्वर के सेवक हथन जौन सभे देऊतवन में महान हथन! ऊ तोरा बता रहलन हे कि परमेश्वर तोरा कईसे उद्धार दे सकलन हे।”18ऊ बड़ी दिन तक अईसहीं करते रहल। आखिरकार पौलुस एतना परेशान हो गेलन कि ऊ जवान औरत दने देख के ओकरा में समायेल दुष्टात्मा से कहलन, "यीशु मसीह के नाम से ओकरा में से निकस जो!" आउर दुष्टात्मा तुरन्त ओकरा में से निकस गेल।19जब उनकर मालिकवन देखलन, कि हमर कमाय के आशा जा रहल हे, तऽ पौलुस आउर सीलास के पकड़ के चौक में शासक भीर खींच के ले गेलन।20ऊ जवान औरत के मालिक ओकरा नगर रोमी अधिकारी भीर ले जा के कहलन, "ई सभे लोग यहूदी हथन आउर हमर नगर के लोग के बड़ी बेदम कर रहलन हे।21आउर अईसन रीति बता रहलन हे, जेकरा कबूल करे ला चाहे माने ला हमनी रोमियन ला सही नऽ हे!"22आउर भीड़ में से बड़ी मनी लोग पौलुस आउर सीलास पर दोष लगावे वालन के साथे मिल गेलन। एकरा से रोमी शासक के विश्वास हो गेल कि ऊ जरुर ओखनी दूनो बड़ी खराब आदमी होत। येहिसे शासकवन सिपाहियन के आदेश देलन कि पौलुस आउर सीलास के कुरता फाड़ के डण्डा से पिटल जाय।23तब सिपाहियन पौलुस आउर सीलास के लाठी से एकदम बुरा तरह से पीटलक, आउर पौलुस आउर सीलास के पकड़ के जेल डाल देलक, आउर दरोगा से कहलन, कि ई बाहरसी नऽ निकस सकत।24काहेकि अधिकारी लोग उनका अईसन करे लागी कहलन हल, येहिसे दरोगा पौलुस आउर सीलास के जेल के सभे से दूर के कोठरी में रखलन आउर ओखनी के जमीन पर बईठा के उनकर गोड़ छितरावे ला कहलन। फिन सिपाही लोग ओखनी दूनो के दूगो बड़का लकड़ी के बोटी के बीच में बाँध देलक, ताकि पौलुस आउर सीलास अपन गोड़ भी हिला नऽ सकलन।25लमसम अधरतिया में पौलुस आउर सीलास प्रार्थना कर रहलन हल आउर परमेश्वर के स्तुति कर रहलन हल। आउर दोसरकन कैदियन उनकर बात सुन रहलन हल।26एकबैग एगो बड़ी बड़का भूकम्प आयेल जेकरा से पूरा जेल के नींव हिल गेल। भूकम्प के चलते जेल के सभे दुआरी खुल गेल आउर कैदियन के बाँधे वाला सभे सिकड़वन टूट गेल।27जब दरोगा जाग उठल, आउर ऊ देखलन के भूकम्प के चलते जेल के दुआरी खुलल हे, तब ऊ सोचलन कि कैदी जेल से निकस गेलन हे, आउर ऊ खुद के मारे लागी अपन तलवार निकासलन, काहेकि ऊ जानऽ हलन कि जदि कैदी भाग गेल हे, तऽ नगर के हाकिम उनका मार देतन।28पौलुस दरोगा के देखके चिल्लईलन आउर उनका से कहलन, "तूँ खुद के मत मारऽ! हमनी सभे कैदी ईहें ही!"29दरोगा कोई के चिल्ला के मशाल लावे ला कहलन। आधा रात हल आउर अंधार हल, आउर ऊ ई पक्का करे ला चाहऽ हलन कि सभे कैदी अभी भी जेल में हथन। ऊ जल्दी से ऊ भीतरी कोठरी में गेलन जेज्जा ऊ पौलुस आउर सीलास के रखलन हल। दरोगा डर से थरथरा रहल हल काहेकि शासकवन उनका ओखनी दूनो पर सतर्कता से धियान रखे ला लागी कहलन हल। जब ऊ देखलन कि पौलुस आउर सीलास अखनी भी ऊहाँ हलन, तऽ ऊ उनकर सामने घुटना टेक के उनका आदर करलन काहेकि ऊ भाग के उनकर जान बचईलन।30फिन ऊ पौलुस आउर सीलास के जेल से बाहरसी लाके पूछलन: “हे मालिक, उद्धार पावे लागी हमरा का करे पड़त?”31ऊ जबाब देलन, “प्रभु यीशु पर विश्वास करवऽ, तऽ परमेश्वर तोरा बचईतन आउर परमेश्वर तोर पूरा घराना के सभे लोग बचईतन, जदि ऊ यीशु पर भरोसा करऽ हथन।”32तब पौलुस आउर सीलास उनका से आउर उनकर घरे के सभे लोग से प्रभु यीशु के बारे में सुसमाचार सुनईलन।33तब दरोगा ओही घड़ी अधरतिया के उनकर घाव धोलन, आउर पौलुस आउर सीलास उनका आउर उनकर सभे घराना के बपतिस्मा देलन।34तब दरोगा पौलुस आउर सीलास के अपन घरे ले जा के खाना खिलईलन, आउर ऊ आउर उनकर सभे घराना के लोग बड़ी खुश होलन, काहेकि ओखनी परमेश्वर पर विश्वास करलन हल।35फिन अगला भोरिये, नगर के हाकिम कुछ सिपाहियन के जेल में जा के दरोगा से कहे ला कहलन, “ऊ दूनो कैदी के अखनी तुरन्त जाय दऽ!”36जब दरोगा ई सुनलन, तऽ ऊ पौलुस भीर गेलन आउर उनका से कहलन, “नगर के हाकिम हमरा तोहनी लोग के छोड़ देवे ला कहलन हे। येहिसे अब तोहनी दूनो जेल से निकल सकऽ हऽ चिंता मत करऽ आउर शान्ति से जा कोई तोर फिन कहियो नऽ पकड़तन।”37बाकि पौलुस दरोगा से कहलन आउर उनकर सामने सिपाही भी हल, “नगर के हाकिम लोगवन के हुकूम देलन कि ऊ हमरा भीड़ के सामने पीटे, बिना कोई अपराध के हमरा दोषी ठहरईलन, ऊ हमरा जेल में डाल देलन। ऊ हमरा साथे अईसन करलन, जबकि हम रोमी बसिन्दा ही। आउर हमरा जेल में डाल दऽ। आउर अखनी ऊ हमरा बिना कोई के बतईले हमरा भेजे ला चाहऽ हथन! हम एकरा कबूल नऽ करम! ऊ नगर के हाकिम के आके खुद आके हमरा जेल से छुड़ावे पड़त।”38तब सिपाहियन जा के नगर के हाकिम के ई कहलन कि पौलुस आउर सीलास तखनी तक जेल से बाहरसी नऽ निकलतन। जब नगर के हाकिम सुनलन कि पौलुस आउर सीलास रोमी बसिन्दा हथन, तऽ ऊ बड़ी डेरा गेलन। ऊ जान हलन कि रोमी बसिन्दा के मार-पीट के आउर बिना मुकदमा चलईले ओखनी के जेल में डाल के ऊ गलत काम करलन हे।39तब नगर के हाकिम पौलुस आउर सीलास भीर आके उनका से कहलन, कि जौन कुछ ओखनी उनका साथे करलन हे, ओकरा ला ऊ बड़ी दुःखी हथन। आउर नगर के हाकिम उनका जेल से बाहरसी निकासलन, आउर विनती करलन, कि ऊ नगर से चल जईतन।40पौलुस आउर सीलास जेल से निकस के लुदिया विश्वासी के घर में गेलन आउर ऊहाँ उनका से आउर बाकि लोगवन से मिललन। आउर ओखनी के प्रभु यीशु पर विश्वास रखे लागी उत्साह बढ़ईलन। फिन पौलुस, सीलास आउर तीमुथियुस फिलिप्पुस शहर से चल गेलन। हम, लूका, ऊहाँ कुछ समय तक रहलन।
Bridge Connectivity Solutions Pvt. Ltd.