Acts15
1बाकि फिन कुछ यहूदिया प्रान्त से कुछ यहूदी विश्वासी अन्ताकिया शहर में अईलन। ऊ ऊहाँ के गैर-यहूदी विश्वासियन से कहेला शुरु करलन, “तोरा खतना करवावे के चाही ई देखावे लागी कि तूँ परमेश्वर के हऽ, जईसन कि मूसा परमेश्वर से मिलल व्यवस्था में आज्ञा देलन हल। जदि तूँ अईसन नऽ करवऽ, तऽ परमेश्वर तोरा नऽ बचईतन।” 2पौलुस आउर बरनबास ऊ सभे यहूदियन से बहस करे लगलन। येहिसे अन्ताकिया के विश्वासियन पौलुस आउर बरनबास आउर कुछ अन्य विश्वासियन के यरूशलेम भेजलन, ताकि ओखनी प्रेरितवन आउर दोसर पुरनिया के साथे ई मामला पर चर्चा करतन।3अन्ताकिया के कलीसिया के विश्वासी लोग विदा करलन, तऽ ऊ फीनीके आउर सामरिया के प्रान्त से होके आगे बढ़लन। राह में जब ऊ अलग-अलग जगह पर रुकलन, तऽ ऊ विश्वासियन के बतईलन कि बड़ी मनी अन्यजातियन विश्वासी बन गेलन हे। नतीजा ई होल कि ऊ जगह के सभे विश्वासी बड़ी खुशी मनईलन।4जब पौलुस, बरनबास आउर बाकि लोग यरूशलेम पहुँचलन, तऽ ऊहाँ के कलीसिया आउर प्रेरित आउर पुरनिया आउर मसीहियन ओखनी दूनो के स्वागत करलन। फिन पौलुस आउर बरनबास ऊ सभे काम के बारे में बतईलन जौन परमेश्वर उनका गैर-यहूदियन के बीच में करे लागी काबिल बनईलन हे।5बाकि कुछ यहूदी विश्वासी जौन फरीसी समाज के हलन, अन्य विश्वासी के बीच में खड़ा होके उनका से कहे लगलन, “जौन गैर-यहूदी यीशु में विश्वास करऽ हथन उनकर खतना करल जाय के चाही, आउर उनका ऊ सभे व्यवस्था के पालन करे लागी कहल जाय के चाही जौन परमेश्वर मूसा के देलन हल।”6तब प्रेरित आउर पुरनिया ई मामला पर चर्चा करे लागी जमा होलन।7जब ऊ बड़ी देर तक ई बारे में चर्चा करते रहलन, तऽ पतरस खड़ा होलन आउर उनका से बोललन, “हे हमर भईवन, तोहनी सभे जानऽ हऽ कि बड़ी समय पहिले परमेश्वर तोहनी के बीच में से हमरा चुनलन हल, जेकरा से हम अन्यजातियन के भी परमेश्वर के सुसमाचार के बारे में बतायेम आउर ऊ ओकरा पर विश्वास करतन।8परमेश्वर हृदय के जानऽ हथन कि हर आदमी कईसन हथन। ऊ हमरा आउर दोसरा के भी देखईलन कि ऊ गैर-यहूदी लोग के भी अपन लोग के रूप में कबूल करलन हे, ओखनी के पवित्र आत्मा दे के गवाही देलन, जईसे ऊ हमरा ला भी करलन हल।9परमेश्वर उनका साथे ओईसहीं वर्ताव करलन जईसे ऊ हमरा साथे करलन हे। आउर ऊ उनकर पापवन के बिना भेद के मन शुद्ध करलन काहेकि ऊ यीशु पर विश्वास करलन हल।10तऽ अब तूँ काहे परमेश्वर के परीक्षा करते हऽ, कि चेलवन के गर्दन पर अईसन जुआ रखऽ, जेकरा नऽ हमर पुरखा उठा सकऽ हलन आउर नऽ हम उठावे सामर्थी होली।11हमरा पूरा भरोसा हे कि प्रभु यीशु हमरा ला जे अनुग्रह करलन हे, ओकरा चलते परमेश्वर हमनी यहूदियन के अपन पाप से बचाव करऽ हथन। आउर हमरा पूरा भरोसा हे कि परमेश्वर ओही तरह से ऊ गैर-यहूदियन के बचईतन जे यीशु पर विश्वास करऽ हथन।”12पतरस के बोलला के बाद, बरनबास आउर पौलुस ऊ बड़ी सा महान चमत्कार के बारे में बतईलन जे परमेश्वर उनका अन्यजातियन के बीच करे लागी सक्षम करलन हल। आउर अचरज से पता चलऽ हे कि परमेश्वर ई गैर-यहूदियन के कबूल करलन हल। जौन लोग बरनबास आउर पौलुस के ई चिन्ह आउर चमत्कार के बारे में बतईते सुनलन ऊ एतना मंत्रमुग्ध हो गेलन कि ओखनी सुने ला छोड़ देलन। ओखनी में से कोई कुछ नऽ कहलन।13जब बरनबास आउर पौलुस बोल चुकलन, तऽ यरूशलेम में विश्वासियन के अगुवा याकूब उनका से कहलन, “हे हमर भईवन, हमर बात सुनऽ।14शमौन पतरस तोरा बतईलन कि परमेश्वर पहिले कईसे देखईलन कि उनका अन्यजातियन के परवाह हे, परमेश्वर ई उनकर बीच से एगो अईसन झुण्ड के अपन नाम ला चुनलन जे उनकर सदस्य होतन।15जईसन कि हम एगो भविष्यद्वक्ता के लेखन में पढ़ सकऽ ही, परमेश्वर बड़ी पहिले जे कहलन हल, ऊ ई बात से सहमत हथन: 16बाद में, हम फिन से इस्राएलियन के मदत करम। हम दाऊद के गिरल तम्बू के फिन से स्थापित करम जेकरा हरा के नाश कर देवल गेल हे। हम दाऊद के वंशजवन में से कोई एगो के फिन से इस्राएल के राजा बना के अईसन करम। ई अईसन होत जईसे हम एगो घर के फिन से बना रहली हे जेकरा गिरा देवल गेल हल।17हम अईसन येहिसे करम जेकरा से दुनियाँ के बाकि लोग हमरा अपन प्रभु करके पुकारतन। एकरा में ऊ अन्यजातियन भी शामिल होतन जेकर नाम हम अपना होवे लागी चुनली हे। तूँ बेफिकीर रहऽ कि अईसन होत काहेकि हम प्रभु परमेश्वर कहली हे कि हम अईसन करम।18हम बड़ी पहिले अपन लोगवन से कहली हल कि हम ई करम।” 19याकूब आगे कहलन, “येहिसे हम फईसला करऽ ही कि हमरा ऊ अन्यजातियन से, जे परमेश्वर के चेला बन रहलन हे, ई नऽ कहे के चाही कि उनका हमर सभे यहूदी व्यवस्था आउर रीति रिवाज के पालन करे ला होत।20एकर बदले, हमनी के उनका खाली थोड़ा सा बात के बारे में एगो चिट्ठी लिखे के चाही: उनका मूर्ति के चढ़ावल मांस के नऽ खाय के चाही, उनका अईसन कोई आदमी के साथे व्यभिचार नऽ करे के चाही जेकरा साथे उनकर वियाह नऽ होल हे, उनका अईसन जानवर के मांस नऽ खाय के चाही जेकरा नरेटी चाँप के मारल गेल हे, आउर उनका जानवर के लहू नऽ खाय के चाहे पिये के नऽ चाही।21हमरा अन्यजातियन के ई घोषणा करे के चाही कि ऊ ई सभे काम नऽ करतन काहेकि ई यहूदियन लागी बड़ी बेईज्जती के बात होत। मूसा द्वारा लिखल गेल व्यवस्था ई कामवन के मना करऽ हथन। यहूदी अन्यजातियन से ई उम्मीद करतन कि ऊ जानतन कि परमेश्वर नऽ चाहतन कि ऊ ई काम करतन काहेकि लोग हर सब्त के दिन यहूदी नियम के जोर से आराधनालय में पढ़ हथन। ऊ बड़ी लम्बा समय से कोई अलग-अलग जगह पर शहरवन में अईसन करते आ रहलन हे।”22प्रेरित आउर अन्य पुरनिया यरूशलेम में अन्य सभे विश्वासियन के साथे याकूब के बात मान लेलन। येहिसे से ऊ फईसला लेलन कि उनका यरूशलेम के कलीसिया से कुछ लोग के चुने के चाही आउर उनका पौलुस आउर बरनबास के साथे अन्ताकिया भेजे के चाही। ऊ ऊहाँ के विश्वासी के बतईतन कि यरूशलेम के अगुवन का फईसला लेलन हे। येहिसे ओखनी यहूदा के जौन बरसब्बास भी कहलावऽ हथन, आउर सीलास के चुनलन। ई दूनो यरूशलेम के विश्वासियन के अगुवा हलन।23फिन ऊ ई चिट्ठी लिखलन जेकरा ऊ यहूदा आउर सीलास से अन्ताकिया के विश्वासियन भीर ले जाय लागी कहलन: “हम, जौन तोर साथी विश्वासी ही, प्रेरित आउर पुरनिया, तोरा प्रणाम करऽ ही काहेकि हम ई चिट्ठी तोहनी अन्यजातियन के लिख रहली हे जौन अन्ताकिया आउर सीरिया आउर किलिकिया के दोसर जगहवन में रहऽ हथन।24हम सुनली हे कि हमर कलीसिया के कुछ लोग तोरा भीर अईलन आउर तोरा अईसन बात सिखईलन जे तूँ यीशु पर पहिला बार विश्वास करते घड़ी नऽ सिखलऽ हल, हम सुनली हे कि ओखनी जे कुछ तोरा बतईलन हे ओकरा से तोर आत्मा परेशान हो गेल। हम चाहऽ ही कि तूँ जान लऽ कि हम एखनी लोगवन के तोरा भीर नऽ भेजली हे।25तब हम ईहाँ जमा होके ई विचार करली कि बढ़ियाँ होत कि कुछ आदमी के चुन के तोरा भीर भेजम, आउर प्रिय उनका बरनबास आउर पौलुस के साथे जिनका से हम बड़ी प्रेम करऽ ही, भेज देम।26ऊ दूनो अपन प्राण खतरा में डाललन हे काहेकि ओखनी हमनी के प्रभु यीशु मसीह के नाम में सेवा करऽ हथन27हम यहूदा आउर सीलास के भी तोरा भीर भेजली हे, जौन ओही बात तोरा बतईतन जौन हम लिख रहली हे।28हम मानऽ ही कि पवित्र आत्मा हमरा देखईलन हे कि हमरा तोरा से यहूदी व्यवस्थावन के पालन करे के माँग नऽ करे के चाही। ई कड़ा आउर बिना जरुरत के होत। एकर बदले, हमनी तोरा से खाली कुछ आज्ञा के पालन करे के माँग करऽ ही:29तोरा मूर्ति के सामने बलि करल गेल खाना नऽ खाय के चाही। तोरा जानवर के लहू नऽ खाय के चाही, आउर तोरा ऊ मांस नऽ खाय के चाही जेकरा लोग नरेटी चाँप के मार देलक हे। एकर बदले, तोरा कोई अईसन आदमी के जौरे व्यभिचार नऽ करे के चाही जेकरा से तोर वियाह नऽ होल हे। जदि तूँ ई सभे काम नऽ करऽ हऽ, तऽ तूँ ओही कर रहलऽ हे जौन सही हे। शुभकामना।”30तब प्रेरितवन आउर पुरनियन बरनबास, पौलुस, यहूदा आउर सीलास के यरूशलेम से अन्ताकिया नगर भेज देलन, आउर ऊहाँ विश्वासियन के जमा कर के उनका चिट्ठी पढ़ के सुनईलन।31जब ऊहाँ के मौजूद विश्वासियन ऊ चिट्ठी पढ़लन तऽ ऊ बड़ी खुश होलन काहेकि ओकरा में लिखल बात उनका बड़ी उत्साहित करऽ हल।32यहूदा आउर सीलास भविष्यद्वक्ता हलन, आउर ऊ गैर-यहूदी के विश्वासियन के प्रोत्साहित करे लागी बड़ी मनी बात कहलन। आउर ओखनी प्रभु यीशु पर आउर जादे मजबूती से भरोसा रखे में उनकर मदत करलन।33जब यहूदा आउर सीलास ऊहाँ बड़ी दिन ला अन्ताकिया में शान्ति से रहलन। आउर फिन जब ऊ यरूशलेम लौटे ला तईयार होलन, तऽ अन्ताकिया के विश्वासियन ओखनी दूनो के शुभकामना देलन आउर ऊ ऊहाँ से चल गेलन।34बाकि सीलास सोचलन कि उनका ला ऊहें रहे ला बढ़ियाँ होत। येहिसे यहूदा अकेलहीं यरूशलेम लौटके चल गेलन।35बाकि पौलुस आउर बरनबास अन्ताकिया में ही रहलन, आउर ऊहाँ ऊ ढेरमनी दोसर लोगवन के उपदेश देलन, आउर प्रभु यीशु के बारे में सुसमाचार सुनईलन।36कुछ दिन के बाद पौलुस बरनबास से कहलन, “आवऽ हमनी ऊ सभे शहर में जा के अपन विश्वासियन से मिलम जेज्जा हम पहिले प्रभु यीशु के बारे में सुसमाचार सुनईली हल। ई तरह से हम देख सकम कि ऊ प्रभु यीशु पर केतना विश्वास करऽ हथन आउर उनकर आज्ञावन मानऽ हथन।”37बरनबास सहमति देलन कि ई सभे विश्वासियन से फिन से मिले ला बढ़ियाँ होत। बाकि बरनबास कहलन कि ऊ यूहन्ना के जिनकर दोसरा नाम मरकुस हे, फिन से अपना साथे ले जाय लागी चाहऽ हथन।38बाकि पौलुस बरनबास से कहलन कि हमरा लगऽ हे कि मरकुस के अपना साथे ला जाय ला गलत विचार हे, पौलुस अईसन येहिसे कहलन काहेकि जब ऊ पहिले पंफूलिया में हलन, तऽ मरकुस उनका छोड़ के चल गेलन हल। आउर मरकुस उनकर साथे काम करते नऽ रहलन हल।39ई बात पर पौलुस आउर बरनबास में बड़ी मतभेद हो गेल हल कि यूहन्ना मरकुस के अपना साथे ले जाय के चाही कि नऽ, येहिसे ऊ एक दोसरा से अलग हो गेलन। बरनबास मरकुस के साथे लेलन आउर जहाज पर चढ़ के साइप्रस के टापू पर चल गेलन।40पौलुस सीलास के साथे यात्रा करे ला फईसला करलन, अन्ताकिया के विश्वासियन प्रभु परमेश्वर से उनकर मदत करे लागी दयापूर्वक प्रार्थना करलन। तब पौलुस आउर सीलास अन्ताकिया से चल गेलन।41पौलुस सीलास के साथे सीरिया आउर किलिकिया के प्रान्त में यात्रा करते रहलन। ऊहाँ ओखनी विश्वासियन के कलीसिया के प्रभु यीशु पर मजबूत विश्वास रखे में मदत करलन।
Bridge Connectivity Solutions Pvt. Ltd.