Acts13
1सीरिया के अन्ताकिया में कलीसिया के जौन विश्वासी हलन, ओखनी में से कुछ भविष्यद्वक्ता आउर यीशु के बारे में सिखावे वाला हलन: बरनबास, शमौन जे नीगर कहलावऽ हलन, लूकियुस जौन कुरेने नगर के हलन मनाहेम, जौन राजा हेरोदेस अन्तिपास के जौरे पालल-पोसल गेलन हल। आउर शाऊल हलन।2एक दिन जखनी ऊ प्रभु के आराधना आउर उपवास कर रहलन हल, तऽ पवित्र आत्मा उनका से बात करलन आउर कहलन, हम चाहऽ ही कि तूँ “बरनबास आउर शाऊल के हमर खास तरीका से सेवा करे दऽ हम चाहऽ ही कि तूँ उनका ऊ खास काम लागी भेजऽ जेकरा ला हम उनका चुनली हे!”3येहिसे ऊ उपवास आउर प्रार्थना करते रहलन। फिन ऊ बरनबास आउर शाऊल पर हाथ रखलन आउर प्रार्थना करलन कि परमेश्वर उनकर मदत करतन। फिन ऊ उनका पवित्र आत्मा के आज्ञा के मुताबिक काम करे लागी विदा करलन।4पवित्र आत्मा बरनबास आउर शाऊल के बतईलन कि उनका कहाँ जाय ला हे। येहिसे ऊ अन्ताकिया से समुद्र के किनारे सिलूकिया शहर में पहुँचलन आउर ऊहाँ से जहाज पर चढ़ के साइप्रस टापू पर सलमीस शहर पहुँचलन।5जब ऊ सलमीस शहर में हलन, तऽ ऊ यहूदियन के आराधनालय में गेलन आउर ऊहाँ यीशु के बारे में ऊ संदेश सुनईलन जे परमेश्वर उनका बतावे लागी कहलन हल। यूहन्ना मरकुस उनका साथे गेलन आउर उनकर मदत करलन जे सेवक हलन।6ओखनी तीनो ऊ पूरा द्वीप के पार कर के पाफुस शहर में पहुँचलन, ऊहाँ उनका एगो जादूगर मिलल जेकर नाम बार-यीशु हल, जे यहूदी हल आउर झूठा दावा करऽ हल कि ऊ एगो भविष्यद्वक्ता हे।7ओखनी ऊ द्वीप के हाकिम सिरगियुस पौलुस के साथे रहऽ हलन, जौन बुद्धिमान आदमी हलन। हाकिम कोई के भेज के बरनबास आउर शाऊल के अपना भीर बोलईलन, काहेकि ऊ परमेश्वर के वचन सुने ला चाहऽ हलन।8बाकि बरनबास आउर पौलुस के बात के खण्डन कर के बार यीशु जे खुद के एलीमास भी कहऽ हल, हाकिम के यीशु पर विश्वास नऽ करे ला मनावे के कोशिश करलक। एलीमास नाम के मतलब हे “जादूगर।” ऊ हाकिम के यीशु पर विश्वास नऽ करे ला मनावे के कोशिश करते रहलन।9शाऊल अपन रोमी नाम पौलुस येहिसे इस्तेमाल कर रहलन हल काहेकि ऊ एगो रोमी अधिकारी से मिले जा रहलन हल। पवित्र आत्मा पौलुस के साहस आउर सूझ-बूझ देलन। ऊ जादूगर के तरफ स्थिर नजर से देखे लगलन। 10पौलुस कहलन “तूँ शैतान के सेवा कर रहलऽ हे, आउर तूँ हरेक बढ़ियाँ चीज के रोके के कोशिश करऽ हऽ! तूँ हर घड़ी लोग से झूठ बोलऽ हऽ, आउर उनका साथे दोसर बड़ी सा काम करऽ हऽ। तोहनी के परमेश्वर प्रभु के इच्छा के मुताबिक धार्मिकता के दुश्मन आउर सीधा राह से जिये के कोशिश करे ला बंद नऽ करे के चाही!11अखनी प्रभु परमेश्वर तोरा दण्ड देवे जा रहलन हे! तूँ आंधर हो जईवऽ आउर जहिया ला परमेश्वर तोरा फिन से देखे के इजाजत नऽ देतन, तहिया ला तूँ सूरज के नऽ देख पईवऽ।” एक बार एलीमास के साफ-साफ देखाई नऽ दे रहल हल, फिन ऊ एकदम नऽ देख पा रहलन हल, ऊ एन्ने ओन्ने कोई अईसन आदमी के खोज में भटकते रहलन, जे उनकर हाथ थाम के ले चलतन।12जब राजपाल देखलन कि एलीमास के साथे का होल हे, तऽ ऊ यीशु पर विश्वास करलन आउर पौलुस आउर बरनबास के प्रभु यीशु के बारे में सिखा रहलन हल, ओकर सच्चाई आउर सामर्थ देख के से ऊ हैरान हो गेलन।13एकर बाद पौलुस आउर उनकर साथी जहाज पर सवार होके पाफुस से पंफूलिया प्रान्त के पिरगा शहर में पहुँचलन। पिरगा में यूहन्ना मरकुस उनका छोड़ के यरूशलेम में अपन घरे लौट गेलन।14तब पौलुस आउर बरनबास पिरगा से चल के अन्ताकिया नगर में पहुँचलन, जौन गलातिया प्रान्त के पिसिदिया जिला में हे। आउर सब्त के दिन ऊ आराधनालय में जा के रब्बी के जईसन बईठ गेलन।15कोई मूसा के व्यवस्था के किताब में लिखल बात पढ़लन। फिन कोई भविष्यद्वक्तावन के लिखल किताब पढ़लन। तब यहूदियन के आराधनालय के सरदार, पौलुस आउर बरनबास भीर ई सन्देश भेजलन: “हे हमर भईवन जदि तोहनी में से कोई ईहाँ लोग के उत्साहित करे लागी कुछ कहेला चाहऽ हथन, तऽ कृपा कर के अखनी हमनी से बात करऽ।”16तऽ पौलुस खड़ा होके हाथ से इशारा कर के लोगवन से कहलन, “हे इस्राएलियन, आउर हे गैर-यहूदियन, जे परमेश्वर के आराधना करऽ हऽ, कृपा कर के हमर बात सुनऽ!17परमेश्वर, जिनकर हम इस्राएली उपासना करऽ ही, हमर पुरखावन के अपन प्रजा होवे लागी चुनलन, आउर जब ऊ मिस्र देश में परदेशी हलन, तब उनकर गिनती बड़ी बढ़ा देलन। फिन परमेश्वर ओखनी के गुलामी से छुड़ावे लागी सामर्थ के काम करलन हे।18जब ऊ जंगल में हलन, तऽ ऊ लगभग चालीस साल ला ओखनी के बर्ताव के सहन करलन।”19ऊ इस्राएलियन के सात जातियन के झुण्ड पर जीत प्राप्त करे के काबिल बनईलन जौन ऊ समय में कनान इलाका में रह रहलन हल, आउर ऊ उनकर जमीन इस्राएलियन के हमेशा लागी अधिकार में रखे ला दे देलन।20ई सभे बात उनकर पुरखावन के मिस्र जाय के लगभग चार सौ पचास साल बाद होल। ओकर बाद, परमेश्वर इस्राएली लोग पर शासन करे लागी न्यायी आउर अगुवा के रूप में सेवा करे लागी लोग के चुनलन। भविष्यद्वक्ता शमूएल उनका पर राज करे वाला ई न्यायियन में से अंतिम न्यायी हलन।21फिन जब शमूएल अखनी भी उनकर अगुवा हलन, तऽ लोगवन उनका से माँग करलन कि ऊ उनका पर राज करे लागी एगो राजा चुनतन। येहिसे परमेश्वर बिन्यामीन के गोत्र से कीश के बेटा शाऊल के उनकर राजा चुनलन। ऊ उनका पर चालीस साल ला शासन करलन। 22जब परमेश्वर शाऊल के राजा बनावे से मना कर देलन, तऽ ऊ दाऊद के राजा चुनलन। परमेश्वर उनका बारे में गवाही देलन, “हम देखऽ ही कि यिशै के बेटा दाऊद एकदम हमर मन के मुताबिक आदमी हथन जौन हमर इच्छा पूरा करऽ हे। ऊ ओही सभे करत जौन हम ओकरा से चाहऽ ही।”23“दाऊद के वंशजवन में से परमेश्वर यीशु के हमनी इस्राएलियन भीर भेजलन ताकि हमनी के उद्धारकर्ता, ठीक जईसे ऊ दाऊद आउर हमर दोसरा पुरखावन से प्रतिज्ञा करलन हल कि ऊ अईसन करतन।24यीशु के काम शुरु करे से पहिले, यूहन्ना बपतिस्मा देवे वाला हमनी सभे इस्राएली लोग के मन फिराव के उपदेश देलन जौन उनका भीर अईलन हल। ऊ उनका से कहलन कि उनका अपन पापी बर्ताव से दूर हो जाय के चाही आउर परमेश्वर से क्षमा माँगे के चाही। फिन ऊ उनका बपतिस्मा देतन।25जब यूहन्ना ऊ काम के पूरा करे वाला हलन जौन परमेश्वर उनका करे ला देलन हल, तऽ ऊ कहलन, का तूँ सोचऽ हऽ कि हम ओही मसीह ही जिनका परमेश्वर भेजे के वादा करलन हल? ऊ हम नऽ ही। बाकि सुनऽ! मसीह जल्दिये अईतन। ऊ हमरा से एतना महान हथन कि हम उनकर गोड़ से जूता उतारे के लायक भी नऽ ही।”26“हे इस्राएली भईवन, जे अब्राहम के वंशज हऽ, हे गैर-यहूदी लोगवन, जौन परमेश्वर के आराधना करऽ हऽ, कृपा कर के सुनऽ! परमेश्वर हमनी सभे के ई सन्देश भेजलन हे कि ऊ कईसे लोगवन के उद्धार दे हथन।27यरूशलेम में रहे वालन लोग आउर उनकर सरदार यीशु के नऽ चिन्हलन। ऊ अपन भविष्यद्वक्तावन के सन्देश के नऽ समझलन, जबकि ओखनी हरेक सब्त के दिन भविष्यद्वक्तावन के उनका ला पढ़ते सुनलन हल। भविष्यद्वक्तावन बड़ी पहिले जौन भविष्यद्वाणी पूरा करलन हल, ऊ सच साबित होल, जब ओखनी यीशु के मौत के सजा सुनईलन।28बड़ी मनी लोग यीशु पर दुष्ट के काम करे के दोष लगईलन, बाकि ऊ सभे ई साबित नऽ कर सकलन कि ऊ अईसन कुछ करलन हे जेकरा ला उनका मौत के सजा मिले के चाही, तईयो ओखनी राजपाल पिलातुस से यीशु के मौत के सजा देवे के माँग करलन।29ओखनी यीशु के साथे ओही सभे करलन जौन भविष्यद्वक्तावन बड़ी पहिले शास्त्र में लिखलन हल कि लोग उनका साथे करतन। ओखनी यीशु के क्रूस पर काँटी ठोक के मार देलन। फिन उनकर देह के क्रूस से उतार के कब्र में रख देवल गेल।30बाकि परमेश्वर उनका मरल में से फिन से जिन्दा करलन।31ऊ कई दिन तक अपन चेलवन के जौन उनकर साथे गलील से यरूशलेम अईलन हल, बार-बार देखाई देते रहलन। आउर अखनी जौन उनका देखलन हे, ऊ लोगवन के उनकर बारे में गवाह दे रहलन हे।”32“अखनी हम तोरा ई सुसमाचार सुना रहली हे। हम तोरा बतावे ला चाहऽ ही कि परमेश्वर हमर यहूदी पुरखावन से प्रतिज्ञा करलन हल, ओकरा पूरा करलन हे!,33परमेश्वर यीशु के जिला के हमनी ला जे उनकर वंशज ही, आउर तोहनी ला भी जौन यहूदी नऽ हऽ, अईसन प्रतिज्ञा के पूरा करलन हे। ई ओईसहीं हे जईसे दाऊद दोसरा भजन में लिखलन हे, जब परमेश्वर अपन बेटा के भेजे के बारे में कह रहलन हल: तूँ हमर बेटा हऽ आज हम तोर पिता बन गेली हे। 34परमेश्वर मसीह के मरलकन में से जिन्दा करलन हे आउर परमेश्वर उनका फिन कहियो मरे नऽ देतन। परमेश्वर मसीह से ई वादा करलन हल जखनी ऊ शास्त्रवन में कहलन हल, ‘हम तोर मदत जरुर करम, जईसे कि हम दाऊद से पवित्र विश्वसनीय वादा करली हल।’ 35येहिगुने दोसरा भजन में दाऊद भी कहऽ हथन: ‘तूँ अपन पवित्र भक्त के देह के सड़े नऽ देवऽ।’” 36जब दाऊद जिन्दा हलन, तऽ ऊ ओही करलन जौन परमेश्वर उनका से सेवा करवावे ला चाहऽ हलन। आउर जखनी ऊ मरलन, तऽ उनकर देह के ऊहें दफनावल गेल, जहाँ उनकर पुरखावन के देह के दफनावल गेल हल, आउर दाऊद के देह सड़ गेल हल। येहिसे ऊ ई भजन में अपन बारे में बात नऽ कर रहलन हे। 37बाकि परमेश्वर यीशु के मरला के बाद फिन से जिन्दा करलन आउर उनकर देह के सड़े नऽ देलन।38येहिसे, हमर साथी इस्राएलियन आउर दोस्तवन, हम चाहऽ ही कि तोहनी जान लऽ कि परमेश्वर यीशु के काम के कारण तोहनी के पापवन के मांफ करे के वादा करलन हे। मूसा के द्वारा लिखल गेल व्यवस्था के पालन करे से तोहनी परमेश्वर के साथ धर्मी नऽ बन सकलऽ हे, काहेकि अईसन बड़ी सा नियम हल जेकर पालन तूँ नऽ कर सकलऽ हे।39बाकि अखनी परमेश्वर घोषणा करलन हे कि जौन लोग यीशु पर विश्वास करऽ हथन, ऊ अखनी धर्मी ठहरावल गेलन आउर ऊ सभे काम ला दोषी नऽ हथन जौन ओखनी करलन हल आउर जेकरा से परमेश्वर नाराज होलन हल।40येहिसे सावधान रहऽ कि परमेश्वर तोर न्याय नऽ करतन, जईसे कि भविष्यद्वक्तावन कहलन हे कि परमेश्वर करतन!41परमेश्वर भविष्यद्वक्ता हबक्कूक के द्वारा कहलन, 'हे हमर मजाक उड़ावे वालन, जब तूँ ई देखवऽ कि हम का कर रहली हे, तऽ तूँ जरुर हैरान होवऽ, आउर तखनी तूँ नाश हो जईवऽ। तूँ हैरान होवऽ काहेकि हम तोर जिन्दा रहते तोरा साथे कुछ भयानक करम। जदि कोई तोरा से कहतन भी तऽ तूँ विश्वास नऽ करवऽ कि हम अईसन करम!"' 42जब पौलुस आउर बरनबास ई बात कह चुकलन, तऽ ऊहाँ मौजूद लोगवन में से अधिकतर उनका से विनती करलन कि कम से कम अगला सब्त के दिन तक फिन से आके ई सभे बात के बारे में उनका से बात करतन।43जब यहूदी आराधनालय के सभा खतम हो गेल, तऽ ओखनी में से बड़ी मनी लोग पौलुस आउर बरनबास के पीछे हो लेलन। ई सभे यहूदी आउर गैर-यहूदी दूनो हलन, जौन परमेश्वर के आराधना करऽ हलन। पौलुस आउर बरनबास उनका से बात करते रहलन। ऊ ओखनी से विनती करते रहलन कि ऊ ई बात पर विश्वास रखतन कि परमेश्वर दया कर के यीशु के काम के चलते लोगवन के पाप के क्षमा करऽ हथन।44अगला सब्त के दिन अन्ताकिया के अधिकतर लोग यहूदी सभास्थल में पौलुस आउर बरनबास के प्रभु यीशु के बारे में बोलते सुने लागी अईलन।45बाकि जब यहूदियन के अगुवन देखलन कि पौलुस आउर बरनबास के बात सुने लागी बड़ी बड़का भीड़ जमा हो रहल हे, तऽ ऊ बड़ी जलन से भर गेलन, आउर पौलुस के बात के खण्डन करे लगलन, आउर ओखनी पौलुस के निन्दा भी करलन।46तब पौलुस आउर बरनबास ओखनी यहूदी अगुवन के बड़ी हिम्मत के साथे कहलन, "हमरा पहिले तोहनी सभे यहूदियन के यीशु के बारे में परमेश्वर के सन्देश सुनावे ला हल, आउर फिन गैर-यहूदियन के सुनावे ला हल, काहेकि परमेश्वर हमरा अईसन करे के आज्ञा देलन हल। बाकि तूँ परमेश्वर के सन्देश के कबूल नऽ करे के फईसला कर रहलऽ हे। अईसन कर के तूँ देखईलऽ हे कि तूँ अनन्त जिनगी के लायक नऽ हऽ। येहिसे, हम तोहनी के छोड़ रहली हे, आउर अखनी हम अन्यजातियन भीर जा के उनका परमेश्वर के सन्देश सुनायेम।47हम ई येहिसे कर रहली हे काहेकि प्रभु परमेश्वर हमरा अईसन करे के आज्ञा देलन हे। ऊ शास्त्र में कहलन हे, 'हम तोरा चुनली हे कि तूँ हमर बारे में अन्यजातियन के अईसन बात बतावऽ जे ओखनी ला एगो ज्योति के जईसन होत। हम तोरा चुनली हे कि तूँ धरती भर के लोगवन के ई सन्देश प्रचार करऽ, कि हम ओखनी के उद्धार चाहऽ ही। 48जब अन्यजातियन लोग ई सभे बात सुनलन, तऽ ऊ खुश होलन आउर यीशु के बारे में सन्देश ला परमेश्वर के स्तुति करे लगलन। सभे गैर-यहूदी लोगवन जिनका परमेश्वर अनन्त जिनगी लागी चुनलन हल, प्रभु यीशु के बारे में सन्देश पर विश्वास करलन।49ऊ घड़ी, ढेरमनी विश्वासी ऊ पूरा इलाका में घूम रहलन हल, आउर जहाँ कहीं भी गेलन, ऊहाँ प्रभु यीशु के सन्देश प्रचार करते रहलन।50बाकि यहूदियन के कुछ अगुवन कुछ खास औरतियन से बात करलन जौन उनकर साथे आराधना करऽ हलन। ऊ नगर के सभे से खास लोग से भी बात करलन। यहूदी अगुवन गैर-यहूदी अगुवन के पौलुस आउर बरनबास के रोके के कोशिश करे लागी उकसईलन। येहिसे ऊ गैर-यहूदियन ढेरमनी रहवईयन के पौलुस आउर बरनबास के खिलाफ भड़कईलन आउर उनका अपन इलाका से बाहरसी निकले ला मजबूर कर देलन।51जब ऊ दूनो प्रेरित ऊहाँ से जा रहलन हल, तऽ ऊ अपन गोड़ के धूरी झाड़ के ऊ अगुवन के ई देखईलन कि परमेश्वर उनका कबूल नऽ करलन हे आउर उनका सजा देतन। फिन ऊ अन्ताकिया से निकस के इकुनियुम नगर में चल गेलन।52आउर येही बीच, अन्ताकिया के चेलवन, जे यीशु पर विश्वास करऽ हलन, बड़ी खुश हलन आउर पवित्र आत्मा उनकर बड़ी मदत कर रहल हल।
Bridge Connectivity Solutions Pvt. Ltd.