Acts12
1लमसम येही घड़ी राजा हेरोदेस अग्रिप्पा यरूशलेम में विश्वासियन के कलीसिया के अगुवा के गिरफ्तार करे लागी सिपाही के भेजलन। सिपाहियन उनका पकड़ के जेल में डाल देलन। राजा अईसन येहिसे करलन काहेकि ऊ विश्वासियन के दुःख देवे ला चाहऽ हलन। 2ऊ एगो सिपाही के प्रेरित यूहन्ना के बड़का भाई, प्रेरित याकूब के मुड़ी काटे के आज्ञा देलन, आउर सिपाही अईसने करलन3जब हेरोदेस के एहसास होल कि ऊ यहूदी लोग के अगुवन के खुश कर देलन हे, तऽ ऊ सिपाहियन के आज्ञा देलन कि ऊ पतरस के भी पकड़ले। ई ऊ परव के दौरान होल जब यहूदी लोग बिना खमीर के रोटी खा हलन।4पतरस के पकड़े के बाद ऊ उनका जेल में डाल देलन। ऊ पतरस के सुरक्षा लागी चारगो टुकड़ा बना देलन। आउर हरेक टुकड़ा में चारगो सिपाही हल। हेरोदेस चाहऽ हलन कि फसह के परव खतम होवे के बाद पतरस के जेल से बाहरसी निकास के यहूदियन के सामने उनकर न्याय करल जाय। फिन ऊ पतरस के मार डाले के योजना बनईलन।5येहिसे पतरस ढेर दिन तक जेल में रहलन। बाकि यरूशलेम में उनकर कलीसिया के विश्वासी परमेश्वर से दिल आउर मन से प्रार्थना कर रहलन हल कि ऊ पतरस के मदत करतन।6जौन रात हेरोदेस पतरस के जेल से बाहरसी निकास के सभे के सामने मौत के सजा देवे के योजना बनईलन, ओकरा से एक रात पहिले पतरस जेल में दूगो सिपाहियन के बीच में सूतल हलन, आउर उनका दूगो सिकड़ से बाँधल गेल हल। दूगो आउर सिपाही जेल के दुआरी पर पहरा दे रहलन हल।7एकबैग प्रभु परमेश्वर दने से एगो स्वर्गदूत पतरस भीर आके खड़ा होलन आउर उनकर कोठरी में एगो तेज रोशनी चमकल। स्वर्गदूत पतरस के बगल में धक्का देके उनका जगईलन आउर कहलन, "जल्दी उठऽ!" जब पतरस उठ रहलन हल, तऽ उनकर हाथ से सिकड़ खुल गेल। जबकि, सिपाहियन के पता नऽ हल कि का हो रहल हे।8तब स्वर्गदूत उनका से कहलन, "अपन कमर बाँध आउर जूता पेहेन लऽ!" आउर पतरस ओईसहीं करलन। फिन स्वर्गदूत उनका से कहलन, "अपन कपड़ा बाँध आउर हमर पीछे आवऽ!9तब पतरस अपन कपड़ा आउर जूता पेहेनलन, आउर स्वर्गदूत के पीछे-पीछे जेल से बाहरसी निकसलन। बाकि ऊ नऽ जानऽ हलन कि ई सभे जे कुछ सच हो रहल हे, ऊ तऽ सपना देख रहलन हे।10पतरस आउर स्वर्गदूत ऊ पहरदार भीर से गुजरलन जौन दूनो दुआरी पर पहरा दे रहल हल, बाकि पहरदार उनका नऽ देखलन। फिन ऊ लोहा के फाटक भीर पहुँचलन जौन शहर में जा हल। आउर ऊ फाटक अपने खुद खुल गेल आउर पतरस आउर स्वर्गदूत जेल से बाहरसी निकस गेलन। जब ऊ एगो गली में कुछ दूर चल गेलन, तऽ स्वर्गदूत एकबैग गायब हो गेलन।11तब पतरस के महसूस होल कि जौन कुछ उनका साथे होल हल, ऊ कोई दर्शन नऽ हल, बलुक ई सच हल। येहिसे ऊ सोचलन, “अखनी हम सच में जानऽ ही कि प्रभु परमेश्वर हमर मदत करे लागी एगो स्वर्गदूत भेजलन हे। ऊ हमनी के हेरोदेस के योजना से बचईलन हे आउर यहूदी अगुवन के उम्मीद से भी बचईलन हे।”12जब पतरस के महसूस होल कि परमेश्वर उनका बचा लेलन हे, तऽ ऊ मरियम के घरे गेलन। ऊ यूहन्ना के माय हलन, जेकर दोसरा नाम मरकुस हल। ऊहाँ बड़ी मनी विश्वासी जमा होलन हल आउर ऊ प्रार्थना कर रहलन हल कि परमेश्वर कोई तरह से पतरस के मदत करतन।13जब पतरस बाहरसी वाला फाटक दुआरी खटखटईलन, तऽ रूदे नाम के एगो दासी ई जाने ला अईलन कि दुआरी के बाहरसी कौन हे।14जब पतरस उनका उत्तर देलन, तऽ ऊ उनकर आवाज के चिन्ह लेलन, बाकि ऊ एतना खुश आउर उत्साहित हलन कि ऊ फाटक नऽ खोललन! एकर बदले, आउर ऊ घर के अन्दर भाग गेलन आउर दोसरा विश्वासियन के बतईलन कि पतरस दरवाजा के बाहरसी खड़ा हथन।15बाकि ओखनी में से एगो कहलन, "तूँ पागल हऽ!" बाकि ऊ कहते रहल कि येही सच हे। ऊ कहते रहलन, “नऽ, ई पतरस नऽ हो सकऽ हथन। ई हो सकऽ हथन कि स्वर्गदूत हथन।”16बाकि पतरस केमाड़ी खटखटईते रहलन आउर जब कोई खोललन तऽ ऊ देखलन कि ई पतरस हथन आउर ऊ बड़ी हैरान होलन!17पतरस हाथ से इशारा कर के उनका चुप रहे ला कहलन। फिन ऊ उनका बतईलन कि प्रभु परमेश्वर कौन तरह से जेल से बाहरसी निकासलन हे। ऊ ई भी कहलन, “हमर झुण्ड के अगुवा याकूब आउर हमर दोसर साथी विश्वासी के बतावऽ कि का होल हे।” फिन पतरस ऊहाँ से कहीं आउर चल गेलन।18अगला भोरिये के पतरस के ऊपर पहरा दे रहल सिपाहियन बड़ी घबरा गेलन काहेकि ऊ नऽ जानऽ हलन कि उनकर साथे का होल हल।19जब हेरोदेस के ई बात के बारे में पता होल, तऽ ऊ सिपाहियन के पतरस के खोजे ला आज्ञा देलन, बाकि ऊ नऽ मिलल। फिन ऊ ओखनी सभे सिपाहियन के सवाल पूछ-ताछ करलन जौन पतरस के रखवाली कर रहलन हल आउर उनका ले जा के मार डाले के आज्ञा देलन। एकर बाद हेरोदेस यहूदिया प्रान्त से कैसरिया शहर में गेलन आउर ऊहाँ कुछ समय ला रहलन।20ऊ घड़ी राजा हेरोदेस सोरियन आउर सीदोनी शहर में रहे वालन लोगवन से बड़ी नाराज हलन। फिन एक दिन उनकर प्रतिनिधि कुछ लोग हेरोदेस से मिले लागी कैसरिया शहर में अईलन। ऊ हेरोदेस के एगो खास अधिकारी बलास्तुस जे राजा के शयन-कक्ष के प्रधान के राजी करलन कि ऊ हेरोदेस से कहलन कि उनकर शहर के लोग उनका साथे शान्ति करे ला चाहऽ हथन। ऊ हेरोदेस के द्वारा शासित लोगवन के साथे व्यापार करे ला चाहऽ हलन, काहेकि उनका ऊ इलाका से खाना खरीदे के जरुरत हल। 21जौन दिन हेरोदेस उनका से मिले के योजना बनईलन हल, ऊ बड़ी महँगा कपड़ा पेहेनलन, जेकरा से पता चलल कि ऊ राजा हथन। फिन ऊ अपन न्याय-आसन पर बईठलन आउर ऊहाँ जमा होल सभे लोग के घोषणा करलन।22जौन लोग उनकर बात सुन रहलन हल, ऊ चिल्ला के कहे लगलन, "ई आदमी जौन बोल रहलन हे, ऊ कोई इंसान नऽ, बलुक परमेश्वर हथन!"23हेरोदेस लोगवन के परमेश्वर के स्तुति करे के बदले अपन स्तुति करे देलन। येहिसे, तुरन्त प्रभु परमेश्वर के एगो स्वर्गदूत हेरोदेस के बड़ी बेमार कर देलन। आउर बड़ी मनी कीड़ा उनकर आँत के खा गेल। जल्दिये ऊ बड़ी ही दर्दनाक तरह से मर गेल।24आउर विश्वासी लोग जगह-जगह लोगवन के परमेश्वर के संदेश सुनईते रहलन आउर यीशु पर विश्वास करे वालन के गिनती लगातार बढ़ते गेल।25जब बरनबास आउर शाऊल यहूदिया जगह के यहूदी के पईसा से सेवा देवे लागी पहुँचावे ला बंद करलन, तऽ ऊ यरूशलेम से सीरिया के अन्ताकिया नगर में लौट अईलन आउर यूहन्ना के, जौन मरकुस भी कहलावऽ हे, अपना साथे ले गेलन।
Bridge Connectivity Solutions Pvt. Ltd.