2 Corinthians13
1पवित्रशास्त्र कहऽ हे: “एकरा से पहिले कि हम विश्वास कर सकम कि ई बात सच हे, कम से कम दूगो चाहे तीन गो गवाह केकरो बारे में एक ही बात बोलतन।” ई बात जान लऽ कि दोसरका बेरा जखनी हम तोरा से मिले ला आयेम, तऽ ऊ तिसरका बार होत कि जे तूँ कर रहलऽ हे हम ओकर गोवाह बनम। 2जब हम दोसरा बेरा तोहनी से मिले अईली हल, तऽ हम तोहनी सभे के चेता देली हली कि तोहनी के बीच में जेतना पाप करलन हे ओखनी सभे के हम दंड देवे जा रहली हे। आउर अब हम तोहनी से दूर रहते भर में भी तोरा फिनो से चेता रहली हे। जखनी हम तिसरका बेरा तोहनी भीर आयेम, तऽ जेतना पाप करलन हे ओखनी सभे के हम दंड देम।3हम तोरा से ई, येहिगुने कहऽ ही, काहेकि जखनी हम तोरा से बात करली, तऽ तूँ हमरा से ई साबित करे ला माँग करलऽ हल कि मसीह तोहनी से बात करऽ हथन। ई तोहनी के तब पता चलत जखनी ऊ तोहनी के अनुशासित करतन। ऊ तोहनी से कमजोर नऽ होतन एकर अलावे, ऊ तोहनी के बीच में सामर्थी रूप से काम करतन।4तूँ देखऽ हऽ कि जखनी लोग मसीह के क्रूस पर ठोक देलक तऽ अादमी के रूप में ऊ अपने आप के कमजोर होवे देलन। बाकि परमेश्वर तऽ सामर्थी हथन, आउर ऊ मसीह के फिन से जिन्दा कर देलन। जईसन ऊ हलन, ओईसहीं हमहूँ कमजोर अादमी ही। बाकि परमेश्वर हमनियो में भी सामर्थी होके काम करऽ हथन कि हमनी मसीह के जईसन जिन्दा रहम, येहिगुने हम तोहनी के बीच में सामर्थी होके काम करऽ ही।5तोहनी में से सभे के खुद जाँचे के चाही, “का हम मसीह पर विश्वास रखऽ ही आउर जईसन ऊ हमनी के देवल हे ओईसन ही जिनगी बितावऽ ही?” तोहनी में से सभे अादमी ई रीति से अपन जाँच करतन। तऽ तोहनी जान पईवऽ कि तूँ सच में यीशु मसीह के साथे एक होके जिनगी बितावऽ हऽ। बेशक, ई तखनी तक सच हे जखनी ला कि तूँ ई जाँच में असफल नऽ हो जईवऽ।6जहाँ तक हमर आशा हे, हमरा विश्वास हे कि तूँ समझ जईवऽ कि हम ऊ जाँच में सफल होली हे।7हम परमेश्वर से प्रार्थना करऽ ही कि तूँ कोई गन्दा काम नऽ करवऽ। हम एकरा ला प्रार्थना येहिगुने नऽ करऽ ही, काहेकि हम चाहऽ ही कि लोग ई समझ पईतन कि हम तोहनी के अनुशासित करे में सफल होली हे जबकि तूँ खरा काम कर रहलऽ हे। हम तोहनी से येही चाहऽ ही, भले ही एकर मतलब ई रहल होत कि लोग मानतन कि हम येहिगुने असफल हो गेली काहेकि तोहनी के हमर जरुरत नऽ हल।8काहेकि हम चाहऽ ही कि तूँ बढ़ियाँ काम करऽ भले ही हम तोहनी के अनुशासित नऽ करली आउर सामर्थी नऽ जनईली काहेकि हमनी के परमेश्वर के सच्चा संदेश के पालन करे के चाही। हमनी अईसन कुछो भी नऽ कर सकली हे जे परमेश्वर के सच्चा संदेश के उल्टा हे।9जखनी लोग सोचऽ हथन कि हम कमजोर ही तऽ हम येहिगुने खुश होवऽ ही, काहेकि हमरा दने से अनुशासन के जरुरत के बेगर ही तूँ परमेश्वर के आज्ञा माने में मजबूत हऽ। ई ओही बात हे जेकरा लागी हम प्रार्थना करऽ ही, कि तूँ परमेश्वर पर पूरा तरह से विश्वास करे आउर उनकर आज्ञा माने के फईसला ले सकवऽ।10ई चलते हम ई सभे बात बिना मौजूद होके लिखऽ ही, कि जौन अधिकार प्रभु हमरा बनावे लागी हमरा देलऽ हे, आउर ढाहे लागी नऽ, ओकर मुताबिक मौजूद होके तोरा कड़ाई नऽ करम।11हे हमर साथी विश्वासियन, ई अंतिम बात हे जे हम तोहनी से कहे ला चाहऽ ही। मगन रहऽ! ओईसने जिनगी बितावऽ जईसे परमेश्वर चाहऽ हथन कि तूँ जिनगी बितावऽ। जे बात हम तोहनी से कहली हे, ऊ तोहनी के परमेश्वर पर आउर जादे भरोसा करे लागी प्रोत्साहित करतन। खास बात के बारे में एक दोसरा से सहमति रखऽ। एक दोसरा जौरे शान्ति से जिनगी बितावल करऽ। जदि तूँ ई काम करऽ हऽ तऽ परमेश्वर तोहनी जौरे रहतन। ओही हथन जे तोहनी के प्रेम करे आउर दोसरा के जौरे शान्ति से रहे के लायक बनावऽ हथन।12एक-दोसर के पवित्र नमस्कार करऽ जे ऊ लोग लागी उपयुक्त होवे जे परमेश्वर के परिवार के सदस्य हथन।13प्रभु यीशु मसीह तोरा प्रति दयालु होके काम करतन, परमेश्वर तोरा से प्रेम रखतन, आउर पवित्र आत्मा तोरा साथे सहभागी बनल रहतन, आउर तोहनी सभे के एक जौरे जोड़तन।14परमेश्वर के सभे लोग ईहाँ तोरा शुभकामना भेजऽ हथन।
Bridge Connectivity Solutions Pvt. Ltd.