2 Corinthians1
1हम, पौलुस, तोहनी के ई चिट्ठी लिख रहली हे आउर हमर साथी विश्वासी, तीमुथियुस, हमरा जौरे ही हथन। परमेश्वर हमरा चुन के यीशु मसीह के प्रेरिताई करे लागी येहिगुने भेजलन, काहेकि परमेश्वर एही चाहऽ हलन। हम ई चिट्ठी तोरा मतलब कि ऊ लोगवन के भेजऽ ही जौन परमेश्वर पर विश्वास करे वाला ऊ कलीसिया के हिस्सा हथन जे कुरिन्थुस नगर में पावल जा हे। हम ई चिट्ठी ऊ सभे विश्वास करे वालन लोगवन के भी भेजऽ ही जे समूचे अखाया प्रान्त में रहे वाला पवित्र लोगवन के नाम। 2परमेश्वर जे हमनी के पिता भी हथन, आउर प्रभु यीशु मसीह तोहनी पर अपन दया बनईले रखतन आउर तोहनी के शान्ति प्रदान करतन।3हम अपन प्रभु यीशु मसीह के परमेश्वर आउर पिता के बड़ाई हमेशा करते रहऽ काहेकि ओही हमनी के हमेशा शान्ति प्रदान करे वाला दयालु पिता आउर हमनी के परमेश्वर हथन।4जखनी हम दुःख में पड़ऽ ही ऊ घड़ी परमेश्वर हमरा शान्ति देवऽ हथन। ऊ अईसन येहिगुने करऽ हथन जेकरा से हमनियो ऊ आदमियन के शान्ति दे सकम जे कोई रीति से दुःख भोग रहलन हे। जईसे परमेश्वर हमनी के शान्ति देवऽ हथन ओईसने रीति से ऊ हमनी के ऊ आदमियन के शान्ति देवे के लायक बनावऽ हथन।5तोहनी देख लऽ, कि मसीह हमनी लागी बड़ी दुःख उठईलन, आउर अखनी काहेकि हमनी मसीह के ही येहिगुने हम भी उनकर जईसन दुःख उठावऽ ही। बाकि मसीह भी हमनी के ओही असीम शान्ति प्रदान हथन।6येहिगुने जखनी लोगवन हमनी के सतावऽ हे, तऽ अईसन येहिगुने होवऽ हे ताकि परमेश्वर तोरा शान्ति आउर उद्धार देतन आउर आत्मिक रूप से तोहनी के रक्षा करतन। जखनी परमेश्वर हमरा शान्ति देवऽ हथन, तऽ अईसन येहिगुने होवऽ हे ताकि ऊ तोहनी के भी शान्ति देतन। जईसे लोगवन हमरा सतावऽ हे ओईसहीं जखनी ऊ तोरा भी सतावऽ हे तऽ तोरा धीरज के साथे सह लेवे के चलते परमेश्वर अईसन करऽ हथन।7आउर हमर आशा तोर बारे में दृढ़ हे, ई जानऽ ही कि जईसे तूँ दु:खवन में सहभागी हो, ओईसहीं शान्ति में भी सहभागी हऽ।8हे साथी विश्वासियन, उदाहरण लागी हम चाहऽ ही कि तूँ ऊ बुरा बात के जान लऽ जे हमरा जौरे आसिया प्रान्त में घटल हल। ऊ बात एतना मुश्किल हल कि हमरा अईसन लगल मानऽ हमर सहन के सामर्थ से बाहर हे। हमरा अईसन पक्का महसूस होल कि हम अब जीवित नऽ रहम। 9हमरा ऊ अादमी के जईसन महसूस होल जे न्यायाधीश के ई कहते सुन लेलक हे, कि “हम तोरा मौत के सजा दे रहली हे।” बाकि परमेश्वर हमरा ऊ रीति से येहिगुने महसूस करवईलन जेकरा से हम खुद पर नऽ, बाकि एकर बदले परमेश्वर पर भरोसा करे ला सिखियई। ऊ मरल आदमियन के फिनो से जिलावऽ हथन।10भले हमरा अईसन लगल कि हम जरुर मर जायेम, तईयो परमेश्वर हमरा ऊ आदमियन से बचईलन जे हमरा मार देवे लागी चाहऽ हल, आउर परमेश्वर हमरा अईसन आदमियन से लगातार बचईते रहतन, हम भरोसा के साथे ई आशा करऽ ही कि ऊ हमरा फिनो से बचईतन।11जखनी तूँ हमरा लागी प्रार्थना करे के द्वारा हमर मदत करऽ हऽ। कृपा कर के हमर लागी प्रार्थना करते रहऽ ताकि ढेरमनी अादमी ऊ वरदान लागी परमेश्वर के धन्यवाद करतन जेकरा से ऊ अनुग्रहकारी होके हमनी लागी येहिगुने करतन काहेकि बड़ी मनी लोग हमरा लागी प्रार्थना करलन हल।12हमरा अपन विवेक के ई गवाही पर घमण्ड हे कि हम ईमानदारी के साथे ई कह सकऽ ही कि जईसन करे लागी परमेश्वर हमरा सक्षम करलन हे ओही रीति से हम संसार के साथे पवित्रता आउर सच्चाई के साथे बर्ताव करली। हम शारीरिक ज्ञान से बर्ताव नऽ करऽ ही जेकरा अविश्वासी लोगवन बुद्धिमानी मानऽ हे। बदले एकर, जखनी हम तोरा से बातचीत करऽ ही, तऽ ऊ घड़ी खास रूप से परमेश्वर के अनुग्रह हे कि हमरा मार्गदर्शन करऽ हथन।13ई बात के देखे लागी, हमर चिट्ठियन पर धियान दऽ। तोरा भेजल हमर समूचे चिट्ठी में खाली ऊ बात ही लिख रहली हे जेकरा तूँ आसानी से पढ़ आउर समझ सकऽ हऽ। हमरा आशा हे कि जल्दी ही तूँ हमरा भी पूरा रीति से समझवऽ,14जईसे तूँ हमरा पहिले से ही तनिसा समझऽ हऽ। जखनी हमनी के प्रभु यीशु फिन से अईतन, तऽ जईसे हम तोरा पर घमण्ड करऽ ही, ओईसहीं तूँ भी हमरा पर घमण्ड करवऽ।15काहेकि हमरा भरोसा हे कि तोहनी हमरा पर घमण्ड करऽ हऽ, येहिगुने एक बार हम मकिदुनिया प्रान्त जईते घड़ी तोरा से मिले ला, आउर ऊहाँ से लौटे घड़ी फिनो तोरा से मिले ला योजना बनईली कि तोरा पर फिन अनुग्रह होवे। ई रीति से, तूँ हमरा साथे रहे के दू बेरा फईदा मिलत। एकर अलावे, हमरा तोर नगर से यहूदिया प्रान्त तक जाय लागी जे कुछ भी चाही, ओकरा पा लेवे में तूँ सहायता कर सकऽ हऽ।17येहिसे ई सोच के हम चंचलता देखईली तऽ नऽ कि चाहे जौन हम चाहऽ ही, का हम देह के मुताबिक चाहऽ ही, कि हमरा साथे “हाँ, हाँ” आउर “नऽ, नऽ” होवे।18जईसे परमेश्वर विश्वासयोग्य हथन, ओईसहीं जे कुछ हम तोहनी से कहऽ ही ओकरा में हम भी पूरा रीति से विश्वासयोग्य ही। जखनी हमर विचार “नऽ” होत, तऽ हम “हाँ” कहियो नऽ कहम।19हम आउर सिलवानुस आउर तीमुथियुस तोरा परमेश्वर के बेटा यीशु मसीह के बारे में प्रचार करली। तूँ जानऽ हऽ कि जदि उनकर कहे के मतलब “नऽ” हे तऽ ऊहाँ कहियो नऽ कहतन। जे ऊ हथन, ओकरा चलते ओकर बारे हमर संदेश भी सुसंगत आउर भरोसेमंद बनल गेल हे। 20यीशु के चलते हम परमेश्वर के समूचे प्रतिज्ञा पर भरोसा कर सकऽ ही। यीशु ऊ सभे प्रतिज्ञा के पूरा करऽ हथन। येहिगुने, यीशु ही ऊ जन हथन जे हमरा परमेश्वर के बड़ाई करे घड़ी ई कहे में सक्षम बनावऽ हे कि “हाँ” ई सच हे।21ऊ परमेश्वर ही हथन जे तोहनी के साथे-साथे हमरा भी मजबूती मसीह पर भरोसा करे लागी प्रेरित करऽ हथन। परमेश्वर ऊ जन भी हथन जे हमरा अभिषेक येहिगुने करलन हे ताकि हमनी उनकर सेवा कर सकम।22परमेश्वर हमरा साथ आउर मन रहे लागी पवित्र आत्मा के छाप देलन हे। एकरा से ई दूनो बात प्रकट होवऽ हे कि हम उनकर ही आउर ई कि परमेश्वर हमनी लागी ऊ सभे बात के भी करतन जे ऊ हमनी लागी करे के प्रतिज्ञा करलन हे।23येहिगुने, अखनी हम तोहनी के बतायेम कि हम अपन मन काहे बदलली आउर तोहनी से दूबारा मिले नऽ अईली जईसन हम मनसा करली हल। जदि हम झूठ बोलम तऽ परमेश्वर हमरा मार देतन, काहेकि ऊ जानऽ हथन कि जे हम तोरा से पुकार के कह रहली हे ऊ गवाह हे। हम कुरिन्थुस शहर में नऽ लौटम एकर कारण ई हे कि तोहनी द्वारा करल गेल गलत काम के बारे में तोरा गंभीर रूप से बात कर के तोरा दुःखी नऽ कर देम।24जखनी हम अईसन करऽ ही, तऽ हमर मतलब ई नऽ हे कि हम तोहनी के मालिक ही जे तोहनी के ई बारे में आदेश दे ही कि ई बात पर विश्वास करऽ आउर का करवऽ। बदले एकर, जे कुछ भी हम तोरा परमेश्वर लागी जिनगी बितावे के बारे में बतावऽ ही, ऊ येहिगुने हे कि तोहनी आनन्द में सहकर्मी हो जा। हमरा तोहनी के आज्ञा देवे के जरुरत येहिगुने नऽ हे, काहेकि कि परमेश्वर खुद तोहनी के बतावऽ हथन कि कौन बात पर विश्वास करे ला हे आउर का करे ला हे।
Bridge Connectivity Solutions Pvt. Ltd.