1 Corinthians4
1हम चाहऽ ही कि लोग हमरा ऊ समझतन जे शुभ संदेश के प्रचार करऽ हथन मतलब कि ऊ लोग जे मसीह के सेवक हथन आउर ऊ बात के प्रचार करे वाला भण्डारी हथन जे परमेश्वर के छिपल सच्चाई अखनी हमनी पर परकट करलन हे।2जखनी कोई अगुवा कोई दोसरा आदमी के भण्डारी बनावऽ हथन, तऽ ऊ अगुवा ऊ आदमी से अपन काम के विश्वासयोग्यता से करे के उम्मीद करऽ हथन। ओही रीति से, परमेश्वर भी चाहऽ हथन कि हम जे शुभ संदेश के प्रचार करऽ ही, अपन काम विश्वासयोग्यता से करूँ।3हम ई बात के चिंता नऽ करऽ ही कि तूँ चाहे कोई दोसरा मानवीय अधिकारी कौची जाँच हथन ई बारे में कि हम विश्वासयोग्यता से काम करली हे कि नऽ। सचमुच में, हम ई बात के भी फिकिर नऽ करऽ ही कि हम खुद कौची फईसला लेवऽ ही ई बारे में कि हम विश्वासयोग्यता से करली हे कि नऽ।4सचमुच में, हम जे कुछ भी गलत करली हे, ओकर बारे में हम नऽ जानऽ ही। बाकि, जे हम अपन बारे में जानऽ ही ऊ ई साबित नऽ करऽ हे कि हम धर्मी काम करली हे कि नऽ ऊ प्रभु ही हथन जे जाँच हथन कि हम विश्वासयोग्यता से काम करली हे कि, नऽ।5येहिगुने फिन, जखनी तक प्रभु सभे लोगवन के आउर सभे बात के न्याय करे लागी वापस नऽ आ जईतन, तखनी तक तोहनी के कोई बात के बारे में अपन मन में अंतिम फईसला नऽ लेवे के चाही। जे अखनी छिपल हे ओकरा ओही साफ करतन आउर ऊ हर एक जन पर ऊ बात के परकट करतन जे सभे आदमियन चाहऽ हथन आउर जेकर योजना बनावऽ हथन। ऊ घड़ी परमेश्वर ऊ सभे आदमी के बड़ाई करतन जे विश्वासयोग्यता से काम करलन हे।6हे हमर साथी विश्वासियन, हम तोहनिये के फायदा लागी अपना आउर अपुल्लोस के बारे में ई तरीका से बात करली हे। हम चाहऽ ही कि तूँ हमर उदाहरण से सिखऽ कि तोरा खाली ऊ तरीका से ही काम करे के चाही जे पवित्रशास्त्र के लेखक लिखलन हे। ऊ घड़ी, कोई एगो अगुवा के बारे में अच्छा बात आउर दोसरा अगुवा के बारे में बुरा बात नऽ करतन।7कोई भी तोरा हर दोसरा विश्वासी से भेद नऽ करलन हे। सच में, जे तोरा भीर हे ऊ सभे कुछ परमेश्वर तोरा देलन हे। कि ई चिजवन परमेश्वर के ओर से वरदान हे, येहिगुने तोरा घमण्ड के जौरे नऽ करे के चाही कि तूँ खुद उनका प्राप्त कईले हऽ।8तूँ तऽ अईसन अभिनय कर रहलऽ हे कि मानऽ वर्तमान में तोरा भीर ऊ सभे कुछ हे जेकरा तोरा आत्मिक रूप से जरुरत हे। तूँ तऽ अईसे अभिनय कर रहलऽ हे कि मानऽ तूँ वर्तमान में मसीह के जौरे शासन करे ला शुरु कर देलऽ हे, भले ही हम जे शुभ समाचार के प्रचार करऽ ही अखनी मसीह के जौरे शासन नऽ कर रहली हे। सचमुच हम चाहऽ ही कि तूँ सच में उनका जौरे शासन करऽ ताकि हम जे शुभ समाचार के प्रचार करऽ ही तोरा जौरे शासन कर सकम।9ई सोचे के बजाय कि हमनी अखनी मसीह के जौरे शासन कर रहली हे, हम हमनी प्रेरितवन के अईसन आदमी मानऽ ही, जिनका परमेश्वर अपमान सहे आउर मरे लागी ठहरईलन हे। हम सार्वजनिक रूप से अपमान सहऽ ही आउर मर जा ही, आउर जे कुछ परमेश्वर संसार में बनईलन हे, जिनका में स्वर्गदूत आउर आदमी भी शामिल हे, हमरा देख सकलन हे।10हम मूरख आदमी येहिगुने देखाई दे ही काहेकि हम मसीह के सेवा करऽ ही, बाकि तूँ सोचऽ हऽ कि तूँ बुद्धिमान लोग येहिगुने हऽ काहेकि परमेश्वर तोरा मसीह के जौरे एकजूट करऽ हथन। हम अईसन लोग देखाई दे ही जिनका भीर शक्ति चाहे प्रभाव नऽ हे, बाकि तोरा लगऽ हे कि तोहनी भीर ई चिजवन हे। तोरा लगऽ हे कि लोग तोहनी के आदर करऽ हथन, बाकि ओही लोग हमनी के अनादर करऽ हथन।11अखनी जबकि हम ई चिट्ठी तोहनी के लिखऽ ही, हम जेकरा मसीह भेजलन हे हमेशा भरपूर खाना नऽ खईलन हे आउर नऽ पानी पियली हे। हम फटल पुराना कपड़ा पेहनऽ ही, आउर दोसरा लोग हमनी पर बार-बार प्रहार करऽ हथन। हम लगातार यात्रा करऽ ही आउर घरे नऽ लौटे ही। 12हम रोजी-रोटी कमाय लागी देह से मेहनत करऽ ही। जखनी लोग हमरा से बुरा बात बोलऽ हथन तऽ हम ओखनी के बारे में आशीष के बात बोलऽ ही। जखनी आदमियन हमरा चोट पहुँचावऽ हथन येहिगुने काहेकि हमनी मसीह के सेवा करऽ ही, तऽ हमनी धीरज से एकरा में होके जिनगी बितावऽ ही।13जखनी लोग हमरा बारे में बुरा बात बोलऽ हथन, तऽ हम उनका हौसला बढ़ावे वाला बात बोलऽ ही। मानवीय नजरिया से, हम संसार के गन्दा कचरा के जईसन बेकार ही जेकरा कोई फेंक दे हे। ई सभे बात हमनी के बारे में सच हे ई घड़ी भी जखनी हम तोहनी के ई चिट्ठी लिखऽ ही।14जे कुछ हम अखनी कहे लागी खतम करली हे ओकरा हम अपन चिट्ठी में येहिगुने शामिल नऽ करऽ ही काहेकि हम तोरा लज्जित करे ला चाहऽ ही। बलुक, हम ई बात के येहिगुने शामिल करऽ ही काहेकि हम तोरा चेतौनी देवे ला चाहऽ ही, काहेकि तूँ हमर अपन लईकवन के जईसन हऽ, जेकरा से हम प्रेम करऽ ही।15जखनी हम सभे से पहिले तोरा शुभ समाचार सुनईली, आउर परमेश्वर तोहनी के यीशु मसीह के जौरे एकजूट कर देलन हे, तऽ हम तोर आत्मिक पिता बन गेली। येहिगुने, भले ही तोहनी के लाखो गुरु रहलन होत जे तोहनी के मसीह के जौरे मिल के रहे में मदत करलन होत, तईयो भी हम तोहर खाली एक्केगो आत्मिक पिता रहम।16काहेकि हम तोहर आत्मिक पिता ही येहिगुने, हम तोरा से विनती करऽ ही कि जईसे हम जिनगी जीयऽ ही तूँ ओकर अनुशरण करऽ।17काहेकि हम चाहऽ ही कि तूँ हमर अनुशरण करऽ येहिगुने, हम तीमुथियुस के तोरा भीर भेजली। ऊ हमर अपन बच्चा के जईसन हे आउर हम ओकरा से प्रेम करऽ ही। ऊ विश्वासयोग्यता से ऊ अादमी के जईसन मसीह के सेवा करऽ हे जेकरा परमेश्वर प्रभु के जौरे एकजूट करलन हे। ऊ तोरा फिन से सिखईतन कि हमनी कईसे ऊ आदमी के साथ व्यवहार करऽ ही जेकरा परमेश्वर यीशु मसीह के साथ एक जगह करलन हे। हम सभे जगह सभे कलीसिया के जेकरा में हम जा ही निर्देश दे ही कि ई तरीका से व्यवहार करऽ।18तोहनी में से कुछ लोग तोरा बारे में बड़का-बड़का बात कहऽ रहलन हे। ई लोग अईसन व्यवहार करऽ हथन कि मानऽ हम तोरा से फिन मिले ला आवे वाला नऽ हली।19जबकि, हम बड़ी जल्दी ही तोहनी से मिले आयेम, जखनी तक कि हमर अईसन करे के प्रभु के इच्छा होत। हमरा पहिले से ही पता हे कि ई लोग अपन बारे में बड़का-बड़का बात कहऽ हथन, ऊ का दावा करऽ हथन। जखनी हम तोरा से मिले ला आयेम तखनी हम जानम कि ऊ सचमुच में सामर्थी हथन कि नऽ।20हम ई येहिगुने करम काहेकि परमेश्वर के राज परमेश्वर के शक्ति के जरिये काम करऽ हे, जे लोगवन के जरिये सामर्थी रूप से काम कर हथन, नऽ कि लोगवन के जरिये बड़का-बड़का बात कहे के द्वारा।21जखनी तूँ चुनाव करऽ हऽ कि हम जे कहऽ रहली हे ओकरा पर तूँ कईसन जबाब देवऽ, तऽ तूँ ई चुनाव भी कर रहलऽ हे कि जखनी हम मिले ला आयेम तऽ हम कईसे काम करम। जखनी हम तोरा से मिले ला आयेम, तऽ चाहे तऽ हम तोरा छड़ी से अनुशासित कर सकली हे येहिगुने काहेकि तूँ सुनलऽ नऽ, चाहे हम नम्र होके आउर प्रेम से आत्मा के साथे काम कर सकली हे येहिगुने तूँ सुन लेलऽ हे।
Bridge Connectivity Solutions Pvt. Ltd.