1 Corinthians13
1सोचऽ कि हम कोई मानवीय आउर स्वर्गदूतवन के भाषा बोल सकली हे, बाकि हम दोसरा से प्रेम नऽ करऽ ही। तऽ हम बड़ी हल्ला करे वाला, एगो जोर आवाज में पीतल के बजे वाला झाँझ के जईसन तऽ रहम, बाकि हम कोई के मदत नऽ कर पायेम।2फिनो से, जला विचार करऽ कि हम परमेश्वर द्वारा कहल गेल वचन के प्रचार कर सकली हे, कि हम सभे कुछ भेद भरल बात के समझ आउर जान सकली हे। आउर ई कि हमरा एतना विश्वास होवे कि हम पहाड़ के जगह बदल सकली हे। बाकि फिन से विचार करऽ कि हम दोसरा से प्रेम नऽ कर ही। ई वजह से हमर आउर कुछ भी मोल नऽ हे।3एक बार फिनो से, विचार करऽ कि हम अपन सभे कुछ ऊ लोगवन के दान में दे देली जिनका खाना के जरुरत हल जौन गरीब हल, आउर ई हम अपन देह के रक्षा नऽ करली, जेकर नतीजा लोग हमर इज्जत करतन। बाकि एकर बाद विचार करऽ कि हम दोसरा से प्रेम नऽ कर ही। काहेकि हम दोसरा से प्रेम नऽ कर ही, येहिगुने हमरा द्वारा करल गेल काम में से कुछ भी हमर मदत नऽ करत।4जे दोसरा से प्रेम करऽ हथन ऊ धीरज से इंतजार करऽ हथन आउर दया से काम करऽ हथन। ओखनी नऽ चाहऽ हथन कि दोसरा लोग ऊ निमन चिजवन के गवाँ देतन जे उनका भीर हे। ऊ अपना बारे में बड़का-बड़का डिंग नऽ हाँकऽ हथन चाहे अईसे काम नऽ करऽ हथन जईसे कि ऊ महान अादमी हथन।5ऊ दोसरा के अपमानित नऽ करऽ हथन। ऊ खाली अपन चिंता नऽ करऽ हथन। ऊ तुरन्त क्रोधित नऽ होवऽ हथन ऊ ई बात पर धियान नऽ हथन कि दोसरा कौची गलत काम करलन हे।6जखनी आदमी अन्यायपूर्ण काम करऽ हथन तऽ ऊ खुशी नऽ मनावऽ हथन। बजाय एकर, ऊ सच बात में खुशी मनावऽ हथन।7ऊ हमेशा दोसरा के साथ रहऽ हथन। ऊ हमेशा विश्वास करऽ हथन कि परमेश्वर ओही करतन जे बढ़ियाँ हे, आउर ऊ हमेशा उम्मीद रखऽ हथन कि परमेश्वर ओही करतन जेकरा ऊ वादा करलन हे। जखनी बुरा बात घटित होवऽ हे तऽ ओखनी हमेशा डटल रह हथन।8जे दोसरा से प्रेम करऽ हथन ऊ प्रेम करे ला कहियो बंद नऽ करऽ हथन। जबकि, कोई दिन आदमी परमेश्वर द्वारा कहल गेल वचन के प्रचार नऽ करतन। कोई दिन लोग अन्य भाषा बोले ला बंद कर देतन। कोई दिन, लोग खास बात के नऽ जानते होतन।9ई बात अभी घटित येहिगुने नऽ होत, काहेकि हम खास बात के पूरा तौर से नऽ जानऽ ही, आउर परमेश्वर जे कहऽ हथन हम भविष्यद्वाणी पूरा-पूरा नऽ करऽ ही।10येहिगुने, जे पूरा हथन उनकर अनुभव हम तखनी करम जखनी यीशु वापस अईतन, ऊ समय जे अधूरा हे ओकर कोई मोल नऽ रहतक।11ईहाँ एगो समानता हे जहिया हम जरिगो हली, तहिया हम लईकवन के जईसन काम करऽ हली। हम लईकवन के जईसन फईसला ले हली, लईकवन के जईसन सोचऽ हली। बाकि जहिया हम बड़ा होली तऽ हम लईकवन के जईसन नकल करे ला बंद कर देली।12ई समय, हम परमेश्वर के छिपल रूप में अईसे देखऽ ही, जईसे कि हम आईना में परछाहीं देखली हे। बाकि, जब यीशु वापस अईतन, तब हमनी परमेश्वर के आमने सामने देखम। ई समय, हम परमेश्वर के पूरा तौर से नऽ जानऽ ही। काहेकि, जहिया यीशु वापस अईतन, तहिया हम परमेश्वर के ओतना ही जानम जेतना परमेश्वर हमरा पूरा जानऽ हथन।13अंतिम में, तीनगो बात हे जे हमनी हमेशा करते रहम। हमनी मसीह पर विश्वास करम, आउर परमेश्वर जेकर वादा करलन हे ओकरा ऊ करतन ई बात के पूरा विश्वास के साथे आशा करम, आउर परमेश्वर आउर दोसरा आदमी से प्रेम करम। जबकि ई तीनगो बात में परमेश्वर आउर दोसरा लोगवन से प्रेम करे ला सभे से महत्वपूर्ण हे।
Bridge Connectivity Solutions Pvt. Ltd.