1 Corinthians1
1हम, पौलुस, मसीह के इच्छा से प्रेरित ई चिट्ठी तोहनी के लिखऽ ही, आउर हमनी के साथी मसीह विश्वासी भाई सोस्थिनेस हमरा जौरे हथन। परमेश्वर हमरा येहिगुने चुनलन जेकरा से यीशु मसीह के अगुवाई करे लागी भेजतन, काहेकि परमेश्वर येही चाहऽ हलन। 2हम ई चिट्ठी तोरा भेजऽ ही जे परमेश्वर के विश्वासियन के ऊ झुण्डवन के हिस्सा हथन, जे कुरिन्थुस शहर में पावल जा हथन हऽ। परमेश्वर तोरा यीशु मसीह के जौरे एक जगह कर के अपना लागी अलग कर देलन हे, आउर ऊ तोरा उनकर अादमी होवे लागी चुन लेलन हे। तूँ विश्वासियन के ऊ झुण्ड के भाग हऽ जे केतना देश आउर शहर में हमनी के प्रभु यीशु मसीह के नाम पुकार हथन आउर आराधना करऽ हथन। यीशु मसीह उनकर भी प्रभु हथन आउर हमनी के भी प्रभु हथन।3परमेश्वर, जे हमनी के पिता हथन, आउर प्रभु यीशु मसीह तोरा पर दया करते रहतन आउर तोरा शान्ति देतन।4हम हमेशा तोहनी के बारे में अपन परमेश्वर के धन्यवाद करऽ ही। हम अईसन येहिगुने करऽ ही काहेकि हम जानऽ ही कि कईसे परमेश्वर तोरा यीशु मसीह के जौरे एक जगह कर के तोहनी के प्रति दयालु होके काम कर रहलन हे।5जब हम कहऽ ही कि परमेश्वर तोहनी पर दयालु होके काम करलऽ हे, तऽ हमर मतलब हे कि ऊ तोरा तोहर जिनगी के सभे क्षेत्र में मसीह के साथे एक जगह कर के तोहनी के भरपूर आशीष देलन हे, जेकरा में जे कुछो भी तूँ कहऽ हऽ आउर जे कुछो भी तूँ जानऽ हऽ ऊ भी शामिल हे।6परमेश्वर तोहनी के आशीष येहिगुने देलन हे काहेकि ऊ तोरा पर ई गवाही कर देलन हे कि जे बात हम तोरा मसीह के बारे में बतईली हल ऊ सच हल।7परमेश्वर तोहनी लागी ई कामवन के येहिगुने करलन हे ताकि तूँ पूरा रीति से ई घड़ी के दौरान आत्मिक रूप वरदान से सुसज्जित हो जा जखनी तूँ विश्वास के साथ हमनी के प्रभु यीशु मसीह के लौटे के आशा करऽ हऽ। 8जईसे मसीह हमनी के संदेश के सच साबित कर देलन हे, ओईसहीं परमेश्वर तोहनी के भरोसा के भी मसीह में सच साबित करतन जब ला तोहनी के सांसारिक जिनगी खतम नऽ हो जा हे। ई कारण से, जब हमनी के प्रभु यीशु मसीह धरती पर वापस अईतन तऽ ऊ तोरा बेकसूर ठहरईतन।9परमेश्वर हमेशा विश्वासयोग्य ओही करऽ हथन जेकरा ऊ वादा करऽ हथन, आउर ओही हथन जे तोरा उनकर बेटा, हमनी के प्रभु, यीशु मसीह के संगति के साथ सभे कुछ साझा करे लागी खास रूप से चुनलन हे। 10हे हमर साथी मसीह विश्वासियन, तूँ जिनका हमर प्रभु यीशु मसीह के नाम में अधिकार देलन हे, हम तोरा से ई कह के विनती करऽ ही कि तोहनी सभे एक दोसरा से सहमत रहऽ। तूँ विरोधी समूहवन में बँट मत जा, बाकि तूँ जे सोचऽ हऽ ओकरा में सहमत होवे के द्वारा आउर जे तूँ करे लागी फईसला ले हऽ, ओकरा पर सहमत होवे के द्वारा तूँ एक दोसरा के जौरे मेल मिलाप करऽ।11हे हमर साथी मसीह विश्वासियन, हम तोरा से येहिगुने निवेदन करऽ ही काहेकि खलोए के घरे वालन कुछ सदस्यवन हमरा से तोहर बारे में बात करलन हे। ओखनी कहलन कि तोहनी आपस में झगड़ऽ हऽ।12हम जेकरा बारे में बात कर रहली हे ऊ ई हे कि उदाहरण लागी, तोहनी में से केतना लोग दावा करऽ हऽ कि तूँ पौलुस के झुण्ड वाला हऽ, चाहे तूँ अपुल्लोस के झुण्ड वाला हऽ, चाहे तूँ कैफा के झुण्ड वाला हऽ, चाहे तूँ मसीह के झुण्ड वाला हऽ। 13कोई भी मसीह के टुकड़ा में नऽ बाँटलन हे, येहिगुने तोहनियो के भी टुकड़ा में नऽ बँटे के चाही। कोई तोरा लागी पौलुस के क्रूस पर नऽ चढ़ईलन, आउर कोई तोरा बपतिस्मा पौलुस नाम पर नऽ देलन हे कि तूँ पूरा पौलुस के हो जा।14हम परमेश्वर के धन्यवाद करऽ ही कि हम दूगो आदमी: क्रिस्पुस आउर गयुस के छोड़ के तोहर झुण्ड के कोई भी अादमी के बपतिस्मा नऽ देली।15काहेकि हम तोहनी में से कुछ लोगवन के ही बपतिस्मा देली हे, येहिगुने कोई भी आदमी ई दावा करे के लायक नऽ हथन कि हम तोरा बपतिस्मा अपन नाम पर देली हे येहिगुने तूँ हमर झुण्ड वाला हऽ।16अरे हाँ, हमरा याद हे कि हम स्तिफनास के घर में रहे वालन के भी बपतिस्मा देली हे। एकर अलावे, हमरा नऽ लगऽ हे कि हम तोहर झुण्ड में कोई दोसरा आदमी के बपतिस्मा देली हे।17हम तोहनी में से कुछ लोग के बपतिस्मा देली एकर कारण ई हे कि मसीह हमरा लोगवन के बपतिस्मा देवे लागी नऽ बोलईलन हे। एकर बदले, ऊ हमरा शुभ संदेश सुनावे के आदेश देलन हे। आउर हम ई ऊ बात के इस्तेमाल कईले बिना करऽ ही जे मानवीय मानक के मुताबिक बुद्धिमानी के बात हे। ई रीति से, हम क्रूस पर मरे वाला मसीह के संदेश के सामर्थ के बेकार नऽ करऽ ही।18हम बुद्धिमानी के बात के इस्तेमाल येहिगुने नऽ करऽ ही, काहेकि जे संदेश हम क्रूस पर मसीह के मौत के बारे में सुनावऽ ही, ऊ, ऊ लोगवन के मूर्खता लगऽ हे जे खुद पर विनाश ला रहल हे। येहिगुने, परमेश्वर ई संदेश में होके सामर्थी रूप से हमनी लागी जिनका ऊ बचा रहलन हे काम करऽ हथन।19तूँ भी बता सकलऽ हे कि ई सच हे, काहेकि भविष्यद्वक्ता यशायाह लिखलन हे, “जे बुद्धिमानी के बात बुद्धिमान लोग सोचऽ हथन, हम ओकरा नाकाम कर देम, आउर जे बात के समझदार लोग बेकार मानऽ हथन हम ओकरा समझदारी के बात बना देम।”20तऽ फिन, ज्ञानवान लोग सही में ज्ञानवान नऽ होवऽ हथन, आउर विद्वान सच में शास्त्री नऽ होवऽ हथन, आउर जे लोग तर्कवादी होवऽ हथन ऊ सचमुच में एकरा में निमन नऽ होवऽ हथन, काहेकि ऊ सभे मौजूद सांसारिक प्रणाली से जुड़ल होवऽ हथन। सचमुच में, परमेश्वर ई परकट करलन हे कि ई मौजूद दुनियाँ में जे बुद्धिमानी के बात लगऽ हे ऊ बुद्धिमानी के बात एकदम नऽ हे। 21ईहाँ बतावल गेल हे कि परमेश्वर ई कईसे करलन। जईसे परमेश्वर बुद्धिमानी से चुनाव करलन, ओईसहीं संसार अपन बुद्धिमानी के सोच से परमेश्वर के नऽ जानलन। येहिगुने, परमेश्वर ऊ लोगवन के बचावे के फईसला लेलन, जे ऊ मूरख संदेश के जरिये से मसीह पर विश्वास करऽ हथन, जेकरा विश्वासी लोग सुनावऽ हथन।22एक तरफ, बड़ी मनी यहूदी लोग चिन्ह काम देखे लागी चाहऽ हथन। दोसरा तरफ, ढेर यूनानी लोग बुद्धिमानी सोच के खोज करऽ हथन।23जबकि, हमनी ई प्रचार करऽ ही कि मसीह क्रूस पर मरलन। बड़ी मनी यहूदी लोग ई संदेश के ठोकर के कारण समझऽ हथन, आउर बड़ी मनी अन्यजाति लोग सोचऽ हथन कि ई संदेश मूर्खता हे।24जबकि, हम जिनका परमेश्वर चुनलन हे, चाहे हमनी यहूदी लोग ही चाहे यूनानी लोग, हमनी सिखली हे कि परमेश्वर मसीह के बारे में ई संदेश के जरिये सामर्थी रूप से आउर बुद्धिमानी से काम करऽ हथन।25अईसन येहिगुने हे काहेकि परमेश्वर जे करऽ हथन ऊ मूर्खता लगऽ हे, बाकि ऊ आदमी जे कुछ भी करऽ हथन ओकर तुलना में बड़ी बुद्धिमानी हे, आउर परमेश्वर जे करऽ हथन ऊ कमजोर लगऽ हे, बाकि ऊ आदमी जे कुछ भी करऽ हथन ओकर तुलना में बड़ी तागतवर हे।26परमेश्वर द्वारा बोलावल गेल हे साथी विश्वासियन, सबूत लागी कि ई अईसने हे, ई बात के बारे में विचार करऽ कि परमेश्वर तोरा ओईसहीं चुनलन हे जईसन तूँ हऽ। देह के मुताबिक से तोहनी में से ज्यादातर बुद्धिमानी से विचार नऽ करलन, शक्तिशाली काम नऽ करलन चाहे खास परिवर्तन से सम्बन्धित नऽ हऽ।27बजाय एकर, परमेश्वर संसार के आदमियन के जे बात मूर्खता लगऽ हे परमेश्वर ओकरा ही काम में लावे ला चुन लेलन ताकि ऊ लोगवन के आउर नम्र बनईतन जे बुद्धिमानी से सोचऽ हथन। आदमियन के जे बात कमजोर लगऽ हे परमेश्वर ओकरा काम में लावे लागी फईसला लेलन ताकि ऊ लोगवन के आउर चिजवन के विनम्र बनईतन जे तागतवर रूप से काम करऽ हे।28परमेश्वर ओकरे काम में लावे ला चुन लेलन, जे बात दुनियाँ के बेकार लगऽ हे आउर जेकरा लोग छोटा समझऽ हथन। ई अईसन हे कि जईसे ई चीज अस्तित्व में भी नऽ हे, बाकि परमेश्वर ओकरा ही काम में लावे के फईसला येहिगुने लेलन ताकि ऊ चीज के बेकार ठहरईतन जेकरा बारे में सभे कोई जानऽ हथन।29परमेश्वर ई काम ई लक्ष्य के साथे करलन कि कोई भी प्राणी परमेश्वर के नजर में अपन बारे में बड़का-बड़का बात नऽ बोलतन।30ई परमेश्वर ही हथन जे तोरा यीशु मसीह के जौरे एक जगह करलन हे। मसीह के माध्यम से काम कर के, परमेश्वर हमनी के बुद्धिमान बनईलन हे। ऊ हमनी के बेकसूर घोषित करलन हे, आउर हमनी के उनकर लोग होवे ला धार्मिकता आउर पवित्रता करके चुनलन हे, आउर हमनी के बुरा शक्तियन से छोड़ईलन हे। 31येहिगुने, काहेकि प्रभु ही ऊ हथन जे ई सभे कामवन के करऽ हथन, हमनी के ऊ करे के चाही जे यिर्मयाह भविष्यद्वक्ता शास्त्रवन में लिखलन हे: “जदि लोग केकरो बारे में बड़का-बड़का बात बोले ला चाहऽ हथन तऽ उनका यहोवा के बारे में महान बात बोले के चाही”
Bridge Connectivity Solutions Pvt. Ltd.