1 Thessalonians2
1Adhi anó ơơi, chênh adhi anó n'nal kơi tarnêêng nôôq yi tơk palơq adhi anó ơi yươq val xar kah malơơi.2Bơơi xong xók đơơp jarnah lơq bâân kađiq kalươm dhiq kanóón Phi-liip ting kơi adhi anó ơi n'nal, nôôq yi bâân nhóól lóóm kalóóng Yaang Pleng ưng nôôq yi buôn truuih đuui leq adhi anó Taruuih Liêm ưng Yaang Pleng dhiq bơk rau tarjeng tarjơl.3Ơi tarnêêng bhơơl panhel ưng nôôq yi eh rau gluh tââq rau lơt môôp, kung eh bhral tââq lóóm kah liêm, môôiq tââq lóóm karnóq chachââr galơơk,4Bơơi nôôq yi ơi bâân Yaang Pleng klêêu klôôq buôn bâân pajaau Taruuih Liêm n'đó kơi, nek nôôq yi kung yuur praaq kơi achêk, eh rau buôn têêng iêm lóóm akóón manưih, hơq buôn têêng iêm lóóm Yaang Pleng, nek Yaang chamet lêi lóóm nôôq yi.5Kơi adhi anó ơi n'nal, xók achêk nôôq yi kah tơk palơq nôôq paraaq pei lóóm, môôiq tââq lóóm n'thaam, paxar achak — Yaang Pleng đương lêi —6kung kah chik-chêk cha-iil tabah tââq akóón manưih, eh rau tââq adhi anó môôiq tââq manưih lââng,7dhơ ve chóóm bâân bhi chap taai nek sưưq-đô ưng Chuôq Paq Manưih, bơơi tơơt m'pơng adhi anó, nôôq yi kơi ngóq n'niên lóóiq nôôq akóón paniên, dhiêp kơi manưih akan phaai gamang lêi akóón ađêi.8Taai nh'nhơr yeh adhi anó kơi achêk, hayơq nôôq yi bhuui lóóm paak blah palơq adhi anó eh chapiên Taruuih Liêm ưng Yaang Pleng, hơq dyơq parhââm mamông ưng chênh ađêi. Achêk nek taai adhi anó ơi val xar nôôq manưih nh'nhơr bhlơng nek palơq nôôq yi.9Nhan móón adhi anó, dhakơi nek adhi anó dyơq hei rau nhưh nhen lơq nhok gleh ưng nôôq yi, nôôq yi ơi truuih đuui Taruuih Liêm ưng Yaang Pleng leq adhi anó xók dyơq bhiêk matêêng hayum tangêi buôn yươq têêng ganưi haleng leq dhơ dhangaai kalóóng adhi anó.10Adhi anó nek manưih truuih, palơq Yaang Pleng dyơq, kơi nek palơq adhi anó, nek nôôq manưih ve lóóm huuiq, nôôq yi ơi mamông sek tabah, bhơt liêm, lơq yươq dhiq chóóm trêh eh alua,11kung kơi adhi anó ơi n'nal, n'đó kơi nôôq yi nek palơq ting chanak manưih kalóóng adhi anó, kơi manưih akonh nek palơq akóón anaaq ađêi,12pahêêl pató adhi anó, bhơơl haanh lơq yua chut adhi anó buôn tơơt cha kơi kre dhalam palơq Yaang Pleng, Yaang dhaloong adhi anó mót kalóóng katiêk pleng lơq cha-iil tabah ưng Ađó.13Taai kơi ađek, nôôq yi kung kah katơng ma-ơơn Yaang Pleng, taai xók pơh đơơp paraaq Yaang Pleng tââq rau tameng xâng dhiq nôôq yi, adhi anó ơi pơh đơơp eh rau kơi paraaq ưng akóón manưih, hơq ting pâng dhalam ađek nek paraaq ưng Yaang Pleng, kung nek rau dyơq vôôiq veq kalóóng adhi anó, hơq nek kalóóng nôôq manưih ve lóóm huuiq.14Nhan móón adhi anó, adhi anó ơi val xar nôôq manưih ting đuui nôôq akóón dhơn Chuôq ưng Yaang Pleng, nek nôôq akóón dhơn Chuôq kalóóng Jê-su Chuôq Paq Manưih tơơt dhiq charhóóng Ju-đê, taai adhi anó ơi đươi palơq nôôq jarnah xangaat tââq chênh dhanuôr ađêi, dhiêp kơi nôôq akóón dhơn Chuôq achêk kung ơi đươi tââq manưih Jo Thaaiq,15nek nôôq đu ơi drươh leng Chuôq, nek Chuôq Jê-su, palơq nôôq manưih loom đââng taruuih, drươh kóóp róp nôôq yi, lơq kung nek nôôq đu kah têêng bhuui lóóm Yaang Pleng, vil dyơq gaam chróót palơq dyóp ngaai,16xók châq kajơq nôôq yi truuih pachóóm đóng dhanuôr nguôi buôn bơk ngaai ve chóóm bâân paq, đââng tơk matu lơt ưng piđó bhiêk taluôn buur tabing kơơq. Bơơi tơk tatun xariêq, ganơt pagrâ janah dhakơi n'toh dhiq piđó.17Nhan móón adhi anó, dhơ bâân tablah changaai palơq adhi anó kalóóng mơ mưi ganah, dhơ changaai mat bơơi yươq changaai lóóm. Nôôq yi bhơt praan tahươk tahââm kalóóng rau góh rahaal kah kơi buôn lum mat adhi anó.18Nek hayơq, nôôq yi kiêng vôôiq tơk palơq adhi anó — tââm nek aku, Phaau-lô, bơơr pe chu kanóq vôôiq — bơơi Sa-taan ơi padrơ kajơq nôôq yi.19Ơi lóóm rââm, môôiq rau bhuui marhaal, môôiq dhanưưk panơơng tarhơơnh ưng nôôq yi nek harau? Eh alua ađek nek adhi anó tơơt toom mat Chuôq nôôq he, nek Chuôq Jê-su, kalóóng rau tơk tabhral ưng Ađó kah lua?20Alua, adhi anó nek cha-iil tabah lơq rau bhuui marhaal ưng nôôq yi.
FAR EAST BROADCASTING COMPANY