1 Thessalonians3
1Taai ađek, xók kah đơơp đươnh lơh chóóm, nôôq yi kanóq liêm lơh nek mưi aku phaai bâân tơơt lóóiq dhiq A-thêên,2lơq nôôq yi ơi kayua Ti-mô-thê, manưih adhi anó ưng nôôq yi lơq dhơn ratơơq ưng Yaang Pleng kalóóng Taruuih liêm ưng Chuôq Paq Manưih, buôn têêng tamưng karơ lơq tabhơơl adhi anó leq lóóm huuiq ưng ađêi,3buôn yươq ngaai bâân kadrêq kadrơn m'pơng nôôq bhrê hư ađô. Ơi chênh adhi anó n'nal kơi nôôq he bâân patơơt đơơp taje chiên kơi achêk.4Patơk mơ xók nôôq yi dyơq tơơt palơq adhi anó, nôôq yi ơi loom móón đóng adhi anó kơi nôôq he e đơơp xâng jarnah, lơq tarnêêng yuur avaaih, dhalam kơi adhi anó ơi n'nal.5Ơi taai achêk, xók kah đuôh chóóm jruôn đươnh lơh dyơq, aku ơi kayua manưih vôôiq buôn n'nal lóóm huuiq adhi anó n'đó kơi. Ngaai n'nal đu dharơơl galơơk palơq kơi kiq ađek ơi pahêêl kajôông adhi anó lơq kông gleh ưng nôôq yi xar kơi kah malơơi.6Bơơi dhalam bhêêl ađô, Ti-mô-thê lơh xók vôôiq tââq dham adhi anó chô palơq leq nôôq yi, ơi đââng leq nôôq yi taruuih bhuui leq lóóm huuiq lơq lóóm tanhơr ưng adhi anó, kơi adhi anó taluôn jư nôôq rau hei lóóiq liêm kre leq nôôq yi, rââm kiêng tarlum nôôq yi kung thê kơi nôôq yi rââm tarlum adhi anó.7Taai kơi ađek, nhan móón adhi anó, nôôq yi bâân tabhơơl tââq adhi anó xók taje mat palơq dyóp rau tamenh chêt lơq bhrê hư ưng ađêi, taai lóóm huuiq ưng adhi anó.8Tư tââq bhêêl ađô, la chênh adhi anó dyương mưng kalóóng Chuôq, nek nôôq yi mamông.9Nôôq yi ve chóóm tapôông leq Yaang Pleng paraaq ma-ơơn n'đó kơi leq adhi anó, ganương dhiq tabhơt lóóm marhaal marlaat hơq ơi taai adhi anó, nôôq yi bhuui marhaal toom mat Yaang Pleng nôôq yi,10hayum tangêi gavơh nhan tabhlơng buôn bâân tarlum mat adhi anó lơq paxóng nôôq rau dyơq tabhuch kalóóng lóóm huuiq adhi anó?11Gavơh nhan chênh Yaang Pleng, Ama nôôq he, lơq Chuôq Jê-su, Chuôq nôôq he, đââng kalơng nôôq yi tơk palơq adhi anó.12Nhan Chuôq têêng adhi anó yuur tatrul lơq xưa raai kalóóng lóóm tanhơr nek palơq xóng ađêi lơq nek palơq dyóp ngaai, kung pakơi nôôq yi nek palơq adhi anó,13buôn têêng đóng lóóm adhi anó mưng karơ, yươq ve rau chóóm jươm kalóóng rau sek tabah toom mat Yaang Pleng, Ama nôôq he, kalóóng rau tabhral tơk ưng Chuôq nôôq he, nek Chuôq Jê-su, nek palơq tabhơt nôôq akóón dhơn Ađó. A-meen!
FAR EAST BROADCASTING COMPANY