1 Thessalonians1
1Phaau-lô, lơq Siin-ven nek palơq Ti-mô-thê pagơơi đóng Akóón Dhơn Chuôq Tê-sa-lô-ni-ka kalóóng Yaang Pleng, nek Ama lơq Chuôq, nek Chuôq Jê-su Paq Manưih. Nhan ơơn phươk liêm lơq yươq rauha tơơt dhiq adhi anó.2Nôôq yi taluôn ma-ơơn Yaang Pleng leq tabhơt adhi anó, xók kah parngau pahei tơk adhi anó kalóóng nôôq paraaq gavơh nhan ưng ađêi,3taai hei tơk tarnêêng tââq lóóm huuiq, lơq rau kadhaap nhok tââq lóóm tanhơr, palơq karnóq mưng đươnh tââq lóóm rââm ưng adhi anó dhiq Chuôq nôôq he, nek Chuôq Jê-su Paq Manưih, toom mat Yaang Pleng, Ama nôôq he;4taai n'nal adhi anó, nôôq manưih bâân Yaang Pleng nh'nhơr, adhi anó bâân Yaang Pleng lưa chââih,5ơi taai Taruuih Liêm ưng nôôq yi ơi bâân truuih đóng adhi anó eh chapiên palơq bóóp praaq, hơq kung palơq mataai karơ lơq palơq Chuôq Yaang Liêm, nek palơq lóóm huuiq dhakơi mưng — kơi adhi anó n'nal nôôq yi ơi mamông n'đó kơi dhiq m'pơng adhi anó ơi malơơi ưng adhi anó.6Adhi anó kung ơi val xar nôôq manưih ting xamil ưng nôôq yi lơq ưng Chuôq, xók pơh đơơp paraaq Yaang Pleng xók bơk kadhaap kara palơq rau bhuui marhaal ưng Chuôq Yaang Liêm.7Patơk mơ, adhi anó ơi val kơi m'beq xamil đóng tabhơt nôôq manưih ve lóóm huuiq dhiq Ma-xê-đoan lơq dhiq A-chaai.8Ơi tââq adhi anó, taruuih liêm Chuôq ơi bâân tanđôôr, eh chapiên kalóóng xưưq Ma-xê-đoan lơq kalóóng xưưq A-chaai, bơơi lóóm huuiq ưng adhi anó dhiq Yaang Pleng ơi trââi tơk dyóp dhiq. Kơi achêk hayơq, nôôq yi kah lêi kơng phaai praaq ve rau dyơq.9Ơi xók pahei leq nôôq yi, chênh piđó đóók truuih lóóiq rau pơh yaauq hơq nôôq yi ơi ve dhiq adhi anó ng'kơi, lơq n'đó kơi adhi anó ơi palâh hóng tââq kabhêi, malóóm leq Yaang Pleng buôn yaauq Yaang Pleng taluôn mamông lơq lalua dhalam,10lơq buôn đương lêi Akóón Ađó tââq pleng, Yaang đu Ađó ơi payuur mamông lóóiq tââq kan chêt — hơq nek Chuôq Jê-su, Yaang trôông paq nôôq he lơh tââq ganơt pagrâ janah xók bhral.
FAR EAST BROADCASTING COMPANY