Tit2
1Pale awe Tit, kalaŋan pakan paka heenapoole niŋ tooñaa ya eekalaŋanee ya.2Sok pákayiin paka keemaamane ka kacocokanoolo, nkáhin heenape, nkámiilool pinap, nkacok piliit ti káyinan ka kiteyii, pálafi niŋ kamukut.3Moonool moonool muu, sok lompo pakaal paka keemaamane ka kaloŋ eloŋ éesuume Pútuun pa. Kañaŋut púkuuf an, niŋ fotom nkáluuŋo ti elaan, pale kañaŋaa kakalaŋan heenape.4Niŋ káhin fo, éfikayini kawun kunuu uhiineen wa keenimiye ka féefiye kati kálafi pákayiinii niŋ epuukii,5nkacocokanoolo, nkakuul, nkamankool punuufii, nkayeno pakan keenape, nkawananoolo ti pákayiinii ancuk an timpi áyini káakup heenaput ti hilim ha hiti Pútuun pa.6Moonool moonool muu, sok lompo uhiineen pákayiin paka kacocokanoolo.7Awe himuumi aañaŋaa hiwenu pinap ti waah óo waah, ancuk pakan paka kati káyipenani. Niŋ aayeniyaa kakalaŋan pakan paka, hín ho niŋ yaani púlooŋ, apan incoonool.8Kúp kilim keetempiye enka an atapook. Niŋ áahinaa eehuu, pikamooli efikasuu, kaatuko etikataak heenaput eeha efikasok kiti unaa.9Pimiikan pa kañaŋaa hítuulu ñíhampaatiin ña pakateyii ti waah óo waah, nkaŋes héesuumii, kañaŋut píñakalool neyii,10kañaŋut káalipu teyii waah, pale kañaŋaa piyeno pakan keecoonoole fanfaŋ niŋ keehintiyee. Niŋ káhinaa fo, pakan paka efikasok heenape ti eeha nuukalaŋanaa ha hiti Pútuun pa Afakana ya ati unaa.11Kaatuko Pútuun pa píyisanaayisan pakan paka panap etempo peeyina pa kafakan pakan paka púlooŋ.12Panap etempo pikalaŋanaa-kalaŋan unaa kati ukatanaa eloŋ eenaput niŋ pálafi pa piti púlunta empe, nuucocokanooliyaa, nuutaakaa eloŋ eecoonoole ti púlunta empe néesuum Pútuun pa.13Umeeŋaameeŋ niŋ cíki, fa nuuyemaa fa ti hítuulu éñohoonii ya eemaka ya eti Yéesu Krista, eeyem ya Pútuun pa piti unaa penfakat pa niŋ Afakana ya ati unaa.14Awufanaawufan eloŋoo hak unaa, kati afakan unaa ti kaamuuyen óo kaamuuyen, apan naakuulan unaa. Ancuk kati uyeniyaa pántoon pakanoo, nuuhiliikanaa íhinu heenape.15Eehuu aññaŋe kakalaŋan pakan paka. Yankanan kéeyinane ka kapucok piliit, uwwatanii niŋ sempe. Timpi kat an ápitin ti awe.
Wycliffe Bible Translators, Inc.