Tit1
1Aŋe inci Póol yem ti hikiicu, inci amiikan ati Pútuun pa. Iyyémi lompo apoñapoñ ati Yéesu Krista. Pútuun pa púpoñiyaam kati penan sempe káyinan ka kiti pakan etempo payenka mpimamale ka, apan iyyankananii kápimeyi tooñaa ya éeyisane ya pakan paka fa efikaloŋ samat nii fa Pútuun pa mpílafiye fa.2Kamma káyinan ka kiteyii niŋ kameye ka kiteyii, nkataake cíki eti eloŋ fo cancowiyaaw. Eloŋ eyyuu Pútuun pa peecaamantoo pa mpíyinanane unaa, púlunta pa píliilumee.3Ta caanak ca íncicolii ta, Pútuun pa Afakana ya ati unaa mpíhin hilim etempo hípimeyiyee. Píhinaahin eehuu pínapii ti káatuunan enka mpuñomanaam ka.4Tit, awe añiinam pánipani ti káyinan, inci kicanuu. Alímaati Pútuun pa Paapaa ya, niŋ Yéesu Eenucee ya Afakana ya ati unaa kasampani nkawufani kásuumaay.5Inci kátiyuukat ti econ ya eti Kilet ancuk aakati hankan heetowiye ha ti páhin pa, apan ti saatee óo saatee eetaake kéeyinane, siiŋan pakan kati kayeno ñíhampaatiin ña pakateyii samat nii fa inci insokuu fa.6Ati hikaw ha ati kéeyinane ka añaŋut hitaaku waah ewwa an naayinoo hinooku tewwo, añaŋaa hitaaku aal oonool kóŋ naaleh teyoo, epuukoo kañaŋaa piyeno kéeyinane, kañaŋut piyeno ti eloŋ eti faŋii niŋ fotom kéetuulut an.7Ati hikaw ha ati kéeyinane ka, páhin pa piti Pútuun pa ti sipeesoo mpiyem; ooto ayinaatee hinooku ti waah. Añaŋut piyeno éeseepinooliye, añaŋut piyeno an eecase ti káñiken, añaŋut piyeno núkumana, añaŋut piyeno eehiñe, añaŋut hiŋesu hitaaku mañ emma náasuwatut.8Pale añaŋaa kawanan pinap ekaawoola ya payenka nkakaay ka lateyoo, náalafi heenape, eecocokanooliye, eecoonoole, eekuule apan naataak kunuu.9Añaŋaa hicoku piliit ti hilim ha heehintiyee ha, samat nii fa naakalaŋanee fa. Niŋ áhinaa eehuu, áfaayini kapenan sempe pakakee paka niŋ kakalaŋan kiti tooñaa, náayisan lompo keepooke ka hilim ha la nkanowe la.10Kaatuko taakaataak hícump pakan keecoonut pakati kikaw ka pakateyii, picaahaŋ pakakee Pusuwif pa payenka nkasok ka nii, an óo an éeyinane Eenucee ya añaŋee kanakan. Kameeŋaameeŋ káakup keetaakut nafaa, nkacaakool pakakee paka kápiyinan ho.11Ñutumii ñiñaŋee hicotu, kaatuko nkanakanool-nakanool miin púmpuluŋ ti kakalaŋan eeha nkañaŋut kakalaŋan. Nkáhinhin eehuu kati kataak mañ emma nkásuwatut temmo.12Akee ti pakati Kilet aŋa nkacoke nii ayaamakoola, asokaasok ta infiyye, asok: “Pakati Kilet kasalaasal kincaam, poko púlukuleen peekance, keekuuñe nkatowo ti hili lamma.”13Eeha naasoke ha hiti tooñaa. Ooto towo ti kawatanii meemak, ancuk kayankaa ti káyinan ka.14Kañaŋut káasiitan kícantiitu keetaakut nafaa kiti Pusuwif pa niŋ fotom hítuulu kilim keesiiŋanee enka pakan keepooke tooñaa ya nkasiiŋane.15Pakan keekuule, waah óo waah teyii weekuule, pale pakan keekuulut, apan kataakut káyinan lompo, waah ukuulut teyii. Kaatuko kunuuwii niŋ pámiiloolalii peelecate.16Kasok kámeyimeyi Pútuun pa, pale pawenalii píyisanaayisan nii hitaakiit. Poko kéecintanana, kataapala kátuul Pútuun pa, apan kayinaat íhinu waah weenape.
Wycliffe Bible Translators, Inc.