Tit3
1Náwunan kéeyinane ka nii kañaŋaa káasiitan pumansa pa niŋ pakati kikaw ka pakati mah ma. Kañaŋii hítuulu, nkasiiŋo kati nkáhin heenape.2Timpi kákup heenaput ti an, kálaaŋ pílaacinool, pale kayeno pakan keemone niŋ kéesuumanana ti an óo an.3Kaatuko ti púcook pa, unaa lompo pusoŋ, útuulutaa Pútuun pa, nuucaakoolee, apan nuuyeniyaa pimiikan ti heenaput óo heenaput niŋ ti pásuuma unaa. Nuuyeniyaa ti eloŋ eti pakanc niŋ paheeka. Pakakee paka nkanat unaa, unaa lompo nuunatii.4Pale ta Pútuun pa Afakana ya ati unaa mpíyisane ta unaa panap etempo niŋ pálafi,5mpifakan unaa, neetaat kamma núuhinaa heenape, pale kamma mpitaake paket hikaw ti unaa. Ti sempe sa siti Kunuu ka keenape ka mpuñowe unaa upukuulaa. Kunuu ka keenape ka kíhine úpupukiyee nene, nkuwufan unaa eloŋ éeyeeni.6Pútuun pa puwufanaawufan unaa Kunuu ka keenape ka fo muus, pínapii ti Yéesu Krista Afakana ya ati unaa.7Pútuun pa píhinaahin eehuu ancuk ti panap etempo, mpucok unaa pakan keecoonoole, kati úyenooniyaa payenka efikataak eeha mpíyinanane ha, mpuwufan unaa cíki eti eloŋ ya eepayantoo ya.8Aŋe hilim heehintiyee. Inci láfilafi aapiŋiino kakalaŋan enkuu, ancuk kéeyinane ka ti Pútuun pa kati katah kunuu ti íhinu waah weenape. Eehuu heenape, apan nihitaak nafaa ti an óo an.9Pale láaŋ piteŋenool peetaakut nafaa, niŋ káakup kiti ucaw símaama. Láaŋ lompo pílaacinool niŋ píñakalool piti kiti hilim ha heesiiŋanee ha hiti Móyiis, eehuu hiñaŋut apan hitaakut nafaa.10Kúpanan poonool payenka nkácoopii ka píkatinool ti pututa aluu, apan innene súpiyen. Infúlaa toko timpi taak neyii waah.11Efíhiiniyi nii pakan paka payenkuu kacoonoolut apan pumuuyena; apan umuuyen wa uteyii úyisane fa nkanowe fa.12Hátikin inci fápoñii Aatemas niŋ fotom Tikik. Emma akee teyii nácolii ma, hiliikan áaputoopiyam ti saatee ya eti Nikopolis, kaatuko po inci íllafiye piyeno ti etiil ya.13Hín kata óo kata aapiyankanan Senas áhina ya kíiti niŋ Apolos ti kaakaawool ka kiteyii, aapucuk nii kataakaa waah óo waah ewwa nkasoolahe.14Apan pakan unaa kañaŋee kakalaŋan íhinu heenape, kati kayankananaa keetaake ka soolah enfakat ancuk eloŋii etaakaa nafaa.15Keeyem ka pe púlooŋ niŋ inci kakicanuu.
Kican pákawii unaa púlooŋ ti káyinan kéelafiye ka unaa.
Alímaati Pútuun pa pisampan aluu púlooŋ.
Kican pákawii unaa púlooŋ ti káyinan kéelafiye ka unaa.
Alímaati Pútuun pa pisampan aluu púlooŋ.
Wycliffe Bible Translators, Inc.