2 Timote4
1Timote, inci sokuu eehe hátikin Pútuun pa niŋ Yéesu Eenucee ya, eekaakaay ya íhinu kíiti keekete ka niŋ keeyem ka kaloŋa, niŋ áfuliyoo apisiiŋan cáwii ca citeyoo:2man me ti pásuuma niŋ fotom ti páciite, siiŋo áaputuunan hilim ha hiti Pútuun pa. Mukut ti kaacoonanool, ti kawatan, niŋ ti kaayankanan pakan paka kapucok piliit niŋ pakalaŋanal peenape.3Kaatuko caanak unca ti ékey ta pakan paka etinene kálafi káasiitan pakalaŋanal piti tooñaa. Pale efikanapan pálafi pa piteyii, nkaŋes hícump pikalaŋana payenka efikakalaŋanii eeha nkálafiye ha hísiyu.4Etinene kálafi káasiitan tooñaa ya, pale efikayesan yo pusonii kápisiitan kícantiitu keetaakut nafaa.5Pale awe, cocokanoolo ti waah óo waah, immukut ti kúnuul, ínhin kata ti káatuunan ekooŋan ya éesuume ya, inhankan páhin empa Pútuun pa mpuwufanuu pa.6Inkéyyoo ti inci, caanak ca cicolaacol hísimam kati hiniisee samat nii fa an naniis fa elaan ti waah ewwa naayem ti kaawaaseen Pútuun pa.7Inci kamaakam hikam ha heenape ha, inci payaapa katey ka, incok kíp káyinan ka.8Písik fiye, fawufanee panteeloo ya kamma ínhine héesuume Ateeteyo. Náhinhin kíiti pucoonool, apan ti hinoom ha hiti kíiti ya, afaawufanam panteeloo, neetaat inci lamma pale focaa an óo an éelafiyoo ápuñohoonii.9Hín kata óo kata áapikey pe ti inci mpacas.10Kaatuko Temas ateyaamtey, kamma náalafiye hiti púlunta pe, naakaay Tesalonik. Kelesukens lompo akaayaakaay Kalati, Tit naakaay Talumati.11Luk lamma ayem le niŋ inci. Cóopoolii Mark, kaatuko ataakaataak nafaa ti inci ti páhin pa piti Pútuun pa.12Inci poñaapoñ Tikik ti saatee ya eti Efes.13Niŋ aayeniyaa ékey, íncoopooliyam hísool ha hitoom henfakat ha eeha inci ínkatii ha ti Kaapus eeyem a Tolowas. Cóopoolii lompo púpukoo pa, picaahaŋ péeciita pa hinoom.14Aliksant asafa ya áhinaamhin heenaput meemak. Ateeteyo afaacooyoo eeha náahine ha.15Awe lompo tah kunuu teyoo, kaatuko apookaapook meemak pakalaŋanal pa piti unaa.16Ta inci íntikine ta kúp pati kíiti ya pisiiŋo faŋam, an asiiŋiitam, pale poko púlooŋ nkateyam. Alímaati Pútuun pa timpi puwatanii kamma eehuu.17Pale Ateeteyo naayankananam, naawufanam sempe pútuunan ekooŋan ya éesuume ya púlooŋ, ancuk keeneetaat ka Pusuwif púlooŋ kásiyaa yo. Fiye naafakanam ti putum picata pa.18Ateeteyo afaafakanam ti heenaput óo heenaput, apan naacoopam pinako ti cáwii ca citeyoo citi alacana. Alímaati hamake ha hiyeno hiteyoo fo cancowiyaaw púley. Amíini.19Kicanam Prisila niŋ Akilas niŋ miin ma miti Onesifol.20Elast atowaatowo Kolint, apan ínkatii Tolofim ti saatee ya eti Milet kamma náakuuñe.21Hín kata óo kata aakati kéy le niŋ pamon pa éfipiyaañ.
Epulus, Putens, Linus, Kuluca, niŋ pakakee paka kéeyinane ka púlooŋ kakicanuu.22Alímaati Ateeteyo ayeno naawe! Alímaati Pútuun pa pisampan aluu púlooŋ.
Epulus, Putens, Linus, Kuluca, niŋ pakakee paka kéeyinane ka púlooŋ kakicanuu.22Alímaati Ateeteyo ayeno naawe! Alímaati Pútuun pa pisampan aluu púlooŋ.
Wycliffe Bible Translators, Inc.