Kalati3
1Aluu pakati Kalati pusoŋ! Ayme acaakoole aluu? Inci kamanaakaman aluu picaaŋ cataŋ fa Yéesu Krista naapempeŋee fa ti kuluwaa ya.2Hoonool lamma inci íllafiye kameye ti aluu: Fo nitaakaataak Kunuu ka keenape ka kamma ínnituule hilim ha heesiiŋanee ha hiti Móyiis? Niŋ fotom fo kamma ínnisiye ekooŋan ya éesuume ya ínniyinan yo?3Fo fiyuu innisoŋiye? Niŋ sempe sa siti Kunuu ka keenape ka ínniyaañe; fo fiye niŋ sempe aluu ínnilafiye kaahankan?4Fo ekina eyem kúnuul enka innicuke ka púlooŋ kiti kenseŋ? Inci cukutam nii kiti kenseŋ!5Ooto, ta Pútuun pa mpuwufane ta aluu Kunuu ka keenape ka, apan mpíhin heecukantee ti pututa aluu, fo píhinaahin eehuu kamma ínnituule hilim ha heesiiŋanee ha hiti Móyiis, niŋ fotom fo kamma ínnisiye ekooŋan ya éesuume ya ínniyinan yo?6Nisincan Abraham. Hilim ha hiti Pútuun pa hisok: “Abraham áyinanaayinan ti Pútuun pa, ekina ewune Pútuun pa mpucokoo nii eecoonoole.”7Ooto niñaŋaa kameye nii, keetaake ka káyinan kayem epuuk ya pakati Abraham.8Hilim ha hiti Pútuun pa hifiyaafiyo nihisoke nii, Pútuun pa efipucok keeneetaat ka Pusuwif pakan keecoonoole kamma káyinan ka kiteyii. Ekina ewune mpifiyo mpusoke Abraham ekooŋan ya éesuume ya eyye nii: “Pínapii ti awe, fasampan písii pa púlooŋ piti etaam ya.”9Fiyuu Pútuun pa mpisampane kéeyinane ka púlooŋ, samat nii fa mpisampane fa lompo Abraham, áyiin a ati káyinan ka.10Pale payenka nkámiilool ka kapusok nii Pútuun pa efipucokii pakan keecoonoole kamma nkátuule hilim ha heesiiŋanee ha hiti Móyiis, payenkuu efikañanee, kaatuko kiiceekiic ti hilim ha hiti Pútuun pa nii: “An óo an éehinantoo tan óo tan heekiicee ha púlooŋ ti púkoo ya eti hilim ha heesiiŋanee ha hiti Móyiis, añaneeñan.”11Ooto híinihiini hat nii, Pútuun pa etipucok an nii eecoonoole kamma náatuule hilim ha heesiiŋanee ha hiti Móyiis, kaatuko hilim ha hiti Pútuun pa hisok: “An aŋa Pútuun pa mpucoke nii eecoonoole kamma káyinan ka kiteyoo, afaaloŋ.”12Pale hítuulu hilim ha heesiiŋanee ha, akufut niŋ káyinan ti Pútuun pa. Samat nii fa hilim ha hiti Pútuun pa nihisoke fa: “An óo an éetuule hilim ha heesiiŋanee ha púlooŋ, afaataak eloŋ pínapii ti eehuu.”13Eenucee ya áyenooniyoo-yeno an eeñanee hak unaa, ápufulan unaa ti pañan pa piti hilim ha heesiiŋanee ha. Kaatuko kiiceekiic ti hilim ha hiti Pútuun pa nii: “An óo an eepempeŋee ti enuun añaneeñan.”14Fiyuu nihitaakiye ancuk kaasampan enka Pútuun pa mpuwufane ka Abraham, kíkeyyoo lompo ti keeneetaat ka Pusuwif pínapii ti Yéesu Eenucee ya. Fiye ancuk pínapii ti káyinan, nuutaakaa Kunuu ka keenape ka enka Pútuun pa mpíyinanane ka.15Pakanam ti káyinan, inci pusok aluu eeha nihitaako ha ti eloŋ eyye hinak óo hinak: niŋ pakan kaliilaa písiyool nkakiic eeha nkásiyoole ha, an ayinaat káfulan niŋ fotom kapenan teeho.16Pútuun pa pusokaasok nii, eeha mpíyinanane ha, efipuwufan ho Abraham niŋ añii ya aŋa afaataak a. Hilim ha hiti Pútuun pa hisokut nii: “niŋ epuukoo,” pucuk fiye nii pakan keemeeŋe. Haani, pusok oonool lamma, akina ayem Eenucee ya.17Eehe inci íllafiye hisoku: Pútuun pa piliilaaliil písiyool niŋ Abraham, mpusok nii efipimank po. Hilim ha heesiiŋanee ha hiti Móyiis, heesiiŋanee ha pamuusal sitiil sikeme sipaakiil niŋ áwii niŋ ŋaasuwan (430), hiyinaat káfulan oom písiyool apan níhipuc eeha Pútuun pa mpíyinanane ha.18Kaatuko niŋ Pútuun pa pisampanaa-sampan pakan paka kamma nkátuule hilim ha heesiiŋanee ha, ooto kaasampan etempo kúfuliyoot nene ti eeha mpíyinanane ha. Pale Pútuun pa ti panap etempo mpisampane Abraham kamma mpíyinananoo.19Ooto weyme uwune hilim ha heesiiŋanee ha hiti Móyiis nihisiiŋanee? Hipenaneepenan ti písiyool pa, kati híyisan pakan paka umuuyen wa uteyii. Pale hilim ha heesiiŋanee ha nihitowo fo ta Eenucee ya éeyinananee ya eesoke ya Abraham maamaa náakeyii ta. Pútuun pa puwufanaawufan Móyiis hilim etempo heesiiŋanee ha pínapii ti pumaleekoo pa, Móyiis eeyeniye ya ti pututa Pútuun pa niŋ pakan paka.20Eeyem ti pututa pakan paka, áhinantoo niŋ an oonool lamma; pale Pútuun pa poonool.21Ooto fo eehe híyisanaayisan nii hilim ha heesiiŋanee ha hiti Móyiis hipookaapook eeha Pútuun pa mpíyinanane ha? Múk hitaakiit! Niŋ taakaataako hilim heesiiŋanee heewufanee, eeha efihiwufan eloŋ pakan paka, Pútuun pa anti pucok unaa fanfaŋ pakan keecoonoole kaatuko útuulaatuul ho.22Pale hilim ha hiti Pútuun pa hisok nii, kaamuuyen, akulaakul pakan paka púlooŋ ti núkuluma, ancuk eeha Pútuun pa mpíyinanane ha unaa, kéeyinane ka kataakaa ho kamma káyinan ka kiteyii ti Yéesu Krista.23Ti púcook pa, le niŋ káyinan ti Eenucee ya afaataako, hilim ha heesiiŋanee ha hiti Móyiis, hikulaakul unaa nihifaas unaa fo ta pítin pa piti káyinan ka éfipiyisanee.24Ooto hilim ha heesiiŋanee ha himankoolaa-mankool unaa samat nii fa amiikan namankool fa epuuk ya pakati áhampaatiin a ateyoo fo káyankii. Ihínaahin eehuu fo ta Eenucee ya náakeyii ta, ancuk Pútuun pa pucokaa unaa pakan keecoonoole kamma káyinan ka kiti unaa.25Fiye páawoo káyinan ka ti Eenucee ya kíkeyyookey, hilim ha heesiiŋanee ha hiti Móyiis hineetaat unaa fiye ti kaamankool.26Kaatuko ti Yéesu Eenucee ya aluu púlooŋ inniyem epuuk Pútuun pa pínapii ti káyinan.27Aluu púlooŋ kéehinee ka pátise ti caacaw ca citi Eenucee ya, nísoolaasoolo Eenucee ya.28Ooto taakut fiye káaŋayinool ti pututa Asuwif niŋ eeneetaat Asuwif, amiikan niŋ eeneetaat amiikan, áyiin niŋ aal, kaatuko aluu púlooŋ pakoonool ti Yéesu Eenucee ya.29Páawoo aluu unka ti Eenucee ya, ooto aluu epuuk pakati Abraham, apan efinitaak waah ewwa Pútuun pa mpíyinananoo wa.
Wycliffe Bible Translators, Inc.