Kalati2
1Pamuusal sitiil ŋaasuwan niŋ sipaakiil, iññoho Jerusalem, tempe inci niŋ Barnabas. Incoopool lompo Tit.2Inci kaayaakaay po kaatuko Pútuun pa píyisanooliye ti inci pupusokam kaay. Inci po, incukool cipet niŋ keecokee ka nii pakati kikaw ka pakati kéeyinane ka, inkamanii ekooŋan ya éesuume ya eyya inci íntuunane ya keeneetaat ka Pusuwif. Kaatuko láfilafi píhiiniyam nii ti hoonool huu nuuyem, ti kafeyatan nii, inci neetaat ti kaañañahool kenseŋ, niŋ fotom, kaañañahool enka inci iññañahoole ka, ñañahoolut ko kenseŋ.3Pale yeniit kaañañahool kenseŋ, kaatuko Tit eeyeniye ya niŋ inci, kasokut anako, háati fa naaneetaat fa Asuwif.4Núukupat kiti kanakan ka, kamma kéehine ka faŋii nii kéeyinane nkápuusii kapiyeno niŋ unii, kati kasincan púsooni káawaayeen enka Yéesu Eenucee ya naawufane ka unii. Kálafilafi íhinu unii pimiikan pakati hilim ha heesiiŋanee ha hiti Móyiis.5Pale uwunutii ho hipitaako háati poonool, ancuk tooñaa ya eti ekooŋan ya éesuume ya etowiyaa ti aluu.6Pale pakati kikaw ka pakati kéeyinane ka keecokee ka nii kéetuulee meemak, kapenanut waah ti ekooŋan ya éesuume ya eyya inci íntuunan ya. Káasiiŋumayii kitaakut ti inci nafaa, kaatuko ti Pútuun pa pakan paka púlooŋ kaleha.7Pale haani, nkacuk nii Pútuun pa pupoñaampoñ kati túunan ekooŋan ya éesuume ya keeneetaat ka Pusuwif, samat nii fa mpupoñe fa Piyeer kati átuunan Pusuwif pa.8Kaatuko Pútuun pa umpa ti páhin pínapii ti inci fa mpíhinaam fa apoñapoñ ti keeneetaat ka Pusuwif, samat nii fa mpiyem fa ti páhin pínapii ti Piyeer fa mpíhinoo fa apoñapoñ ti Pusuwif pa.9Saak, Piyeer niŋ Saŋ, payenkuu kacokee nii keetiyye canku ya, nkacuk nii Pútuun pa puwufanaam páhin pa peetaake empe hikaw. Fiye nkasayan inci niŋ Barnabas, nkasa unii sipees kápiyisan nii, unii púlooŋ uyem ti páhin pa poonool pa. Núusiyool nii inci niŋ Barnabas ukaay pati keeneetaat ka Pusuwif, poko nkakaay pati Pusuwif pa.10Eeha nkaluume ha unii lamma hiyem, timpi ufiil kayankanan keeleke ka. Te inci ínhinhin eehuu niŋ yaanam.11Pale ta Piyeer náakeyii ta Antiyok, infet teyoo hátikin kéeyinane ka, kaatuko áhinut heenape.12Ta náacolii ta púcook pa, nalili nantoonool niŋ kéeyinane ka keeneetaat ka Pusuwif. Pale ta pakakee ti kéeyinane ka Pusuwif payenka Saak náapoñii nkácolii ta, naayeno piñako keeneetaat ka Pusuwif, apan aliyantoo neyii nene nantoonool. Ahínaahin eehuu kaatuko afeyaafe keeŋiiniye ka nii kanakan waah weeñaŋe.13Pakakee Pusuwif pa kéeyinane ka pakati Antiyok nkananfoo ti écufato eyyuu, háati Barnabas faŋoo lompo naacoon kapunoŋanoo ti oom écufato.14Pale ta inci incuke ta nii kaneetaat ti íhinu heenape heenapoole niŋ tooñaa ya eti ekooŋan ya éesuume ya, infet ti Piyeer hátikinii púlooŋ, insokoo: “Piyeer, awe Asuwif, pale aawenaa nii keeneetaat ka Pusuwif. Puume állafiye íhinu keeneetaat ka Pusuwif kapuwen samat nii Pusuwif pa?”15Unii keeyem ka Pusuwif ti nampuke, uneetaat pumuuyena samat nii keeneetaat ka Pusuwif.16Antúŋ úmeyimeyi nii Pútuun pa pucokantoo an nii eecoonoole kamma náahine samat nii fa hilim ha heesiiŋanee ha hiti Móyiis nihisoke fa. Haani, pale káyinan ka kiteyoo lamma ti Yéesu Krista kíhinoo apiyeno eecoonoole. Ekina ewune unii lompo núuyinan ti Yéesu Eenucee ya, ancuk Pútuun pa pucokaa unii lompo keecoonoole kamma káyinan ka kiti unii ti Eenucee ya; timpi pucok unii pakan keecoonoole kamma núuhine fa hilim ha heesiiŋanee ha hiti Móyiis nihisoke fa. Kaatuko íhinu fa hilim ha heesiiŋanee ha hiti Móyiis nihisoke fa, hiwunut an naacokee nii eecoonoole.17Pale niŋ unii Pusuwif pa, unka ti hiŋes Pútuun pa kati pucok unii pakan keecoonoole ti Eenucee ya, unii lompo, pakakee Pusuwif pa kacokaacok unii pumuuyena samat nii keeneetaat ka Pusuwif, fo ekina eyem nii Eenucee ya ayem unii ti hítunku ti kaamuuyen? Múk hitaakiit!18Kaatuko niŋ inci sokaa nii fanene siiŋan hilim ha heesiiŋanee ha eeha inci impaye ha káapucalool, fáhin faŋam an éetuulut hilim ha heesiiŋanee ha.19Inkéyyoo ti inci, ti hilim ha heesiiŋanee ha, inci cukaacuk samat nii an eekete, kaatuko hitaakut sempe ti inci. Eehuu púlooŋ hitaakaataako ancuk inci yeniyaa kaloŋa hak Pútuun pa. Inci pempeŋee-pempeŋ niŋ Eenucee ya ti Kuluwaa ya.20Ooto neetaat fiye nii inci yem kaloŋa, pale Eenucee ya ayem kaloŋa ti inci. Eloŋ ya eti etaam eyya inci iyyem ya fiye ti eloŋ, inci oopa teyyo ti káyinan ka ti Añii ya ati Pútuun pa éelafiyaam ya, apan naawufan eloŋoo hak inci.21Inci pookut panap pa piti Pútuun pa. Kaatuko iyyema hilim ha heesiiŋanee ha hiti Móyiis efihiwun Pútuun pa mpucok an nii eecoonoole, Ooto Eenucee ya aketaaket kenseŋ.
Wycliffe Bible Translators, Inc.