Kalati1
1Aŋe inci Póol, apoñapoñ a. Kaayonkal ka kutoom piyeno apoñapoñ kúfuliyoot ti pakan niŋ fotom an, pale ti Yéesu Krista niŋ ti Pútuun pa Paapaa ya nkúfulii, péelitaniyoo pa ti keekete ka.2Inci niŋ kéeyinane ka púlooŋ keeyem ka pe, ukicanaa aluu picanku pa piti mah ma miti Kalati.3Alímaati Pútuun pa Paapaa ati unaa, niŋ Ateeteyo Yéesu Krista kasampan aluu, nkawufan aluu kásuumaay.4Yéesu Krista awufane eloŋoo kamma umuuyen wa uti unaa, kati afakan unaa ti sempe sa seenaput sa siti púlunta empe, samat nii fa Pútuun pa Paapaa ati unaa mpílafiye fa.5Alímaati caacaw etempo címakiyanee fo cancowiyaaw! Amíini.6Inci nímaam-nim ti aluu. Pútuun pa piyonkalaa-yonkal aluu nipiyeno ti panap pa piti Eenucee ya. Pale ince níyaañ kayesan etempo puson apan inninapan ekee ekooŋan éesuume.7Neetaat nii ekee ekooŋan éesuume etaakiye, haani, ekee etaakiit. Pale taakaataak pakakee keeyem ti kaanakanool kunuu aluu, apan nkálafi kayesan ekooŋan ya éesuume ya eti Eenucee ya.8Háati unii niŋ fotom maleekoo éefulii alacana étuunanaa aluu ekooŋan éesuume eekufut niŋ eyya núutuunane ya aluu, álimaati uñanee!9Usokaasok aluu eehe, ántuŋ fanene penan sok ho: an óo an eeyem aluu ti káatuunan ekee ekooŋan éesuume eekufut niŋ eyya innisayane ya, álimaati añanee!10Fo hiŋesu iyyaake pakan paka kati kasayanam? Haani, Pútuun pa inci íllafiye pipisayanam. Fo hiŋesu héesuume pakan paka iyyaake? Niŋ inci loŋaaloŋ ti hiŋesu héesuume pakan paka, anti yéniyaati amiikan ati Eenucee ya.11Pakanam ti káyinan, inci láfilafi nípimeyi eehe: Ekooŋan ya éesuume ya eyye inci íntuunane ya aluu, éfuliyoot ti an.12Inci síit yo ti an, an lompo akalaŋanutam yo, pale Yéesu Krista faŋoo áyisanaam yo.13Kaatuko nísiyaasi fa inci iwwene fa púcook pa, inci ti kanapan pítin pa piti Pusuwif pa, fa inci ummuusane fa ti kaakallan pakan paka pakati Pútuun pa kéeyinane ka ti Eenucee ya apan iŋŋes hípucuyii.14Inkéyyoo ti pítin pa piti Pusuwif pa, hícump ti ekaay ya etoom inci muusiimuus, inhaŋii lompo hicoku cosaan ya eti símaama unii niŋ yaanam púlooŋ.15Pale Pútuun pa ti panap etempo mpimamalam le niŋ inci fapukee, mpiyonkalam píhin páhin etempo. Apan ta mpucoke ta16kati píyisanam añii etempo, ancuk kaayaa káatuunan keeneetaat ka Pusuwif ekooŋan ya éesuume ya éekupe ya kiteyoo, inci ince mukooliit púkupat ho niŋ an.17Inci siliit lompo Jerusalem picaacuk kéetikinaam ka piyeno pupoñapoñ, pale inkaay Arabiya. Po hátikin, iññoho ti saatee ya eti Damas.18Sitiil síhaaciil sipimuus, inconko silo Jerusalem pícaameyooli niŋ Piyeer, apan iyyeno po neyoo fo kunoom kaat.19Ateeteyo atuwoo Saak, ayem akee apoñapoñ a kóŋ aŋa inci incuke ya po.20Inci pusok aluu hátikin Pútuun pa nii, eeha inci iyyem ha aluu ti hikiicu hiti kincaam tom.21Fiye, ta inci ínfule ta Jerusalem, inkaay ti mah ma miti Siriya niŋ Silisi.22Ti oom waati, kéeyinane ka ti Eenucee ya pakati mah ma miti Judaay kataapala kacukam.23Kásiyaasi lamma fa pakan paka nkasok fa nii: “Ayíin a aŋa eeyeniye ya unaa kaakallan púcook pa, oopa fiye ti káatuunan ekooŋan ya éesuume ya eyya náalafiye ya káapucalool.”24Apan nkámul Pútuun pa kamma inci.
Wycliffe Bible Translators, Inc.