1 Kolint16
1Fiye ínkeyyoo ti pitekool pa hak keesampanee ka pakati Pútuun pa ti saatee ya eti Jerusalem: Níhin eeha inci insoke ha kéeyinane ka pakati Kalati káhin.2Timaas óo Timaas, an óo an ti aluu aniik ti hitaaku ha hiteyoo, acoop ti mañoo naamank mo ti enuufoo. Ancuk niŋ inci kéyyoo, etiniyeno pitekool.3Fiye niŋ inci kéyyoo, fapoñ Jerusalem payenka innimamale ka kapucoop mañ emma innitekoole ma, niŋ pileetal péeyisane nii, inci poñii.4Apan niŋ cakanaa inci lompo pikaay, ooto efuunapoolaa.5Niŋ inci fúliyoo ti mah ma miti Masetoni, fákey aluu hiyoop, kaatuko po inci íllafiye hinapu.6Inci fakampan niŋ aluu, pikee pa ti waati ya eti etiil ya púlooŋ, ancuk inniyankananam ti kaakaawool ka kutoom pan óo pan inci inkaakaay.7Ti pítinam empe, inci láfiit ékey lamma hicuku aluu ince kaay. Haani, inci fálafi kaakampan niŋ aluu ínsuumaa Ateeteyo.8Pale inci fayeno le ti saatee ya eti Efes fo ti pahaaño pa piti Pentekos,9kaatuko Pútuun pa pípankinaam-pánkin hunkut henfakat le kati hín po páhin peetaake nafaa. Apan intaak lompo hícump pakan keeyemam ti kátaakoolan ti páhin pa putoom.10Niŋ Timote ákeyyoo, niwananoo pinap ancuk kunuuwoo kipepanaa ti pututa aluu, kaatuko oopa ti páhin páhin pa piti Ateeteyo samat nii fa inci iyyem fa.11An timpi áwiiniyanoo. Niyankananoo ancuk áñohooniyoo ti kásuumaay, kaatuko inci niŋ pakan unaa ti káyinan unka ti hítuuluyoo.12Fiye ínkeyyoo ti an unaa ti káyinan Apolos, inci ŋiiniyooŋiino ákey aluu hiyoop ápinapoolii niŋ pakakee kéeyinane ka, pale álafiit ékey fiye cántum. Afáakey niŋ ataakaa káasiiŋuma kiti ékey.13Niyiyo innisiiŋo kíp ti káyinan ka kiti aluu. Inniwen niŋ híyiinate, innitaak sempe.14Níhin waah óo waah niŋ pálafi.15Pakanam ti káyinan, nímeyimeyi nii, Sutefanas niŋ miin ma miteyoo káyaañe kayeno kéeyinane ti mah ma miti Akayi, apan nkawufan faŋii ti páhin pa piti kaayankanan keesampanee ka pakati Pútuun pa. Fiye inci piŋiino aluu eehe:16Nítuul pakan paka payenka fiyuu niŋ payenka nkáhin ka neyii niŋ saanii púlooŋ.17Inci súumaamsuum ta Sutefanas, Footunatus niŋ Akayikus nkákeyyaam fa hiyoop. Cukaacuk fiye nii aluu faŋ aluu niyeniye le.18Kaatuko kamonanaamonan yaanam samat nii fa nkamonane fa sitaaluu sa. Ooto pakan paka payenka fiye, nicokii sipees súsupak.19Picanku pa púlooŋ piti mah ma miti Asii pikicanaa aluu. Akilas niŋ Prisila, niŋ kéeyinane ka púlooŋ payenka nkaconcoolo ka lati enuuf ya eteyii, kakicanaa aluu meemak ti caacaw ca citi Ateeteyo.20Kéeyinane ka púlooŋ keeyem ka pe kakicanaa aluu.
Nikicanool niŋ kaasumpool samat nii fa kéeyinane ka nkáhin fa.21Inci Póol kiice kakican enke niŋ epeesam.22Niŋ an álafiit Ateeteyo, añanee. Kéy, awe Ateeteyo!23Alímaati Ateeteyo Yéesu asampan aluu.24Inci láfilafi aluu púlooŋ ti Yéesu Eenucee ya.
Nikicanool niŋ kaasumpool samat nii fa kéeyinane ka nkáhin fa.21Inci Póol kiice kakican enke niŋ epeesam.22Niŋ an álafiit Ateeteyo, añanee. Kéy, awe Ateeteyo!23Alímaati Ateeteyo Yéesu asampan aluu.24Inci láfilafi aluu púlooŋ ti Yéesu Eenucee ya.
Wycliffe Bible Translators, Inc.