1 Timote5
1Timpi watan áhampaatiin, pale kúp neyoo pumon samat nii paapaa atii. Cok uhiineen wa payenka anfale ka nii pakatuwi,2incok ñíhampaatiin pakaal paka samat nii síññaayi, niŋ uhiineen pakaal paka payenka anfale ka, cokii lompo samat nii pakahoopi niŋ pámiiloolal peekuule naat.3Mankool piyaaŋat pa payenka pákayiinii keekete, apan kataakut an.4Pale niŋ eyaaŋat etaakaa epuuk niŋ fotom keesokoo maamaa, payenkuu kañaŋaa káyaañ káyipen hítuulu Pútuun pa ti kaamankooloo samat nii fa naamankoolii fa hínum. Eehuu Pútuun pa mpílafiye kápihin.5Fiye eyaaŋat eetaakut an apan naakatee lamayoo, nanannaŋ cíki ya eteyoo ti Pútuun pa, natowo ti kaluum etempo hánant hanakan kati piyankananoo.6Pale eyaaŋat aŋa éeyaañe eloŋ eti pásuumayoo, aketaaket háati fa naayem fa kaloŋa.7Sok pakan paka kátuul kilim enkuu, ancuk timpi kawatanee ti waah.8An óo an eemankoolut pakanoo, picaahaŋ miin ma miteyoo, oom an akatanaakatan káyinan ka, apan an eetaakut káyinan afisakoo.9Le niŋ eyaaŋat afaakiicee ti púkoo ya eeyekane ya ucaw wa uti piyaaŋat pa kati kayankananee, oom aal añaŋaa hitaaku sitiil áwii éhaaciil (60), apan naacoonool ti pinimo pa piteyoo ti áyiinoo.10Añaŋaa piyeno aal aŋa ammeya nii ámeyiyeemeyi ti páhinal peenape, samat nii kaamankool epuuk, nawanan pinap payenka nkakaay ka lateyoo, nañow woot wa uti keesampanee ka pakati Pútuun pa, nayankanan keeyem ka ti kúnuul, apan naaloŋ eloŋoo eti íhinu heenape óo heenape.11Pale uhiineen piyaaŋat pa, timpi kiic ucawii ti púkoo ya. Kaatuko niŋ kunuuwii kuñohiyaa ti pinimo, efikayesan pusonii Eenucee ya.12Nkáhinaa eehuu, kamuuyenaa-muuyen hátikin Pútuun pa, kaatuko kamankut hilim ha hiteyii híyaañ ha tempo.13Apan háati nkanimiit, niŋ ucawii ukiicee ti púkoo ya, etikataak haaci. Efinkatowo kaalelentool ti pukumpaan, apan nkakuuñ. Nkayeno lompo púkuufa nkahelep putum, heeneetaat hiteyii efikasok ho.14Eehuu hiwune inci íllafi uhiineen piyaaŋat pa, kapinimo nene nkataak epuuk, nkamankool punuufii, ancuk akamool a atataak la áfaatii kati ateñal unaa.15Kaatuko pakakee paka kapayaapa piyeso kapinapan Seetaani ya.16Niŋ aal éeyinane ataakaa piyaaŋat ti pakanoo, añaŋii kayankanan. Añaŋut kayokan canku ya niŋ eehuu. Niŋ ayankananii, canku ya éfeeyini kayankanan piyaaŋat pa keetaakut ka an.17Niŋ ñíhampaatiin ña kátintiŋanaa kéeyinane ka pinap, cooy ya eteyii eñaŋaa piyeno fo ñésupak, picaahaŋ ti payenka ammeya ka nii páhinii kakalaŋan niŋ kakaman hilim ha hiti Pútuun pa.18Kaatuko hilim ha hiti Pútuun pa hisok: “Timpi cenk putum híciin heeyem ti ekak uli,” nene hisok lompo: “Ahína añaŋaa hitaaku cooy ya eteyoo.”19Timpi hín kíiti akee ti ñíhampaatiin ña pakati kéeyinane ka niŋ an ácoopiyoo elim eti hinookuyoo, timpi síitan oom an, fo niŋ keetantake kayema pákasupak niŋ fotom pákahaaciil kácoopiyoo yo.20Pale ñíhampaatiin ña keemuuyene ka, watanii hátikin pakan paka púlooŋ, ancuk pakakee ñíhampaatiin ña kafeyaa.21Inci sokuu eehe hátikin Pútuun pa, niŋ Yéesu Eenucee ya, niŋ hátikin pumaleekoo pa peemamalee pa: hín waah ewwa inci insokuu wa ti kaalehanool an óo an, timpi fisakanool an.22Timpi cas hinaŋu sipeesi ti an, ínhinoo apiyeno áhina ati kéeyinane ka. Timpi nanf ti umuuyen wa uti pakakee paka, towo eekuule.23Timpi illaan man lamma, aañaŋaa lompo pálaani elaan wiiñ caahinkilis kamma fa munowi immiseeñ fa niŋ fa alloom fa káakuuñu.24Umuuyen wa uti pakakee paka wéesuume hicuku, upayeepa kameye poko peeloot káhinee kíiti. Pakakee paka nkátikineetikin kápihinee kíiti le niŋ umuuyen wa uteyii éfuumeyiyee.25Moonool moonool muu niŋ páhinal peenape: pikee pa péesuume hicuku, pale háati poonool tempo etipiyolee.
Wycliffe Bible Translators, Inc.