1 Timote4
1Kunuu ka keenape ka kusokaasok eehe picaaŋ cataŋ nii ti kunoom ka kikelan ka, pakakee paka efikayesan káyinan ka pusonii. Efikanapan piseetaani empa mpicaakool pa, niŋ eeha kísaalumant ka nkikalaŋanii ha.2Pakalaŋanal empuu péefulii ti ñícuf ñincaama, payenkuu pukunii peeyanke fo kunuuwii nkiyinaat nene káakatinool heenape niŋ heenaput.3Kasok nii an añaŋut esa niŋ fotom pinimo, nkakitii hili ñikee ñaliyal. Pale Pútuun pa piliile ño. Ooto kéeyinane ka nkámeyi tooñaa ya káyiniyini ño hili, apan nkasok apalaka.4Kaatuko waah óo waah ewwa Pútuun pa mpiliile weenape. Usampanee-sampan pínapii ti hilim ha hiti Pútuun pa niŋ ti kaluum. Ooto paliyal piñaŋutee hipooku pale waah óo waah úyiniyeeyini hili niŋ hisoku apalaka.6Niŋ aakalaŋanaa eehe kéeyinane ka púlooŋ, aafayeno áhina eenape ati Yéesu Eenucee ya. Aáfayisan nii tooñaa ya eti káyinan ka niŋ pakalaŋanal pa peenape pa empa annapane pa puwufanuuwufan sempe samat nii fa paliyal nawufan an sempe.7Timpi paalo kícantiitu keetaakut nafaa keenapoolut niŋ hítuulu Pútuun pa. Hín kata aapiyeno fa Pútuun pa mpílafiye fa.8Kaatuko niŋ an áhinaa kata ti kásowiyan eniinoo apitaak sempe, napaanap caahinkilis, pale apiyeno samat nii fa Pútuun pa mpílafiye fa, haŋa panap ti waah óo waah, kaatuko cooy uyya toko ti eloŋ eyye niŋ fo cancowiyaaw.9Hilim eehuu heehintiyee, an óo an asayan ho.10Eehuu hiwune núuhin piseeñ núuyemi ti kaañañatool, kamma nuunaŋe cíki ya etoonii ti Pútuun pa peeyem pa kaloŋa. Pikina piyem Afakana ya ati pakan paka púlooŋ, picaahaŋ ti kéeyinane ka.11Kalaŋan kéeyinane ka eehuu púlooŋ eeha inci inkiice ha insokii kátuul ho.12Timpi kat an ápitin ti awe kamma ayyem kahiineen. Kúp hiti tooñaa, wen pawenal péesuume Pútuun pa, láfi pakakee paka, hinto Pútuun pa, apan inkuul. Fiyuu kéeyinane ka efikasincan ti awe.13Le niŋ inci fákey puu, coonool ti kakalaŋ hilim ha hiti Pútuun pa hátikin kéeyinane ka, ti kakalaŋanii niŋ ti kaayankananii kapucok piliit ti káyinan ka.14Timpi fiil kawun ka kitii enka Pútuun pa mpuwunuu ka áapiyini íhinu páhin etempo. Eehuu ansaye pínapii ta piyaamakoola pa nkákupe ta, loho ñíhampaatiin ña kanaŋaa sipeesii ti awe.15Was eehuu ti kunuuwi, ufan ho eloŋi púlooŋ, ancuk pakan paka púlooŋ kati kacuk nii aapa ti pikaayu hátikin ti káyinan ka kitii.16Tah kunuuwi ti eloŋ ya etii, niŋ eeha ankalaŋan ha pakan paka. Cok teeho piliit, kaatuko niŋ áahinaa fo, aafafakan faŋi niŋ lompo payenka nkásiitani ka.
Wycliffe Bible Translators, Inc.