1 Timote3
1Eehe hilim heehintiyee: niŋ an álafiyaa piyeno ati hikaw ati kéeyinane ka, páhin peenape náalafiye.2Ekina ewune pakati kikaw ka pakati kéeyinane ka, kañaŋaa piyeno pakan keeyinaatee kawatan ti waah óo waah. Kañaŋaa esa aal oonool kóŋ, nkawen pinap, nkáyini ecocokanoolo, nkáyemi pakati kunuu. Kañaŋaa kawanan pinap pakan paka payenka nkakaay ka teyii, nkáyini kakalaŋan.3Kañaŋut piyeno ñúkumana, keehiñe tom pale kéesuumanana, pakati kásuumaay, apan kéelafiye tom mañ.4Kañaŋaa kátintiŋan miin ma miteyii pinap, epuukii nkákuloolo nkátuulii tan óo tan.5Kaatuko niŋ an ayinaat kátintiŋan miin ma miteyoo, puume áfaayini kaamankool kéeyinane ka pakati Pútuun pa?6Ati hikaw ha ati kéeyinane ka añaŋut piyeno an eenanfe féefiye ti káyinan ka, niŋ fotom áfaaseepinoolo, apan Pútuun pa éfipihinoo kíiti samat nii fa mpíhine fa kíiti Seetaani ya.7Añaŋaa lompo hitaaku caacaw ceenape ti kéeyinanut ka, ancuk timpi kákup kiteyoo heenaput, apan Seetaani ya éteeyiniyoo hikuucu.8Keemamalee ka kapiyeno písisikana pa ti kéeyinane ka, kañaŋaa lompo piyeno keecoonoole, kayeno pusoka tooñaa. Kañaŋut piyeno pilaana kenfakat, kañaŋut hiŋes hitaaku mañ emma nkásuwatut temmo.9Kañaŋaa hicoku piliit niŋ kunuu keetempane tooñaa ya eti káyinan ka eyya Pútuun pa mpíyisane ya.10Kañaŋee lompo puwinko pinap, niŋ kacukut teyii waah weenaput, káyiniyini piyeno písisikana ti kéeyinane ka.11Pakaal paka lompo kañaŋaa piyeno keecoonoole, apan kañaŋut púkuuf. Kañaŋaa ecocokanoolo, nkayeno pakan keehintiyee fanfaŋ.12Písisikana pa, an óo an teyii añaŋaa esa aal oonool kóŋ. Kañaŋaa kátintiŋan epuukii pinap, niŋ keeyem ka lati punuufii.13Písisikana pa, nkáhinaa pinap éfikamulee, apan nkáyini káatuunan niŋ híyiinate henfakat káyinan ka kiteyii ti Yéesu Eenucee ya.14Hínaahin cíki nii toko fiye inci kéyyuu hiyoop. Pale inci kiicuukiic eehe ancuk,15niŋ ékey ya etoom ekuutaa, ímmeyi fa an óo an eeyem ti miin ma miti Pútuun pa naañaŋe hiwenu. Miin emmuu miyem kéeyinane ka pakati Pútuun pa peeyem pa kaloŋa, keecuke ka samat nii hiniŋ hícook hiti ekumpaan la tooñaa ya neenaŋiye la.16Pánipani, eeha Pútuun pa mpíyisane ha unaa ti káyinan ka kiti unaa henfakat, an ayinaat ho káalaacin. Hikina hiyem eehe:Yéesu Krista ákeyyookey náayenoonii an,Kunuu ka keenape ka nkíyisan nii eecoonoole.Pumaleekoo pa mpucukoo,pinapana pa pakateyoo nkátuunan kiteyoo ti písii pa púlooŋ.Pakan paka pakati púlunta pa nkáyinan teyoo,Pútuun pa mpíseepinoo alacana la haŋe la pamake.
Wycliffe Bible Translators, Inc.