1 Timote2
1Fiye, piŋiino aluu, heehaŋe ha hitaaku hikaw hiyem, niluum meemak Pútuun pa kiti pakan paka púlooŋ niŋ eeha nkasoolahe ha, apan innisok po apalaka kiteyii.2Niluum po kiti pumansa pa, niŋ kiti pakati kikaw ka púlooŋ, ancuk uloŋaa ti kásuumaay peetaakut kúnuul. Fiyuu éfuuwaayeenaa ti hítuulu Pútuun pa núuhinaa eeha mpílafiye ha.3Eehuu hinape, apan níhisuum Pútuun pa Afakana ya ati unaa.4Pílafilafi pakan paka púlooŋ kati kafakanee, nkámeyi tooñaa ya.5Kaatuko Pútuun poonool lamma pitaakiye, apan an oonool ayem ti pututa Pútuun pa niŋ pakan paka kati ásuumiyanoolii: akina ayem áyiin a Yéesu Eenucee ya,6eewufane ya eloŋ ya eteyoo, apucooy ancuk pakan paka púlooŋ kafakanee. Pútuun pa mpíyisan unaa eehuu ta incole ta toko.7Eehuu hiwune Pútuun pa mpíhinam apoñapoñ kati túunan inkalaŋan keeneetaat ka Pusuwif kiti káyinan ka niŋ tooñaa ya. Inci caamut, tooñaa ya inci iyyem ti hisoku.8Ooto inci láfilafi pákayiin paka pan óo pan kati kaluum, nkáseepin sipees seekuule péeñikenut niŋ fotom píñakalool.9Inci láfilafi lompo pakaal paka kati nkásoolo pútuuno, timpi kaŋes éyisanoolo niŋ fotom nkamuusan. Timpi kaŋes lompo éyisanoolo ti papuŋiyalii, ti puwasoyii pisanoo, pumaan, niŋ fotom wañ wéeciita hinoom.10Pale nkáyisanoolo ti pawenal peenape, peenapoole niŋ pakaal keesoke nii kafeyaafe Pútuun pa.11Pakaal paka, nkayeniyee kakalaŋan kañaŋaa kafatan niŋ ewananoolo pántoon.12Inci coonut aal apikalaŋan niŋ fotom naataak sempe ti áyiin. Añaŋaa kafatan.13Kaatuko Ataam átikine aliilee, púful toko Eef naaliilee.14Apan Ataam tom acaakoolee faw, pale aal a acaakoolee, náayenoonii amuuyena.15Pale pakaal paka efikafakanee pínapii ti hipuku ha hiteyii epuuk, niŋ katowiyaa ti káyinan ka, ti pálafi, ti pakuul niŋ ti ecocokanoolo.
Wycliffe Bible Translators, Inc.