1 Timote1
1Inci Póol, apoñapoñ ati Yéesu Eenucee ya samat nii fa Pútuun pa peeyem pa Afakana ya ati unaa mpusoke fa niŋ lompo Yéesu Krista eeyem ya cíki ya eti unaa, kicanaa.2Inci oopa ti hikiicu awe Timote, aŋa inci incoke ya nii añiinam ati pánipani ti káyinan. Alímaati Pútuun pa Paapaa ati unaa, niŋ Ateeteyo ati unaa Yéesu Eenucee ya kasampani, nkataak paket hikaw ti awe, nkawufani kásuumaay.3Fiye samat nii fa inci iŋŋiiniyuu fa ta inci iyyeniye ta pikaayu ti mah ma miti Masetoni, towo Efes aakati kúpanan keeyem ka ti kakalaŋan heeneetaat ha tooñaa kati káyekuno.4Kúpananii kápiyekuno kanapan kícantiitu keetaakut nafaa niŋ káakup keepayantoo kiti nampuke símaama. Eehuu púlooŋ píñakalool lamma níhicoopii. Hitaapala hiyankanan an ti páhin pa piti Pútuun pa, empa mpíhinee pa niŋ káyinan.5Hikaw ha hiti kákupanan enkuu hiti íhinu kéeyinane ka kápilafooli niŋ pálafi péefulii ti yaan eekuule, kunuu keetempane, niŋ káyinan kiti pánipani.6Pakakee paka kayesanaayesan pusonii eehuu, apan nkáyemi ti káakup kiti waah weetaakut nafaa.7Kálafilafi piyeno pikalaŋana pakati hilim ha heesiiŋanee ha hiti Móyiis, pale kámiit eeha nkayem ha ti hisoku niŋ fotom eeha nkayem ha ti kakalaŋan pakan paka niŋ híyiinate.8Uméyiyaameyi nii hilim ha heesiiŋanee ha heenape niŋ an akalaŋanaa ho pitempo.9Eehe nuuñaŋaa kameye nii, hilim ha heesiiŋanee ha hisiiŋanutee hak keecoonoole ka. Pale hisiiŋanee-siiŋan hak kéetuulut ho ka niŋ kéetuulut ka Pútuun pa, keekance ka niŋ pumuuyena pa, keepooke ka Pútuun pa niŋ waah óo waah weekuule, payenka nkamuk ka pupukayii, niŋ pumukala pa púlooŋ.10Hilim ha hisiiŋanee-siiŋan lompo hak ñusupoolata ña, pákayiin paka payenka nkahinto ka niŋ pákawiyii pákayiin niŋ fotom pakaal paka payenka nkahinto ka niŋ pákawiyii pakaal, payenka nkanooman ka pimiikan, ñincaama ña niŋ payenka nkanook ka pakan, niŋ payenka nkawen ka pawenal óo pawenal peekufut niŋ pakalaŋanal pa piti tooñaa ya.11Waah ewwa inci inkalaŋane wa púlooŋ, unapoolaa-napool niŋ ekooŋan ya éesuume ya eekamane ya kiti hamake ha hiti Pútuun pa peesampanee pa. Ekooŋan eyyuu mpuñomanaam.12Inci oopa ti hisoku Ateeteyo ati unaa Yéesu Eenucee ya apalaka, kamma naacokaam nii eehintiyee naayonkalam kati hín páhin pa piteyoo, apan naawufanam sempe.13Le niŋ inci fáyinan ti Yéesu, kúpantoo heenape teyoo, inteñaloo lompo, apan inkallan pakanoo. Pale naataak paket hikaw ti inci, kaatuko waah óo waah ewwa inci ínhine, hínaahin wo ti káameyaati, apan yínanut teyoo.14Ateeteyo ati unaa Yéesu Eenucee ya anapaanap ti inci fo muus, naasampan eloŋam meemak niŋ káyinan niŋ pálafi samat nii piteyoo pa.15Eehe hilim heehintiyee, an óo an asayan ho: Yéesu Eenucee ya ákeyyookey ti púlunta pa kati afakan pumuuyena pa, inci haŋii púlooŋ káanapaati.16Pale Yéesu Eenucee ya naataak paket hikaw ti inci, kati áyisan pakan paka pínapii ti inci eeyem ya amuuyena ya enfakat a fa naataake fa kamukut kenfakat. Ahínaahin eehe ancuk pakakee paka payenka éfikayinan ka teyoo, kataakaa eloŋ ya eepayantoo ya.17Pútuun pa piyem Amansa ya eeyem ya ti hikaw ha fo cancowiyaaw. Piketantoo, an ayinaat po hicuku, apan pikina lamma piyem Pútuun pa. Alímaati an óo an ámakiyan po náamul po fo cancowiyaaw púley. Amíini.18Añiinam Timote, inci oopa ti katiyani pitiyo empe, peenapoole pa niŋ eeha piyaamakoola pa nkasoke ha faw kitii. Niŋ kilim ka keewufanuu ka enkuu sempe, áafayini pítaakool pinap ti hikam ha hiti Ateeteyo.19Cok piliit ti káyinan ka, intah kunuu aakati hín heecoonoole, ancuk kunuuwi kitempanaa. Pakakee paka kapookaapook íhinu eehuu fo káyinan ka kiteyii nkúpuciye samat nii piteen peelooŋe énankiin mpihawo.20Fiyuu Himene niŋ Aliksant nkáhine, payenka inci uwwufane ka Seetaani ya, kati kákulee nkáyekuno kateñal Pútuun pa.
Wycliffe Bible Translators, Inc.