1 Kolint8
1Fiye ínkeyyoo ti efoofa eewaaseenee ti pínaati: nikiicaakiic ti leetal ya eti aluu nii, “unaa púlooŋ utaakaataak kameye.” Páni innisoke! Pale kameye nawaswas an émakiyanoolo, apan pálafooli naalut písiyool.2Niŋ an ámiiloolaa nii ámeyimeyi waah, aloot ámeyi fala samat nii fa an naañaŋe kameye.3Pale niŋ an álafiyaa Pútuun pa, Pútuun pa pímeyiyoomeyi.4Ooto fo úyiniyaayini hili efoofa eewaaseenee ti pínaati? Uméyiyaameyi nii, “énaati waah tom ti púlunta empe,” apan “Pútuun poonool lamma pitaakiye.”5Páni taakaataak hícump pínaati peeyem patiila niŋ t’etaam empa pakan paka nkacoke samat nii ñútuun niŋ ekina tom ñíhampaatiin.6Pale ti unaa, Pútuun poonool lamma pitaakiye: pikina piyem Paapaa ya eeliile ya waah óo waah, apan núuyemiyaa kaloŋa hak pikina. Ahámpaatiin oonool lamma ataakiye lompo: akina ayem Ateeteyo Yéesu Krista, eewune ya waah óo waah nuuliilee, akina lompo awune núuyemiyaa kaloŋa.7Pale pakan paka tom púlooŋ kameya tooñaa eyye. Pakakee ti kéeyinane ka kasalaasal hínum pínaati neewun niŋ kaliyaa efoofa eewaaseenee tempo, nkasok nii waah wa weewaaseenee wa nkayem ti hili. Kátuuniit ti káyinan ka kiteyii, ekina ewune, niŋ kaliyaa yo, kunuuwii kitempanantoo, kamma incukii nii káhinaahin waah weekuulut ti Pútuun pa.8Apan paliyal ayinaat kakolan unaa niŋ Pútuun pa: niŋ uliitaa efoofa ya, waah étuukaasino ti unaa, niŋ uliyaa yo lompo waah etuupenano ti unaa.9Níyiniyini hili efoofa eyyuu, pale nitah kunuu ti eeha ínnihin ha, ancuk timpi niwas kéetuuniit ka ti káyinan ka kiteyii kapumuuyen.10Niŋ an éetuuniit ti káyinan ka kiteyoo acukuu ti hili la nkawaaseen la, apan awe an eetaake kameye kenfakat, fo aatiwasoo hili efoofa eewaaseenee ti énaati?11Ooto kameye ka kitii kuwunaawun ani ti káyinan, éetuuniit ya ti káyinan ka kiteyoo náapuco, ántuŋ Eenucee ya aketaaket kiteyoo.12Niŋ nimuuyenaa fiyuu ti pakan aluu ti káyinan, inniwun kápihin eeha nkámiiloole ha nii hinaput, inniwun káyinan ka kiteyii kípikaasino; nimuuyenaa-muuyen ti Eenucee ya himuumoo.13Ooto iyyema nii efoofa ya eyya inci illiye ya efeewun anam ti káyinan naanow ti kaamuuyen, inci etinene li efoofa cántum, ancuk etiwun naanow ti kaamuuyen.
Wycliffe Bible Translators, Inc.