1 Kolint7
1Fiye inci píkey ti eeha innicakanaam ha ti leetal eyya innikiicaam ya, man fo káasayaati anapaanap ti áyiin. 2Ee napaanap, pale kamma casupoolat naameeŋe, ooto haŋa panap áyiin óo áyiin ataak aal, aal óo aal lompo ataak áyiin.3Ayíin añaŋut hipooku aaloo ti ecunkun, aal a lompo añaŋut hipooku áyiinoo.4Aal a, fiye eniinoo eteyoo tom, pale eti áyiinoo. Ayíin a lompo, eniinoo eteyoo tom, pale eti aaloo.5Timpi pook áwiyi ti ecunkun, fo niŋ nísiyoolaa nípituul fo caahinkilis hátikin, ancuk nicoonoolaa ti kaluum. Pale niŋ eehuu hipayaa niñoho ti pinimo pa piti aluu. Niŋ níhinut eehuu, pikee pa étiniyini ecocokanoolo, apan Seetaani ya neetaak pítin piti híluuŋu aluu.6Inci sokut aluu níhin fiyuu, haani. Pale ínnihinaa fo, nimuuyenut.7Niŋ ti pásuumayam, pakan paka púlooŋ kayeno peesayut peenimiit samat nii inci. Pale an óo an ataakaataak eeha Pútuun pa mpuwunoo: aŋe eehe, akee eeha.8Eehe inci fasok keesayut ka niŋ keenimiit ka, niŋ piyaaŋat pa payenka pákayiinii keekete ka: napaanap kaputowo samat nii inci.9Pale niŋ kayinaat ecocokanoolo, pákayiin paka kasa, pakaal paka lompo nkanimo. Kaatuko haŋa panap pákayiin paka kapisa, pakaal paka nkanimo, le niŋ pálafi pihinto niŋ akee efipihaŋii sempe.10Keesaye ka niŋ keenimiye ka, hilim eehe hiteyii (hífuliyoot ti inci, pale ti Ateeteyo): Aal eenimiye añaŋut hífulu ti áyiinoo.11Pale niŋ áfulaa, timpi animo nene, ti áyiinoo lamma naayina puñoho ancuk kásiyoolaa. Ayíin lompo añaŋut káfulan aaloo.12Ti pakakee paka ti aluu, hilim eehe inci fasok aluu (Ateeteyo tom asoke hilim eehe): niŋ áyiin éeyinane ataakaa aal éeyinanut, apan aal a naacoon kaputowo nantoonool, áyiin a añaŋutoo káfulan.13Fo lompo incuke, niŋ aal éeyinane ataakaa áyiin éeyinanut, apan áyiin a naacoon kaputowo nantoonool, aal a añaŋut hífulu.14Kaatuko áyiin a éeyinanut a, Pútuun pa pucokoocok nii an eekuule kamma aaloo éeyinane ya; aal a éeyinanut a lompo, Pútuun pa mpucokoo nii an eekuule kamma áyiinoo. Niŋ eehuu tom epuukii anti kayeno samat nii kéeyinanut ka, apan ti páni ya, poko lompo keekuule.15Pale niŋ éeyinanut a álafiyaa hipayu pinimo pa, kapa po. Niŋ eehuu hitaakiyaa, éeyinane ya aneetaat nene ti sempe sa siti hilim ha heesiiŋanee ha hiti pinimo pa, kaatuko Pútuun pa piyonkalaa-yonkal aluu nipiloŋ ti kásuumaay.16Pale inci picakan aluu eehe: awe aal a, fo áameyimeyi man áafayini kafakan áyiini? Awe lompo áyiin a, fo áameyimeyi man áafayini kafakan aali?17Niŋ eehuu hipayaa, insok aluu nii, an óo an aloŋ eloŋ ya eteyoo samat nii fa Ateeteyo naawufanoo fa, samat nii fa naayeniye fa ta Pútuun pa mpiyonkaloo ta ápiyinan tempo. Eehuu inci ninsok picanku pa púlooŋ.18Iyyema an eenakiye ta Pútuun pa mpiyonkaloo ta, timpi aŋes éyenoonii samat nii an eenakiit. Fo lompo incuke, niŋ an anakiit ta Pútuun pa mpiyonkaloo ta, timpi anako.19Pinako niŋ fotom káanakiyaati, eehuu hitaakut nafaa ti Pútuun pa. Heetaake ha nafaa tempo hiyem hítuulu kilim etempo.20An óo an atowo fa naayeniye fa ta Pútuun pa mpiyonkaloo ta.21Fo aayenaayeno amiikan, ta Pútuun pa mpiyonkaluu ta? Eehuu timpi hiwasi kúnuul. Pale niŋ aataakaa pítin piti hifaku himiikanate, hín ho.22Kaatuko amiikan aŋa Ateeteyo naayonkale afakaafak ti himiikanate kamma naayem ati Ateeteyo. An óo an lompo eeneetaat amiikan apan Eenucee ya naayonkaloo, áyenooniyoo-yeno amiikan ati Eenucee ya.23Pútuun pa pucooyaacooy cooy enfakat pupunoom aluu. Ooto timpi niyeno pimiikan pakati an.24Pakanam ti káyinan, an óo an ayeno hátikin Pútuun pa samat nii fa naayeniye fa ta mpiyonkaloo ta.25Fiye eeha innicakanaam ha kiti keenimiit ka, eeha inci inkaakaay ha hisoku, síit ho ti Ateeteyo. Pale pusok aluu pámiiloolalam, samat nii an aŋa Ateeteyo naataake teyoo paket hikaw ápihinam piyeno eehintiyee.26Kamma kúnuul ka enka nuuyemaa ka fiye tenko, cukaamcuk nii fisaka an óo an atowo fa naayem fa.27Fo aasayaasa? Timpi ŋes káfulan aali. Fo aasayut? Timpi ŋes esa.28Pale niŋ aasayaa, aamuuyenut. Niŋ ámaacul lompo animiyaa, amuuyenut. Pale keesaye ka niŋ keenimiye ka efikacuk kúnuul ti eloŋ ya eteyii, apan inci láfiit nipicuk kúnuul enkuu.29Pakanam ti káyinan, eehe inci íllafiye hisoku: kunoom ka keetowiye ka kimeeŋut. Písik fíyooy, keesaye ka kañaŋa eloŋ pucuk fiye nii keesayut.30Keeyem ka ti pukooŋ lompo, káhin fiye nii kaneetaat ti pukooŋ; keeyem ka ti pásuuma, nkáhin fiye nii kaneetaat ti pásuuma; payenka nkanoom ka waah, nkáhin fiye nii kataakut aŋa nkanoome ya;31payenka nkásisikool ka niŋ waah wa uti púlunta empe, káhin nii kaneetaat ti káasisikool newwo. Kaatuko púlunta pa fa mpiyem fa fiye etipifiyo.32Inci láfiit kati niwasoolo káamiilool. An óo an eesayut námiilool-míilool hiti Ateeteyo, naŋes íhinu héesuume ha Ateeteyo.33Pale eesaye ya, námiilool-míilool waah wa uti púlunta empe, ekina eyem hiŋesu héesuume ha aaloo.34Ooto pámiiloolal pa piteyoo pípaacinoolee-páacinool. Aal eenimiit niŋ fotom ámaacul éemiit áyiin, aŋuu hiti Ateeteyo námiilool. Aláfilafi piyeno ateyoo ti eniinoo púlooŋ niŋ ti kunuuwoo púlooŋ. Pale aal eenimiye, hiti púlunta empe námiilool, naŋes íhinu héesuume ha áyiinoo.35Inci sokaasok eehuu hak kásuumaay ka kiti aluu, pale neetaat hiti katiyan aluu waah. Inci láfilafi lamma nipitaak eloŋ eecoonoole, innicok piliit ti Ateeteyo peeciimanoolut kunuu aluu.36Fiye úkeyyaa ti keeŋaame ka ekop: niŋ akampaani acukaa nii oopa ti pítin piti íhinu heenaput niŋ asupooloo, kamma naayinaat ecocokanoolo, náamiilool nii añaŋaa esa, kanimo samat nii fa náalafiye fa; amuuyenut. 37Pale niŋ akampaani ya asiiŋiyaa kíp nii atasa ámaacul a, apan an aneetaatoo ti hítunku apisa, naacuk nii áfaayini ecocokanoolo peesayut, áhinaahin lompo heenape.38Ooto niŋ asayaa asupooloo, heenape náahine, niŋ asayut asupooloo, ahaŋa íhinu heenape.39Aal eenimiye aloŋaaloŋ ti sempe sa siti hilim ha heesiiŋanee ha hiti pinimo pa niŋ áyiinoo oopa kaloŋa, pale niŋ áyiinoo aketaa, áyiniyini pinimo ti áyiin óo áyiin aŋa ínsuumoo. Hoonool lamma hiyem toko, hikina hiyem oom áyiin añaŋaa piyeno éeyinane ti Ateeteyo.40Pale afaahaŋ naataake pásuuma niŋ animiit nene. Eehuu hiyem pámiiloolalam, apan inci yínanaayinan nii inci lompo taakaataak Kunuu ka keenape ka kiti Pútuun pa.
Wycliffe Bible Translators, Inc.