1 Kolint6
1Niŋ akee ti aluu ataakoolaa niŋ akee, fo áfaahaañi hicoopu eehuu hátikin kéeyinanut ka ápihinee kíiti? Fo añaŋut ho hicoopu hátikin pakan paka keesampanee ka pakati Pútuun pa ápihinee kíiti?2Fo nímiit nii keesampanee ka éfikahin kíiti púlunta pa? Niŋ éfinihin kíiti púlunta pa, fo étiniyini íhinu kíiti waah wa wenkilis wa?3Fo nímiit lompo nii éfuuhinaa kíiti pumaleekoo pa? Ooto fo uyinaataa íhinu kíiti waah wa uti eloŋ ya eyye?4Innitaakaa píciitool peecuke fiyuu, fo efinikaay hiŋesu kíiti ti payenka ammeya ka nii, eloŋ ya eteyii kéeyinane ka ti Yéesu kátinaatin yo?5Inci pusok aluu eehe pusuuwan aluu. Fo nitaakut an ti aluu eecohatiye eeyina íhinu kíiti niŋ kéeyinane ka kataakoolaa?6Pale pakan ti aluu nkacoopcoop pakanii ti káyinan ti éhinuma kíiti, apan eehuu hátikin fala keetaakut ka káyinan!7Niŋ akee ti aluu acoopaa akee kíiti, nípuulaapuul pántoon. Fo haŋut fala panap nipilaahee, niŋ ekina tom nípihinee tapalee?8Pale fiye, aluu faŋ aluu niyem ti hilaahu niŋ tapalee pakan aluu ti káyinan.9Fo nímiit nii payenka nkáhin ka heenaput etikataak himpaac ti cáwii ca citi Pútuun pa? An timpi acaakool aluu: pusupoolata pa, payenka nkátuul ka pínaati, payenka nkahinto ka niŋ pakaal keenimiye, pihintiya pa niŋ pákawiyii pákayiin,10pílipa pa, kéelafiye ka hitaaku fo muus, púkumana pa, piteñala pa niŋ pitapaleeya pa, payenkuu púlooŋ etikataak himpaac ti cáwii ca citi Pútuun pa.11Fiyuu pakakee paka ti aluu nkacuke ti púcook pa. Pale innikuulanee, inniyenanee ti kaapii hak Pútuun pa, innicokee pakan keecoonoole hátikin Pútuun pa ti caacaw ca citi Ateeteyo Yéesu Krista, niŋ Kunuu ka keenape ka kiti Pútuun pa.12Pakakee ti aluu nkasok: “Waah óo waah ewwa inci íllafiye íhinu, ucooneecoon.” Eehuu páni, pale waah óo waah tom unape ti aluu. “Waah óo waah ewwa inci íllafiye íhinu, ucooneecoon.” Eehuu páni, pale inci eticoon piyeno amiikan ti waah.13Nkasok lompo: “Paliyal ataakaataako hak munow, munow naataako hak paliyal.” Eehuu páni, pale hikee hinoom Pútuun pa éfipupucalool paliyal pa niŋ munow ma púlooŋ cew. Enii eneetaat hak casupoolat, pale hak Ateeteyo, apan Ateeteyo naataako hak enii ya.14Pútuun pa péelitanii pa Ateeteyo ti eket ya, efi lompo pílitanii unaa ti eket ya ti sempe etempo.15Fo nímiit nii sinii aluu ti Eenucee ya insiyem? Fo napaanap an apucoop eniinoo eeyem ya eti Eenucee ya, naawufan yo aal ahaañiya? Haani, hitaakiit!16Fo nímiit nii, niŋ an ahintiyaa niŋ aal ahaañiya, káyenooniyoo-yeno enii yoonool? Kaatuko ínkeyyoo ti áyiin niŋ aal, hilim ha hiti Pútuun pa hisok: “Poko t’ésupakii nkáyenoonii oonool.”17Pale niŋ an acoopaa eniinoo naawufan yo Ateeteyo, aayenooniyoo-yeno neyoo kunuu koonool.18Nitey casupoolat! Kaatuko ukee umuuyen wa púlooŋ ewwa an náhin, tíkitaaŋ eniinoo nuuyem. Pale an óo an eemuuyene ti casupoolat, ti eniinoo faŋ eteyyo naamuuyene.19Fo nímiit nii sinii aluu siyem ekumpaan ya eti Kunuu ka keenape ka keeyem ka ti aluu, enka Pútuun pa mpuwune ka aluu? Sinii aluu siti aluu tom,20Pútuun pa pucooyaacooy cooy enfakat pupunoom aluu. Ooto niñaŋaa po kámakiyan niŋ sinii aluu.
Wycliffe Bible Translators, Inc.