1 Kolint5
1Usíyaasi pan óo pan nii casupoolat unca ti pututa aluu, eeha ammeya nii háati kéemiit ka Pútuun pa káhinantoo: akee áyiin fala oopa ti pihinto niŋ faafoo aaloo.2Apan ínniyemi ti émakiyanoolo! Fo niñaŋut esampoolo, ínnifulan áyiin a eeyem a ti íhinu eehuu ti pututa aluu?3Inci láaŋaalaaŋ aluu, pale kunuuwam unka ti aluu. Inci payaapa íhinu kíiti áyiin a éehine ya eehuu pucuk fiye nii inci oopa puu niŋ aluu.4Niŋ niconcooliyaa ti caacaw ca citi Ateeteyo Yéesu ati unaa, kunuuwam efikiyeno niŋ aluu, sempe sa siti Ateeteyo Yéesu ati unaa lompo insiyeno niŋ aluu.5Ti econcoolo ya eyyuu, nicoop áyiin a aŋuu nipiwufanoo Seetaani ya ancuk kunuuwoo keenaput ka kúpucaloolee, yaanoo neefakanee ti hinoom eeha Ateeteyo naakaakaay ha éñohoonii.6Fa innimaayoolo fa naput! Fo nímiit nii caahinkilis leweñoo nékuntan hímaaf púmpuluŋ?7Ooto nífulan ti pututa aluu kaamuuyen enkuu keecuke ka nii leweñoo eefiyye, ancuk niyeniyaa pakan keekuule. Efíniyenoonii samat nii hímaaf héeyeeni heetaakut leweñoo, apan aŋuu inniyem fanfaŋ, kamma Eenucee ya naakete ti putum pa piti unaa. Akina ayem císaacii ca ceewaaseenee ca ti hinoom ha hiti pahaaño pa piti Himuusu ha.8Ooto uhaañiyaa pahaaño pa, neetaat niŋ kúmpuul keetaake leweñoo eefiyye, kiti heenaput niŋ pakanc, pale uhaañiyaa niŋ pakuul niŋ tooñaa ancuk ucukaa nii kúmpuul keetaakut leweñoo.9Inci sokaasok aluu ti leetal ya eyya inkiice ya aluu nii timpi ninakanoolo niŋ pusupoolata.10Pale ta inci inkiice ta eehuu, yeniit hisoku nii, niñaŋaa hílaaŋu pusupoolata pa kéeyinanut ka, niŋ ekina tom kéelafiye hitaaku fo muus, niŋ ekina tom píhina tapalee pakan, niŋ ekina tom pútuula pínaati kéeyinanut. Innílafiyaa hílaaŋu pakan paka payenkuu púlooŋ, ooto fo nikatan púlunta empe!11Eeha inci íllafiye ha hisoku aluu hiyem: niŋ an asokaa nii akina anapana Yéesu, háati fo náayemi ti eloŋ eti casupoolat, eti pálafi hitaaku heemuuse, eti hítuulu pínaati, eti kateñal, eti ékuman, niŋ eti tapalee pakan, timpi ninakanoolo niŋ payenkuu fiyaaw. Timpi nili fala neyii.12Eyyeyme haaci inci intaake kati hín kíiti keeyem ka tíkitaaŋ kéeyinane ka? Fo keeyem ka páhantuwa tom inniñaŋe íhinu kíiti?13Pútuun pa éfipihin kíiti keeyem ka tíkitaaŋ. Hilim ha hiti Pútuun pa hisok: “Nífulan an a eenaput a ti pututa aluu.”
Wycliffe Bible Translators, Inc.