1 Kolint4
1Ooto niñaŋaa hicoku unii samat nii píhina pakati Eenucee ya lamma, pakan keeñomanee káatuunan tooñaa ya eyya Pútuun pa mpíyisanut ya hínum.2Heeñaŋe ha ti an eeñomanee páhin, hiyem kati áhin po samat nii an eehintiyee.3Pale inci, ínnihinaam kíiti, niŋ fotom pakakee nkáhinam kíiti, eehuu waah tom ti inci. Inci hínantoo fala faŋam kíiti.4Inci watanooliit ti waah, pale ekina éyisanut nii inci eekuule ti waah óo waah. Ahínayam kíiti ayem Ateeteyo.5Ooto timpi níhin an kíiti le niŋ hinoom ha éfihicolii. Nítuul fo niŋ Ateeteyo ácoliyoo. Afáafulanii ti ecaaŋ ya heeyolee ha ti énimaan ya, apan náayisan lompo pámiiloolal an peeyolee pa. Ti oom caanak an óo an, Pútuun pa éfipumuloo ti eeha náahine ha.6Pakanam ti káyinan, eeha inci insoke ha aluu, heeyem ha ti inci faŋam niŋ Apolos incoope pikalaŋan aluu, ancuk nimeya eeha hilim eehe nihisoke. Hisok: “Nileh ti heekiicee ha.” Inníhinaa eehuu, an ti aluu átamakiyanoolo ti kanapan akee naapook akee.7Pale awe, fo awe yem ayme eehaŋe pakakee paka? Fo Pútuun pa tom puwufanuu eeha púlooŋ antaake ha? Incukaa fiyuu, weyme uwune aakati mákiyanoolo niŋ waah ewwa antaake wa, pucuk fiye nii aawufanutee wo?8Fo cukaacuk aluu nii nipayaapa hitaaku waah óo waah ewwa innisoolahe? Fo nipayaapa piyeno kusaanum? Fo niyenaayeno pumansa, apan unii uneetaat? Inci láfilafi nipiyeno pumansa pánipani, ancuk unii lompo uyeniyaa pumansa ti coonool niŋ aluu!9Pale cukaamcuk nii, unii pupoñapoñ pa, Pútuun pa píhinaahin unii upuyeno pakan kéekelanii ti pakan paka. Núuyemi samat nii pakan keeñaŋee himuku ti kíliŋ ka. Pakati púlunta pa, focaa pumaleekoo pa, nkáyemi unii ti kaasincan.10Unii, pakan paka kacokaacok unii samat nii pusoŋ kamma Eenucee ya, pale aluu, innisok nii aluu pakan keecohatiye ti Eenucee ya! Nuucokee nii pakan keetaakut sempe, pale innisok nii aluu keetaake sempe! Aluu kéemakiyanee, unii kéewiiniyanee!11Háati ti waati eyye unii unka niŋ peep, pálaani mpucok unii, apan utaakut pásooliyal. Nuusapeesap, te uyinaat piyeno nantoonool.12Núuhinhin páhin peeseeñe niŋ sipees unii kati uli. Niŋ an ateñalaa unii, nuusampanoo. Niŋ ukallanee, nuumukut.13Niŋ an asokaa ti unii heenaput, nuuñahanoo pinap. Háati fo fíyooy, pakan paka kacokaacok unii samat nii hicees ha hiti púlunta pa, la nkawant la weelecate wa.14Inci kiicut aluu eehe kati suuwan aluu, pale kati kúpanan aluu samat nii epuukam payenka íllafiye.15Háati innitaak pikalaŋana pakati pítin pa piti Eenucee ya kayema síwuli ŋaasuwan, niyinaat hitaaku hícump ñífaaf. Apan pánipani ti eloŋ ya eti aluu ti Yéesu Eenucee ya, inci yem paapaa ataaluu, kaatuko inci tíkine túunan aluu ekooŋan ya éesuume ya.16Ooto inci piŋiino aluu, níyipenanam.17Ekina ewune inci ímpoñii aluu Timote, eecuke ya nii añiinam aŋa inci íllafiye ya, apan eehintiyee ti Ateeteyo. Afáanawunan aluu fa eloŋ ya etoom neecuke fa ti pítin pa piti Yéesu Eenucee ya. Eloŋ eyyuu inci inkalaŋan pakan paka pan óo pan ti picanku pa púlooŋ.18Pakakee ti aluu nkámakiyanoolo ti hisoku nii, inci etinene kéy aluu hiyoop.19Pale niŋ Ateeteyo acoonaa, inci fákey toko fiye. Tempo inci fámeyi nii, man payenka nkákup ka ti émakiyanoolo kataakaataak sempe sa siti Pútuun pa, man me haani.20Kaatuko cáwii ca citi Pútuun pa cineetaat káakup lamma, pale citi sempe.21Weyme ínnilafiye? Fo nílafilafi inci píkey ti aluu niŋ hikasap, niŋ fotom kéy píyisan aluu pálafi niŋ pamon?
Wycliffe Bible Translators, Inc.