1 Kolint3
1Pakanam ti káyinan, páni ta inci iyyeniye ta puu ti aluu, yinaat káakup naaluu samat nii fa an nákup fa niŋ pakan keetaake Kunuu ka keenape ka. Kúpaakup naaluu samat nii fa an nákup fa niŋ keeyem ka ti hiŋes waah wa uti púlunta empe lamma, samat nii miñii meeyem ti pítin pa piti Eenucee ya.2Inci cúuwanaacuuwan aluu, pale ufanut aluu nipili, kaatuko niyinaat kateñan. Háati fo fiye niyinaat,3kaatuko eloŋ ya eti aluu ecukaacuk fiye nii pakati púlunta empe. Páawoo paheeka niŋ pílaacinool umpa ti pututa aluu, fo nineetaat pakati púlunta pe? Fo nineetaat ti hiwenu samat nii pakan kenseŋ?4Niŋ an ti aluu asokaa, “Inci Póol innapan,” akee naasok, “Inci Apolos innapan,” fo nineetaat pakan kenseŋ?5Ooto ayme ayem Apolos, ayme lompo ayem Póol? Unii píhina lamma pakati Pútuun pa, ínninapii ti unii nípiyinan. An óo an ti unii náhinhin páhin empa Ateeteyo naawufanoo pa:6Inci suke enuun ya, Apolos náawuwen yo, pale Pútuun pa píhine yo epiyank.7Ooto aŋa eesuke ya niŋ aŋa éewuwene ya púlooŋ likee tom, pale Pútuun pa lamma péehine pa enuun ya epiyank.8Aŋa eesuke ya niŋ éewuwene ya pámiiloolalii poonool, apan Pútuun pa efipucooy an óo an teyii páhin pa piteyoo.9Kaatuko inci niŋ Apolos, an niŋ áwiyoo ti páhin pa piti Pútuun pa; aluu niyem kaakit ka kiti Pútuun pa, ínniyemi lompo ekumpaan eyya mpiyem ya ti kulut.10Ti kawun enka Pútuun pa mpuwunaam ka, inci cukaacuk nii aluta eecohatiye, inci siiŋane kaatah ekumpaan ya akee náayemi kulut tenko. Pale an óo an añaŋaa kulut niŋ kunuu.11Kaatuko Pútuun pa pipayaapa kulut kaatah ekumpaan ya, kikina kiyem Yéesu Krista, ooto an ayinaat kaasiiŋan kikee kaatah.12Akee náayini kulut ti kaatah enkuu niŋ pisanoo, púkotifoloo, pínankiin péeciita hinoom, pupapaloo, píheeni niŋ fotom hikaaw.13Hinak kíiti ya, an óo an páhinoo éfipiyisanee, mpímeyiyee. Kaatuko oom hinoom efihiyeno hinoom hiti seemak, ensa éfisiyisan fa an óo an páhinoo mpiyem.14Niŋ ekumpaan ya eelutee ya épuciit, aluta ya afaapuuñanoolee.15Pale niŋ seemak sa sileemanaa páhin piti an, atapuuñanoolee. Akina faŋoo afaafakanee, pale facuk fiye nii eefake ti seemak sa.16Fo nímiit nii aluu niyem ekumpaan ya eti Pútuun pa, apan Kunuu ka keenape ka kiti Pútuun pa nkikin ti aluu?17Niŋ an ápucaloolaa ekumpaan ya eti Pútuun pa, Pútuun pa éfipupucalooloo. Kaatuko ekumpaan ya eti Pútuun pa eekuule, te aluu niyem oom ekumpaan.18An timpi acaakool faŋoo. Niŋ akee ti aluu akufumoolaa faŋoo niŋ pakati púlunta empe, te naacok faŋoo nii eecohatiye, ayeno esoŋ, ancuk kati ayeno eecohatiye pánipani.19Kaatuko ecohato ya eti pakati púlunta empe, ti Pútuun pa aŋuu esoŋato. Kaatuko kiiceekiic ti hilim ha hiti Pútuun pa nii:“Pútuun pa mpucokcok keecohatiye ka ti tapalee ya eteyii.”20Nene hisok:“Ateeteyo ámeyimeyi pámiiloolal keecohatiye ka; ámeyimeyi nii pitaakut nafaa.”21Ooto, an timpi amaayoolo kiti ñíhampaatiin, kaatuko waah óo waah uti aluu:22Man me Póol, Apolos, Piyeer, púlunta pa, eloŋ niŋ eket, niŋ fotom hiti féefiye niŋ hiti kacom, eehuu púlooŋ eti aluu.23Apan aluu pakati Eenucee ya, Eenucee ya lompo ati Pútuun pa.
Wycliffe Bible Translators, Inc.