1 Kolint2
1Pakanam ti káyinan, ta inci ínkeyii ta puu ti aluu pútuunan aluu tooñaa ya eyya Pútuun pa mpíyisanut ya hínum, ŋesut nipisok nii inci eesuusa ti káakup niŋ fotom eecohatiye.2Kaatuko láfiit cántum kameye waah, ta inci iyyeniye ta ti pututa aluu, fo niŋ neetaat kiti Yéesu Krista eepempeŋee ya ti kuluwaa ya.3Inci kéyyookey puu ti aluu niŋ káataakaati sempe, ewatate niŋ kakikilan kenfakat.4Ta inci íntuunane ta aluu ekooŋan ya etoom, hínut ho niŋ kilim kéesuumanana kiti ecohato an, pale Pútuun pa píyisanaayisan aluu ti sempe sa siti Kunuu ka keenape ka nii, eeha inci insoke ha hiti tooñaa.5Fiyuu káyinan ka kiti aluu etikiyeno kiti ecohato eti an, pale kiti sempe sa siti Pútuun pa.6Pale payenka ammeya ka nii káyinan ka kiteyii kéetuuniye, núukupkup neyii niŋ ecohato. Ecohato eyye éfuliyoot ti púlunta empe, niŋ fotom ti pakan paka keemaka ka pakati púlunta empe, keekaakaay ka hícimu.7Pale núutuunantuunan ecohato ya eti Pútuun pa eeyolee ya, eyya pakan paka nkámiit ya hínum. Pútuun pa ta infiyye mpimanke ecohato eyyuu púlunta pa píliilumee, mantefa nuutaakaa ti hamake etempo.8Háati oonool ti ñíhampaatiin ña pakati púlunta pe kámiit ecohato eyyuu. Niŋ kámeyimeyi yo, anti kápempeŋiyaati ti kuluwaa ya Ateeteyo eemaka ya.9Pale samat nii fa inkiicee fa ti hilim ha hiti Pútuun pa:“Eeha níkin ataapala acuk,eeha kaanuu ataapala ási,eeha an ataapala ámiilool,eehuu Pútuun pa mpimemanoole kéelafiye po ka.”10Apan Pútuun pa píyisanaayisan unaa eehuu pínapii ti Kunuu ka keenape ka. Pánipani Kunuu ka keenape ka nkucukcuk waah óo waah, háati pámiiloolal pa piti Pútuun pa péeloose pa.11Kaatuko ayme ameya pámiiloolal an, fo niŋ neetaat kunuuwoo? Moonool moonool muu, an ámiit pámiiloolal Pútuun pa, fo niŋ neetaat Kunuu ka keenape ka kiti Pútuun pa.12Unaa, utaakutaa kunuu ka kiti púlunta empe, pale nuutaakaa Kunuu ka keenape ka kéefulii ka ti Pútuun pa, mantefa núumeyiyaa eeha Pútuun pa mpuwufane ha unaa haahaw.13Apan unii nuusoksok eehuu, neetaat niŋ kilim kéefulii ti pakalaŋal ecohato eti an, pale niŋ kilim kéefulii ti pakalaŋal Kunuu ka keenape ka kiti Pútuun pa. Fiyuu núucenkin waah wa uti Kunuu ka keenape ka ti keetaake ka Kunuu ka keenape ka. 14Pale an eetaakut Kunuu ka keenape ka kiti Pútuun pa, napookpook tooñaa ya éefulii ya ti Kunuu ka keenape ka: teyoo eehuu heetaakut nafaa. Ayinaat ho kameye, kaatuko pínapii ti Kunuu ka keenape ka lamma an naayina ho kameye.15An eetaake Kunuu ka keenape ka áyiniyini kameye heenape ha niŋ heenaput ha ti waah óo waah. Pale akina faŋoo, an ayinaatoo íhinu kíiti.16Kaatuko hilim ha hiti Pútuun pa hisok:“Ayme ameya pámiiloolal pa piti Ateeteyo?Ayme ayinoo kawun kunuu?”Pale unaa, nuutaakaa pámiiloolal pa piti Eenucee ya.
Wycliffe Bible Translators, Inc.