1 Kolint1
1Aŋe inci Póol, aŋa Pútuun pa mpiyonkale ya ti pásuuma etempo kati yeno apoñapoñ ati Yéesu Eenucee ya. Inci oopa le niŋ an unaa ti káyinan Sosten, ukicanaa aluu.2Inci oopa ti hikiicu aluu kéeyinane ka pakati Kolint nkakuulanee ti Yéesu Eenucee ya. Niyonkalee-yonkal nipiyeno pakan etempo keesampanee ka, aluu niŋ pakakee paka keeyem ka pan óo pan, payenka nkayonkal ka caacaw Ateeteyo ati unaa Yéesu Krista, eeyem ya lompo Ateeteyo ateyii.3Alímaati Pútuun pa Paapaa ati unaa, niŋ Ateeteyo Yéesu Krista kasampan aluu nkawufan aluu kásuumaay.4Inci insoksok apalaka tan óo tan Pútuun pa putoom kiti aluu, kamma panap empa mpíyisane pa aluu ti Yéesu Eenucee ya.5Kaatuko níyenooniyoo-yeno neyoo oonool, innimeeŋanee niŋ hisaanumate ha hiti kawun óo kawun kiti káakup niŋ kiti kameye.6Fiyuu Pútuun pa mpíyisane nii, eeha núutuunane ha aluu kiti Eenucee ya, hiti pánipani.7Ooto kawun óo kawun enka Pútuun pa mpuwun, taakut waah tewwo ewwa innitaakut, ti hítuulu hinoom eeha Ateeteyo Yéesu Krista ati unaa naakaakaay ha éñohoonii.8Akina faŋoo afaapenan aluu sempe fo ti pikelan, ancuk an átayini kawatan aluu ti waah ti hinoom ha hiti éñohoonii ya eteyoo.9Pútuun pa púfulantoo ti eeha mpusok ha, pikina peeyonkale pa aluu nipiyeno oonool niŋ añii etempo Yéesu Krista Ateeteyo ati unaa.10Aluu pakanam ti káyinan, inci puluum aluu ti caacaw ca citi Ateeteyo Yéesu Krista ati unaa: nísiyool ti pututa aluu, apan timpi nitaak pípaacinoolo ti pututa aluu. Nicokool piliit kati nitaak kunuu koonool niŋ pámiiloolal poonool.11Aluu pakanam ti káyinan, páni pakakee paka ti keekine ka lati Kulowe kasokaamsok nii pílaacinool umpa ti pututa aluu.12Inci pusok aluu píhiini hat: pakakee paka ti aluu kasok, “Inci Póol innapan;” pakakee paka nkasok, “Inci Apolos innapan;” pakakee paka nkasok, “Inci Piyeer innapan;” pakakee paka nkasok, “Inci Eenucee ya innapan.”13Fo cukaacuk aluu nii Eenucee ya ápaacinoolaa-páacinoolo? Niŋ fotom fo inci Póol pempeŋee ti kuluwaa ya ti putum aluu? Fo ti caacawam ínnihinee pátise?14Inci sokaa Pútuun pa apalaka fa inci ínhinut fa an ti aluu pátise, fo inneetaat Kilispus niŋ Kayus.15Ooto an ti aluu ayinaat hisoku nii áhineehin pátise ti caacawam.16(O, inci antifiil! Hínaahin lompo pátise miin ma miti Sutefanas, pale cukutam nii hínaahin pátise akee nene.)17Kaatuko Eenucee ya ápoñiyootam íhinu pátise, pale ápoñiyaampoñ kati túunan ekooŋan ya éesuume ya, neetaat nii kati nínkup niŋ ecohato eti an, eeha efihiwun kuluwaa ya eti Eenucee ya néepuul ti sempe eteyyo.18Pánipani, ekooŋan ya eti eket ya eti Eenucee ya ti kuluwaa ya, pakan paka kéecime ka kacokaacok yo nii eetaakut nafaa. Pale unaa keefakanee ka, ekooŋan eyyuu eyem sempe sa siti Pútuun pa.19Kaatuko kiiceekiic ti hilim ha hiti Pútuun pa nii:“Inci fápucalool ecohato ya eti keecohatiye ka;uwwant pásuum kunuu ka kiti kéesuume ka kunuu.”20Ooto eecohatiye ya uwwey? Akalaŋana ya ati hilim ha heesiiŋanee ha uwwey? Eesuusa ya putum ti caanak ence uwwey? Fo Pútuun pa píyisanut nii, ecohato ya eti púlunta pa etaakut nafaa?21Páni, Pútuun pa, ti ecohato etempo, mpíhin pakan paka pakati púlunta pa, niŋ ecohato ya eteyii púlooŋ, timpi kámeyi po. Pale ínsuum Pútuun pa pipinap ti heetaakut ha nafaa eeha núutuunanaa ha, pipifakan kéeyinane ho ka.22Pusuwif pa píyisan nkacakan, Pikilek pa nkaŋes ecohato.23Pale unii, núutuunantuunan nii Eenucee ya apempeŋee-pempeŋ ti kuluwaa: ti Pusuwif pa eehuu kateñal Pútuun pa, ti keeneetaat ka Pusuwif eehuu heetaakut hikaw.24Pale ti payenka Pútuun pa mpiyonkale ka, man me Pusuwif pa niŋ fotom keeneetaat ka Pusuwif, Eenucee ya ayem sempe sa siti Pútuun pa niŋ ecohato ya eti Pútuun pa.25Kaatuko káataakaati ka nafaa kiti Pútuun pa kihaŋa ecohato ya eti pakan paka, apan káataakaati ka sempe kiti Pútuun pa kihaŋa sempe sa siti pakan paka.26Pakanam ti káyinan, nímiilool fa inniyeniye fa ta Pútuun pa mpiyonkale ta aluu. Hícump ti aluu kacokutee nii keecohatiye ínkeyyoo ti púlunta pa; hícump ti aluu kataakut sempe ti pakan; hícump ti aluu lompo káfuliyoot ti miin meemaka.27Pale Pútuun pa mpimamal waah wa weetaakut wa nafaa uti púlunta pa pupusuuwan keecohatiye ka. Mpimamal waah wa weetaakut wa sempe uti púlunta pa pupusuuwan keetaake ka sempe.28Waah ewwa púlunta pa mpítine wa mpinat apan mpucok wo nii likee tom cántum, ukina Pútuun pa mpimamale púpupucalool waah ewwa púlunta pa mpucoke wa nii likee.29Fiyuu an átayini émakiyanoolo hátikin Pútuun pa.30Pale Pútuun pa píhinaahin aluu nipiyeno pakoonool niŋ Yéesu Eenucee ya, éeyenoonii ya ti unaa ecohato ya éefulii ya ti Pútuun pa. Akina awune Pútuun pa mpucok unaa nii pakan keecoonoole, naakuulan unaa naacooy kati afakan unaa ti himiikanate ha hiti unaa ti kaamuuyen niŋ eket.31Ooto samat nii fa inkiicee fa ti hilim ha hiti Pútuun pa: “Aŋa afaamaayoolo ya, amaayoolo ti Ateeteyo.”
Wycliffe Bible Translators, Inc.