1 Kolint15
1Pakanam ti káyinan, inci láfilafi kánawunan aluu ekooŋan ya éesuume ya eyya inci íntuunane ya aluu, eyya innisayane ya innicok teyyo kíp.2Teyyo Pútuun pa éfipinapii pipifakan aluu, innicokaa kíp ti eeha inci íntuunane ha aluu. Inníhinut fo, ooto níyinanaayinan kenseŋ.3Heehaŋe ha hitaaku nafaa ti waah óo waah ewwa inci inkalaŋane wa aluu, hikina lompo inci inkalaŋanee, hikina hiyem eehe: Eenucee ya aketaaket hak umuuyen wa uti unaa samat nii fa hilim ha hiti Pútuun pa nihisoke fa.4Ahokeehok, náalitaniyee ti eket ya ti hinoom ha íhaaciyenu ha, samat nii fa hilim ha hiti Pútuun pa nihisoke fa,5náafulii ti Piyeer, niŋ lompo ti pupoñapoñ pa ŋaasuwan niŋ pákasupak paka.6Púful toko, náafulii ti pakakee ti pinapana pa pakateyoo keemuuse pakan sikeme isak, ti éfulii yoonool. Hícump teyii unka kaloŋa pale pakakee paka kaketaaket.7Púful toko náafulii ti Saak, náafulii ti pupoñapoñ pa púlooŋ.8Ti pikelan, náafulii lompo ti inci, inci eepukee hiimam pamuusal.9Pánipani inci yem akelan a ti pupoñapoñ pa, apan túuniit kaayonkalee apoñapoñ, kamma inci inkallane meemak kéeyinane ka.10Pale Pútuun pa mpíyisanam panap etempo pípihinam aŋa inci iyyem a, apan ta mpíyisanaam ta panap etempo, píhinut ho kenseŋ, kaatuko inci hínaahin meemak pihaŋ pakakee pupoñapoñ pa. Páni inci faŋam tom híne páhin empuu, pale panap empa Pútuun pa mpíyisanaam pa piyem niŋ inci.11Fiye, man me inci íntuunan niŋ fotom pakakee pupoñapoñ pa, ekooŋan ya éesuume ya yoonool yuu núutuunan, apan ekina ínniyinane.12Páawoo núutuunantuunan nii, Eenucee ya álitaniyeelitan ti eket ya, weyme uwune pakakee ti aluu nkasok nii keekete ka étikalitoonii?13Niŋ pánipani nii keekete ka étikalitoonii, ooto Eenucee ya lompo álitaniyootee.14Apan niŋ Eenucee ya álitaniyootee, ooto káatuunan ka kiti unii kiti kenseŋ, káyinan ka kiti aluu lompo kiti kenseŋ.15Eehuu lamma tom, unii lompo keeyem ka ti káatuunan kiti Pútuun pa ñincaama, kamma nuusoke nii pílitaniyoo-litan Eenucee ya. Pale niŋ pánipani nii keekete ka étikalitoonii, ooto píhinut ho.16Niŋ keekete ka étikalitoonii, ooto Eenucee ya lompo álitaniyootee.17Apan niŋ Eenucee ya álitaniyootee, ooto káyinan ka kiti aluu kitaakut nafaa, apan innitowo ti pitiyo umuuyen wa uti aluu.18Fiye niŋ eehuu fo, ooto keekete ka ti káyinan Eenucee ya kácimaacim.19Niŋ káyinan ka kiti unaa ti Eenucee ya le ti etaam eyye lamma nkilehe, ooto eloŋ ya eti unaa ehaŋe paket hikaw ti pakan paka púlooŋ.20Pale páni, Eenucee ya álitaniyeelitan ti eket ya. Eehuu níhiyisan píhiini hat nii keekete ka efi lompo kálitoonii.21Kaatuko páawoo eket ti áyiin oonool néenapii, caacawoo Ataam; fo lompo élitoonii ya ti eket ya néenapii ti áyiin oonool, akina ayem Eenucee ya.22Samat nii fa pakan paka púlooŋ nkakete fa pínapii ti Ataam, fo lompo unaa púlooŋ efuutaakaa eloŋ pínapii ti Eenucee ya.23Pale an óo an niŋ caanakoo: Eenucee ya áyaañe álitaniyee ti eket ya. Niŋ áñohooniyoo, keeyem ka pakateyoo efi lompo kálitoonii.24Fiye niŋ Eenucee ya apayaa káapucalool sempe sa púlooŋ niŋ pakati kikaw ka púlooŋ, pikelan púlunta pa éfipikey, naawufan cáwii ca Pútuun pa Paapaa ya.25Kaatuko Eenucee ya añaŋaa piyeno amansa fo ta Pútuun pa efipinaŋ t’etaam wootoo pikamooloo.26Akamool a akelan a eeñaŋee ya káapucalool ayem eket.27Kaatuko hilim ha hiti Pútuun pa hisok: “Pútuun pa pinaŋaanaŋ waah óo waah t’etaam wootoo.” Pale ta nihisoke ta nii, “waah óo waah”, híinihiini nii, hinanfut toko Pútuun pa peenaŋe pa waah óo waah t’etaam wootoo.28Fiye niŋ Añii ya ati Pútuun pa ataakaa waah óo waah t’etaam wootoo, afaawufan faŋoo Pútuun pa peenaŋe pa waah óo waah t’etaam wootoo, ancuk Pútuun pa piyeniyaa amansa pan óo pan ti waah óo waah.29Niŋ keekete ka étikalitoonii ti eket ya, kéehinee ka pátise hak keekete ka, weyme éfikahin? Weyme uwune nkáhinee pátise hak keekete ka, niŋ pánipani keekete ka étikalitoonii cántum ti eket ya?30Weyme uwune nuunaŋaa níiy unaa ti seemak tan óo tan?31Pakanam ti káyinan, inci incoonool-coonool niŋ eket hinak óo hinak. Eehuu íhiiniyamhiini hat, samat nii fa ínhiiniyam fa hat lompo nii, inci immaayoolo-maayoolo kiti aluu kamma Yéesu Eenucee ya Ateeteyo ati unaa.32Iyyema hiŋes nafaa eti púlunta empa lamma inci iyyaake, ooto anti táakoolaati niŋ púlukuleen piti elampa ti saatee ya eti Efes. Niŋ keekete ka étikalitoonii ti eket ya,“Uliyaa nuulaanaa.Kacom nuuketaa.”33Timpi nicaakool faŋ aluu: “Páawiyool niŋ eenaput nápucpuc pacuk an eenape.”34Níñohoonii ti kunuu aluu innikat kaamuuyen. Pakakee ti aluu kámiit Pútuun pa cántum. Sokaasok aluu eehuu pusuuwan aluu.35Pale pikee pa akee naacakan: “Puume keekete ka éfikalitoonii? Niŋ enii puume éfikakey neyyo?”36Aŋuu esoŋ! Niŋ an asukaa ekoon, efeeket epite éŋantii.37Niŋ an álafiyaa hisuku enuun, niŋ fotom ukee waah, neetaat nii enuun ya afaasuk pale ekoon ya lamma, ekina conko epite éyenoonii enuun.38Púful toko Pútuun pa mpíhin yo epiyank ti pásuuma etempo, ekoon óo ekoon niŋ enii eteyyo.39Sinii siti waah ewwa nuusuuŋut sikufut: pakan paka niŋ siniinii, púlukuleen pa niŋ sinii etempo, pusuwa pa niŋ sinii etempo, háati soon sa púlooŋ.40Taakaataak lompo waah weeyem patiila niŋ weeyem ti etaam ya. Pawalle pa piti waah wa weeyem wa patiila ukufut niŋ pawalle pa piti waah wa weeyem wa ti etaam ya,41caanak ca niŋ pawalle etenco, hiim ha niŋ pawalle eteeho, picaaŋaŋ pa lompo niŋ pawalle etempo. Háati ti picaaŋaŋ pa, pawalle etempo pukufut.42Fiyuu facuk niŋ keekete ka kálitaniyee. Niŋ enii ehokee, éfeepucaloolo, samat nii ekoon eesukee; niŋ enii élitaniyee ti eket, etinene éyini púpuco.43Niŋ ehokee, ekina enii eti ñusuu; niŋ élitaniyee, ekina enii eti pawalle. Niŋ ehokee, eti káataakaati sempe; niŋ élitaniyee, eti sempe.44Niŋ ehokee, eti púlunta empe; niŋ élitaniyee, neetaak eloŋ éefulii ti Kunuu ka keenape ka. Páawoo taakaataak enii eti púlunta empe, ooto taakaataak lompo enii eetaake eloŋ éefulii ti Kunuu ka keenape ka.45Kaatuko kiiceekiic ti hilim ha hiti Pútuun pa nii: “Ataam áyiin a áyaañ a náayenoonii an aŋa eeyem kaloŋa,” Ataam akelan a, akina an aŋa nawufan eloŋ éefulii ti Kunuu ka keenape ka.46Neetaat nii enii ya eetaake ya eloŋ éefulii ya ti Kunuu ka keenape ka éyaañe etaako, pale enii ya eti púlunta empe éyaañe etaako, púful toko eti Kunuu ka keenape ka néenowii teyyo.47Ataam, an a áyaañ a, ti esiya ya eti etaam ya naamemanoolee. Pale Ataam ásupiyenu ya alacana náafulii.48Pakan paka pakati esiya ya kanakoolaa-nakool nii an a eememanoolee ya niŋ esiya ya. Pakati alacana, nkanakool nii éefulii ya alacana.49Samat nii fa nuunakoolaa fa nii eememanoolee ya niŋ esiya ya, fo lompo efuunakoolaa niŋ éefulii ya alacana.50Pakanam ti káyinan, eehe inci íllafiye hisoku: waah uti enii niŋ hísim uyinaat hitaaku himpaac ti cáwii ca citi Pútuun pa, apan waah weeñaŋe púpuco uyinaat hitaaku himpaac ti eloŋ ya eepayantoo ya.51Nísiitan, inci pusok aluu heeyolee: unaa púlooŋ etuuketaa, pale unaa púlooŋ efuuyesanaa.52Efihitaako picascas, ti pamoyal níkin, niŋ kámpiis ka kikelan ka kusokaa. Emma nkusok ma, keekete ka éfikalitaniyee ti eloŋ ya eepayantoo ya. Unaa keeyemaa ka kaloŋa efi lompo uyesanaa.53Páni, waah ewwa núupuco, uñaŋaa piyeso ti waah wéepuciyantoo, waah ewwa nuuket uñaŋaa piyeso ti waah weeketantoo.54Niŋ waah ewwa núupuco wa uyesanee ti waah wéepuciyantoo, apan waah ewwa nuuket wa uyesanee ti waah weeketantoo, ooto hilim eehe heekiicee ha ti hilim ha hiti Pútuun pa, efihitaako, hisok: “Eket ya eheekeeheek, epayeepa kamelan pántoon.”55“Awe eket, iheeku ha hitii uuhey?Awe eket, kaalifu ka kitii unkey?”56Kaamuuyen ayem kaalifu ka enka nkúcoopii ka eket, apan hilim ha heesiiŋanee ha hiti Móyiis hiyem sempe sa siti kaamuuyen ka.57Pale usokaa Pútuun pa apalaka, péehine pa unaa upuheekaa eket ya, pínapii ti Yéesu Krista Ateeteyo ati unaa!58Ooto, aluu pakanam ti káyinan payenka inci íllafiye ka meemak, nisiiŋo kíp. Waah timpi úyiyiŋan aluu. Nitowo ti íhinu kata fo muus nípihin páhin pa piti Ateeteyo, kamma innimeya nii páhin empa ínnihine pa Ateeteyo pineetaat piti kenseŋ.
Wycliffe Bible Translators, Inc.