1 Kolint14
1Niŋes pálafi, innitaak hame nipitaak uwun ewwa Kunuu ka keenape ka nkuwufan wa, picaahaŋ kawun ka kiti kaayaamakool hilim ha hiti Pútuun pa.2Niŋ an ákupaa niŋ kíleeluuf kéemiitee, aŋuu niŋ Pútuun pa naayem ti káakup pale neetaat niŋ pakan, kaatuko an ámiit eeha naasoke. Kunuu ka keenape ka nkútunkii kapusok heeyolee, apan hicaaŋut an.3Niŋ an ayaamakoolaa, ti pakan náakupe apan naawufan kunuuwii sempe, naapuuñanoolii, náahinii kapisiiŋo kíp ti káyinan ka kiteyii.4Niŋ an ákupaa niŋ kíleeluuf kéemiitee, kunuuwoo lamma nawufan sempe. Pale niŋ an ayaamakoolaa, kunuu ka kiti kéeyinane ka púlooŋ nawufan sempe.5Inci láfilafi aluu púlooŋ nípikup niŋ kíleeluuf kéemiitee, pale eeha inci inhaŋe ha pálafi hiyem, nipiyaamakool. An óo an eeyaamakoole, ahaŋa hitaaku nafaa éekupe niŋ kíleeluuf kéemiitee, fo iyyema nii akee ácenkinoolaa eeha naasoke ha, ancuk kunuu ka kiti kéeyinane ka púlooŋ kuwufanee sempe.6Pakanam ti káyinan, niŋ inci kéyyoo puu ti aluu ínkup niŋ kíleeluuf kéemiitee, fo efitaak ti aluu nafaa? Haani, fo niŋ inci sokaa aluu picaaŋ cataŋ waah ewwa Pútuun pa mpíyisanaam wa, niŋ fotom ínhin aluu nípimeyi tooñaa ya, niŋ fotom iyyaamakool aluu niŋ fotom inkalaŋan aluu waah.7Nisincan ti waah ewwa an nacoop wa apiyonkal pakan paka, samat nii kámpiis niŋ fotom cíntiŋ, niŋ an ayeniyaa hisapu niŋ fotom kasokan, náapuul pasapal pa, puume an áfaayini piyiiŋo?8Niŋ kámpiis ka kusokut picaaŋ niŋ hikam hitaakiyaa, ayme afaalito apikaay pítaakool?9Fiyuu aluu innicuke. Inníkupaa niŋ pakan paka ti híleeluuf eeha nkámiit, puume éfikameyi eeha innisoke? Aŋuu káakup ti eyam ya lamma inniyaake.10Hícump kíleeluuf kiyem ti púlunta pa, pale taakut híleeluuf tenko eeha payenka nkákup ho ka étikasiyool.11Pale niŋ an ákupaa niŋ inci, inci síit híleeluufuyoo, oom an akaawoola ti inci, inci lompo akaawoola teyoo.12Fiyuu aluu innicuke. Páawoo nitaakaataak hame nipitaak uwun ewwa Kunuu ka keenape ka nkuwufan wa, niŋes hitaaku waah ewwa nuuhaŋ wa kapenan káyinan ka kiti kéeyinane ka.13Ooto an óo an aŋa nákup niŋ híleeluuf héemiitee, añaŋaa kaluum Pútuun pa kati áyini káacenkinool eteeho ti hikee híleeluuf eeha pakan paka nkásiye.14Kaatuko niŋ inci luumaa niŋ híleeluuf héemiitee, kunuuwam kuluume, pale pámiiloolalam piyankananut an ti heetaake nafaa.15Fiye weyme inci fáhin? Inci faluum niŋ kunuuwam, illuum lompo niŋ pámiiloolalam. Inci facook Pútuun pa niŋ kunuuwam, incook po lompo niŋ pámiiloolalam.16Niŋ niyeniyaa hímulu Pútuun pa niŋ kíleeluuf kéemiitee, apan intaak ti kéeyinane ka pakakee kéemiit eeha inniyem ha ti hisoku, puume éfikayini hisoku “Amíini” ti kaluum ka kiti aluu kiti hisoku Pútuun pa apalaka?17Níyiniyini inniyeno hisoku Pútuun pa apalaka fanfaŋ, pale étiniyini kawufan pakan paka sempe ti káyinan ka kiteyii.18Inci sokaa Pútuun pa apalaka fa inci ínkup fa niŋ kíleeluuf kéemiitee pihaŋ aluu púlooŋ.19Pale niŋ kéeyinane ka kaconcooliyaa, inci fahaŋ íllafiye púkup kilim isak enka pakan paka nkásiye ancuk inci kalaŋanii nenko, le niŋ fasok kilim síwuli ŋaasuwan niŋ híleeluuf héemiitee.20Pakanam ti káyinan, timpi ínnimiilool nii epuuk. Inkéyyoo ti hiti pakanc, niyeno samat nii epuuk kéemiit waah; pale ti pámiiloolal, niyeno samat nii kéetuuniye.21Kiiceekiic ti hilim ha hiti Pútuun pa, nii:“Ateeteyo asok:inci fákup niŋ pakanam pínapii ti payenka nkákup kikee kíleeluufkíleeluuf enka ínnimiit,apan háati fo, pakanam étikasiitanam.”22Ooto káakup niŋ kíleeluuf kéemiitee, píyisan hak kéeyinanut ka pale kéeyinane ka tom. Inkéyyoo ti kaayaamakool, eehuu hak kéeyinane ka, pale kéeyinanut ka tom.23Nisincan, fiye niŋ kéeyinane ka púlooŋ kaconcooliyaa, an óo an naayeno káakup niŋ kíleeluuf kéemiitee, apan pakan kéeyinanut niŋ fotom kéemiit heeyem ha ti pitaako nkánakoonii, fo etikasok nii niwuyaawuyo?24Pale niŋ aluu púlooŋ niyeniyaa kaayaamakool kilim ka kiti Pútuun pa, apan éeyinanut niŋ fotom éemiit heeyem ha ti pitaako náanakoonii, emma nási ma kilim ka, afaacoon nii akina amuuyena apan náahinee kíiti kamma eeha innisoke ha púlooŋ.25Afaacuk picaaŋ cataŋ heeyolee ha ti yaanoo, náakilipo puhooŋuyoo t’etaam, náamul Pútuun pa ti hisoku: “Pánipani Pútuun pa umpa niŋ aluu!”26Ooto pakanam ti káyinan, weyme efuusokaa? Inniconcooliyaa, akee naataak hícimu, akee naataak eeha afaakalaŋan, akee naataak eeha Pútuun pa mpíyisanoo, akee naataak híleeluuf héemiitee, akee náayini káacenkinool. Enkuu púlooŋ kiñaŋee íhinu kati kiyankanan kéeyinane ka káyinan ka kiteyii kipipenano.27Niŋ akee ákupaa niŋ hikee híleeluuf, pákasupak niŋ fotom pákahaaciil, illeh toko, kañaŋa káakup oonool oonool, apan fo akee ácenkinool heesokee ha.28Pale niŋ an ataakiit aŋa áfaacenkinool eeha nkasoke ha, payenkuu kañaŋaa kafatan ti kayoŋ ka; kamank ho ti pututayii niŋ Pútuun pa.29Payenka nkayaamakool ka kayeno pákasupak niŋ fotom pákahaaciil lamma kati kákup, apan pakakee paka nkatah kunuuwii ti eeha nkasoke ha kapisincan man hiti páni man me tom.30Niŋ akee oopa ti kaayaamakool, akee ince ataak waah ewwa Pútuun pa mpíyisanoo, áyaañ a eeyem a ti káakup afatan.31Aluu púlooŋ níyiniyini kaayaamakool oonool oonool, ancuk an óo an akalaŋaa, naayankananee apucok piliit.32Payenka nkayaamakool ka, kañaŋaa ecocokanoolo ti káakup,33kaatuko Pútuun pa pineetaat Pútuun piti eciimaloolo, pikina Pútuun piti kásuumaay, samat nii fa iyyem fa ti picanku pa púlooŋ piti keesampanee ka pakati Pútuun pa.34Inniconcooliyaa pakaal paka kañaŋaa kafatan. Kañaŋut káakup. Kañaŋaa hítuulu pákayiinii samat nii fa hilim ha heesiiŋanee ha hiti Móyiis nihisoke fa.35Niŋ kálafiyaa kacakan waah, kacakan pákayiinii ti enuuf. Súuwanani-súuwanani aal ápukup niŋ kéeyinane ka kaconcooliyaa.36Fo cukaacuk aluu nii hilim ha hiti Pútuun pa ti aluu níhifulii? Niŋ fotom fo cukaacuk aluu nii, aluu lamma nísiye ho?37Niŋ akee ti aluu ámiiloolaa nii, akina ayaamakoola ati Pútuun pa, niŋ ekina tom, náamiilool nii ataakaataak kawun kéefulii ti Kunuu ka keenape ka, añaŋaa hicoonu nii eeha inci inkiice ha aluu fiye, hikina Ateeteyo naasoke pakanoo káhin.38Pale an óo an eepooke eehe, akina lompo afaapookee.39Ooto pakanam ti káyinan, nitaak hame kati niyaamakool apan timpi nikit an káakup niŋ kíleeluuf kéemiitee.40Pale níhin enkuu púlooŋ niŋ kunuu keesuuniye, timpi níhin wo ti eciimaloolo.
Wycliffe Bible Translators, Inc.