1 Kolint13
1Niŋ inci kúpaa niŋ kíleeluuf ka kiti pakan paka niŋ kiti pumaleekoo pa, pale taakut pálafi, ooto inci cukaacuk fiye nii cíntiŋ ceeyem ti hisoku niŋ fotom pahap-pahap.2Niŋ inci yaamakoolaa hilim ha hiti Pútuun pa, ímmeyi heeyolee ha púlooŋ, ímmeyi waah óo waah, intaak káyinan kenfakat nenka inci fa inteeŋan pítintiŋ, apan inci taakut pálafi, inci likee tom.3Niŋ inci coopaa hisaanumate ha hitoom púlooŋ ímpaacinool ho keeleke ka, incoop lompo eniinam puwufan yo kati esowee, apan inci taakut pálafi, etitaak toko waah.4Pálafi namukutmukut, pálafi ásuumanani-súumanani. Pálafi ataakut paheeka, ámakiyanooliyantoo, áseepinooliyantoo.5Pálafi áhinantoo heesuuwanana, aŋesantoo héesuumoo, áfiisantoo káñiken, acokantoo an ti yaanoo.6Pálafi ataakantoo pásuuma ti heecoonoolut pale nataaktaak pásuuma ti tooñaa ya.7Pálafi naponketponket tan óo tan, naataak pihinto tan óo tan, naataak cíki tan óo tan, naamukut ti waah óo waah.8Pálafi ataapala apa. Pale la kaayaamakool nkiyem, efikitaak pilehu; la káakup niŋ kíleeluuf kéemiitee nkiyem, efikipa; la kameye nkiyem, efikitaak pilehu.9Páni fiye kameye ka kiti unaa kilasakaalasak, kaayaamakool ka kiti unaa lompo nkilasak.10Pale niŋ wéetuuniye wa úcoliyoo, weelasake wa éfuucim.11Ta inci iyyeniye ta maañiiyaayam, ínkupkup samat nii añii, ímmiilool samat nii añii, inkaayanool kunuuwam samat nii añii. Ta inci íyyankii ta, inkat hiñiiyate pusonam.12Kaatuko fiye nuucukaacuk Pútuun pa pucuk fiye nii ti ecukaloolu éetaahe, pale caanak éficicolii ta efuucoonoolaa nempo nuucukaa po picaaŋ cataŋ. Fiye kameye ka kutoom kilasakaalasak, pale caanak éficicolii ta inci fámeyi waah óo waah pántoon, samat nii fa Pútuun pa mpimeyaam fa.13Ooto fiye, waah wa úhaaciil ewwe efuutowo ti pitaako, ukina uyem: káyinan, cíki niŋ pálafi. Pale weehaŋe wa hamake ti ewwuu uyem pálafi.
Wycliffe Bible Translators, Inc.