1 Kolint12
1Pakanam ti káyinan, fiye ukaayaa ti uwun ewwa Kunuu ka keenape ka nkuwufan wa. Inci láfiit nipiyeno ti ñáanim ti waah ewwuu.2Nímeyimeyi nii, le niŋ éfiniyenoonii kéeyinane ti Eenucee ya, innikatankatan nipicoopee ti pínaati peeyinaat pa káakup, apan niyinantoo hipooku.3Ekina ewune inci íllafi nípimeyi eehe: niŋ an añanaa Yéesu, oom an, Kunuu ka keenape ka kiti Pútuun pa tom kútunkoo apusok fiyuu. An lompo ayinaat hisoku nii Yéesu ayem Ateeteyo, taamanta Kunuu ka keenape ka kútunkutoo.4Uwun ewwa Kunuu ka keenape ka nkuwufan wa ukufut, pale Kunuu ka keenape ka koonool kuu.5Uyíniyaayini íhinu páhin pa piti Ateeteyo ti páhin peekufut, pale Ateeteyo oonool a nuuyemaa ti páhin.6Pawenal pa piti Pútuun pa lompo pukufut, pale Pútuun pa poonool pa mpíhin waah óo waah ti unaa púlooŋ.7Kunuu ka keenape ka nkuwufanwufan an óo an ti unaa waah uti kayankanan pakan unaa ti káyinan. Ti eehuu nkíyisanee ti pututa unaa.8Kunuu ka keenape ka kuwufanaawufan pakakee ti unaa kilim kiti ecohato; oom Kunuu ka keenape ka koonool kuu nkuwufan pakakee kilim kiti kameye.9Kikina Kunuu ka keenape ka koonool kuu, nkuwufan pakakee káyinan kenfakat; nkuwufan pakakee uwun uti káakuuñan pakan kéekuuñe,10nkuwufan pakakee kawun kiti íhinu heecukantee, nkuwufan pakakee kawun kiti kaayaamakool hilim ha hiti Pútuun pa, nkuwufan pakakee kawun kiti hikiiwu héefulii ha ti Kunuu ka keenape ka niŋ lompo héefuliyoot ha tenko. Nkuwufan pakakee kawun kiti káakup niŋ kíleeluuf kéemiitee, nkuwufan pakakee kawun kiti káacenkinool oom kíleeluuf.11Kunuu ka keenape ka koonool kuu nkíhin enkuu púlooŋ: nkuwufanwufan an óo an waah weekufut ti pásuuma etenko.12Uméyiyaameyi nii enii an yoonool, apan neetaak hícump upii. Upii ewwuu, háati fa nuumeeŋe fa, ukina enii yoonool. Fiyuu lompo incuke ti Eenucee ya.13Pakakee ti unaa Pusuwif, pakakee keeneetaat Pusuwif, pakakee pimiikan, pakakee keeneetaat pimiikan, pale unaa púlooŋ úhinee pátise ti Kunuu ka keenape ka koonool ka ti enii yoonool. Apan Pútuun pa píhinaahin Kunuu ka keenape ka koonool enkuu kipikin ti unaa.14Enii, etaakut kaapii koonool, pale hícump upii.15Niŋ koot asokaa: “Kamma inci inneetaat epees, inci neetaat ti enii ya,” ekina ewunut kineetaat ti enii ya.16Niŋ kaanuu asokaa: “Kamma inci inneetaat níkin, inci neetaat ti enii ya,” ekina ewunut kineetaat ti enii ya.17Niŋ enii ya púlooŋ eyeniyaa níkin, puume anti nési? Niŋ ekina púlooŋ eyeniyaa kaanuu, puume anti necoop haaw?18Ooto Pútuun pa puwasaawas kaapii óo kaapii koonool koonool la nkiñaŋe la piyeno ti enii ya, samat nii fa mpílafiye fa.19Niŋ enii ya púlooŋ eyenaayeno kaapii koonool, anti éyonkaliyaatiyee enii!20Fiye, intaako hícump upii, pale enii yoonool.21Níkin na niyinaat hisoku epees ya: “Inci soolahuti!” Hikaw ha lompo hiyinaat hisoku woot wa: “Inci soolahut aluu!”22Eehuu hiyinaat pitaako! Páni, upii wa uti enii ya ewwa nuucokaa wa nii utaakut nafaa, ukina nuuhaŋaa kaasoolah.23Upii ewwa nuucokaa wa nii uneetaat waah, ukina nuuhaŋaa kámakiyan. Upii wa wéeyisanantee wa, ukina nuuhaŋaa kaamankool,24pale upii wa wéeyiniyee wa káyisan, usoolahut kaamankool. Ta Pútuun pa mpuwase ta kaapii óo kaapii ti enii ya, píhinaahin upii wa wéemakiyanutee wa upuhaŋee kámakiyan.25Píhinaahin eehuu ancuk timpi taako pípaacinool ti enii ya, pale upii wa púlooŋ weeyem wa teyyo nuuyankananool-yankananool.26Niŋ kikee kaapii ti enii ya kiseeñaa, ukee upii wa púlooŋ efuutaak lompo oom paseeña pa poonool puu; niŋ kikee kaapii kúmulee, ukee upii wa púlooŋ efuutaak pásuuma.27Ooto aluu níyenoonii enii ya eti Eenucee ya, apan an óo an ti aluu kaapii teyyo.28Pútuun pa fiye mpíhine pakakee píhina pa ti kéeyinane ka: pupoñapoñ pa kayem pákayaañ paka, piyaamakoola pa kayem pákasupiyenu paka, pikalaŋana pa kayem pákahaaciyenu paka, payenka nkáhin ka heecukantee nkanow teyii, ínfulaa toko intaak keetaake ka uwun uti káakuuñan pakan niŋ fotom kayankanan pakan, ínfulaa toko payenka nkátintiŋan ka canku ya, niŋ payenka nkákup ka niŋ kíleeluuf kéemiitee.29Fo an óo an apoñapoñ? Fo an óo an ayaamakoola? Fo an óo an akalaŋana hilim ha hiti Pútuun pa? Fo an óo an náhin heecukantee?30Fo an óo an nataak uwun uti káakuuñan? Fo an óo an nákup niŋ kíleeluuf kéemiitee? Fo an óo an nácenkinool oom kíleeluuf?31Ooto nitaak hame nipitaak uwun wa weehaŋe wa hitaaku nafaa.
Apan fiye inci fáyisan aluu pítin pa peehaŋe pa pitempo pítin óo pítin.
Apan fiye inci fáyisan aluu pítin pa peehaŋe pa pitempo pítin óo pítin.
Wycliffe Bible Translators, Inc.