1 Kolint11
1Níyipenanam, samat nii fa inci lompo íyyipenan fa Eenucee ya.2Inci múlaa aluu fa ínninawuniyam fa ti waah óo waah, niŋ fa innicoke fa kíp ti waah ewwa inci inkalaŋane wa aluu.3Pale inci láfilafi nípimeyi eehe: Eenucee ya ayem ati hikaw ha ati áyiin óo áyiin, áyiin a ayem ati hikaw ha ati aal a, Pútuun pa mpíyemi ati hikaw ha ati Eenucee ya.4Niŋ áyiin ayeniyaa kaluum niŋ fotom kaayaamakool waah ti caacaw ca citi Pútuun pa, apan náawuulo, asuuwanaa-suuwan Eenucee ya eeyem a ati hikaw ha ateyoo.5Pale niŋ aal ayeniyaa kaluum niŋ fotom kaayaamakool waah ti caacaw ca citi Pútuun pa, apan afonkoloŋiit, oom aal asuuwanaa-suuwan áyiinoo eeyem a ati hikaw ha ateyoo. Cukaacuk fiye nii ayiinaayiin hikawoo.6Niŋ aal apookaa efonkoloŋo, añaŋaa piyiino! Pale páawoo súuwanani-súuwanani aal apiyiino, niŋ fotom náakaasin wanoo, ooto añaŋaa efonkoloŋo.7Ayíin, niŋ ayeniyaa kaluum niŋ fotom kaayaamakool, añaŋut púwuulo, kaatuko aliileeliil ápuful Pútuun pa, náayemi lompo hamake etempo. Apan aal a ayem hamake ha hiti áyiin a.8Páni, Pútuun pa pucooput ti enii aal pipiliil áyiin, pale ti áyiin mpiliile aal.9Apan áyiin a aliilutee hak aal a, pale aal a hak áyiin a.10Ekina ewune, aal a añaŋaa efonkoloŋo ápiyisan nii átuulaatuul áyiinoo, kamma pumaleekoo pa. 11Pale ti unaa pakati Ateeteyo, aal aneetaat ti faŋoo ti áyiin, apan áyiin lompo aneetaat ti faŋoo ti aal.12Kaatuko samat nii fa aal a áyaañ a náafulii fa ti áyiin, fo lompo áyiin naapukee pínapii ti aal. Pale Pútuun pa piliile waah óo waah.13Nímiilool ti faŋ aluu, fo tempaatempo aal apiyeno kaluum Pútuun pa peefonkoloŋiit?14Naasincanaa heeñaŋe ha pitaako, aafacuk nii súuwanani-súuwanani áyiin apitaak wan weehaane,15pale niŋ aal ataakaa wan weehaane, aŋuu kaanonkanoo, kaatuko aal awufaneewufan wan weehaane kati úwufalool hikawoo.16An óo an eecoonut eehuu náalafi píñakalool, ámeyi eehe nii: fiyuu núuhin, unii niŋ pikee picanku pa piti Pútuun pa.17Pale ti eeha inci inkaakaay ha aluu hisoku, inci étimul aluu. Kaatuko econcoolo ya eti aluu, heenaput innehaŋ aluu écoopii pihaŋ heenape.18Híyaañ ha hiyem, inci síyaasi nii, inniconcooliyaa, intaakotaako pípaacinool ti pututa aluu, ántuŋ inci ñepaañep káyinan eehuu.19(Pale, ee, fo pípaacinool pitaako ti pututa aluu, ancuk payenka Pútuun pa mpisayane ka ti pututa aluu kati kakiiwee.)20Ooto inniconcooliyaa, niyinaat hisoku nii káciim ka kiti Ateeteyo inniyem ti hili.21Kaatuko emma inniconcoolo ma, pakakee ti keecokee ka nii keetaake nafaa nkátikin kapili nkalaan fo kákuman, keetowiye ka etikataak waah.22Fo nitaakut pukumpaan la efinili innilaan? Niŋ fotom, fo nítinaatin fanfaŋ pakan aluu ti káyinan fo innisuuwane keetaakut ka waah? Fiye, eeheyme ínnilafiye inci pusok aluu? Fo inci múl aluu fo wey? Haani, inci étimul aluu ti eehe!23Ehe eeha inci insaye ha púfulii ti Ateeteyo, apan insok ho aluu: Ateeteyo Yéesu, ti hánant eeha naawufanee ha ti sipees pakan, naacoop hímpuul,24naasok Pútuun pa apalaka. Fiye naafiit ho naasok: “Nisa, aŋe eyem eniinam eewufanee ya hak aluu. Níhin eehe kati nínawuniyam.”25Ta nkapaye ta hili káciim, moonool moonool muu, naacoop elontoŋ ya eti elaan wiiñ ya, naasok: “Aŋe eyem elontoŋ ya eti písiyool pa péeyeeni pa empa efipitaako pa ti pututa Pútuun pa niŋ pakan etempo, kamma hísim ha hitoom. Tan óo tan innilaane teyyo, níhin fiyuu kati nínawuniyam.”26Ooto tan óo tan inniliye hímpuul eehe te innilaan ti elontoŋ eyye, káatuunan eket ya eti Ateeteyo inniyaake fo ta áfaañohoonii.27Ekina ewune, an óo an eeliye hímpuul ha niŋ fotom naalaan ti elontoŋ ya eti Ateeteyo ti pawenal peenaput, amuuyenaamuuyen ti enii ya niŋ ti hísim ha hiti Ateeteyo.28Ooto an óo an asincan faŋoo púsooni le niŋ afaali hímpuul ha naalaan ti elontoŋ ya.29Kaatuko an óo an eeliye hímpuul ha te naalaan ti elontoŋ ya, apan ámiiloolut kiti enii ya eti Eenucee ya, hinaŋu kíiti ya eti Pútuun pa ti faŋoo naayaake.30Ekina ewune hícump ti aluu nkáyemi ti káakuuñu, apan kataakut kásuumaay, pakakee paka fala nkáyemi ti eket.31Niŋ úmiiloolaa-míilool pinap eeha nuuyemaa ha ti íhinu, Ateeteyo anti áhinaati unaa kíiti.32Pale náhinhin unaa kíiti, naacoonanool unaa, ancuk timpi usiiŋanee ti pisiya niŋ pakati púlunta empe.33Ooto pakanam ti káyinan, inniconcooliyaa nipiyeno hili nantoonool, nítuul an óo an ápucolii.34Niŋ peep pucokaa an, áyaañ áliyii t’enuuf le niŋ áfaakey, ancuk econcoolo ya eti aluu timpi awun Pútuun pa mpíhin aluu kíiti.
Niŋ kikee kacakan kutowiyaa, inci fañahan ko aluu niŋ inci kéyyoo puu.
Niŋ kikee kacakan kutowiyaa, inci fañahan ko aluu niŋ inci kéyyoo puu.
Wycliffe Bible Translators, Inc.