1 Kolint10
1Pakanam ti káyinan, inci láfilafi nípinawuno heetaakiye ha símaama unaa keenapane ka Móyiis. Ta nkáfulii ta Esipt, háaputa nihinowii púlooŋ hátikin, poko púlooŋ nkafiitan Kaatii ka Kéecunke ka.2Ooto cukaacuk fiye nii poko púlooŋ káhineehin pátise ti háaputa ha niŋ ti kaatii ka kati kayeno oonool niŋ Móyiis.3Poko púlooŋ kaliye paliyal poonool empa Pútuun pa mpuwufanii pa,4nkalaan púlooŋ lompo palaanal poonool empa mpuwufanii pa. Pánipani kalaanaalaan man emma Pútuun pa mpúfulanii ma ti énankiin ya eenapoole ya neyii. Enánkiin ya eyem Eenucee ya.5Pale keehaŋe ka pameeŋ teyii, Pútuun pa súumut po teyii; ekina ewune nkaket kiyaakii nkimeeŋ pan óo pan ti káahaaŋ ka tes.6Heetaakiye ha símaama unaa eehuu híyisanaayisan unaa nii uñaŋutaa hiwasu pálafi peenaput ti kikaw unaa samat nii poko.7Timpi nítuul pínaati samat nii fa pakakee paka teyii nkáhine fa, samat nii fa hilim ha hiti Pútuun pa nihisoke fa, hisok: “Kayoŋ ka nkiyeno kipili nkilaan, púful toko nkilito pahaaño.”8Timpi uyeniyaa pusupoolata samat nii pakakee paka teyii nkayeniye fa pusupoolata, fo Pútuun pa mpumuke pakan síwuli áwii niŋ síhaaciil (23,000) teyii ti hinoom hoonool.9Timpi uwinkiyaa Eenucee ya, samat nii fa pakakee paka teyii nkáhine fa, pupululoola mpumukii ti kalumal.10Timpi níkumutool samat nii fa pakakee paka teyii nkáhine fa, fo Pútuun pa mpúpoñii maleekoo ya eti eket ya epumukii.11Heetaakiye ha fiyuu símaama unaa híyisanaayisan nii uñaŋutaa íhinu nii poko. Eehuu hikiiceekiic ti hilim ha hiti Pútuun pa ancuk unaa keeyemaa ka kaloŋa ti kunoom ka kikelan enke uwunee kunuu.12Ooto an óo an éemiiloole nii asiiŋaasiiŋo kíp, atah kunuu timpi anow ti kaamuuyen.13Waah ewwa nuuŋes wa aluu híluuŋu, woonool wuu niŋ ewwa nuuŋes wa híluuŋu pakakee paka. Apan Pútuun pa púfulantoo ti hilim etempo: etipikatan waah uputaako aluu weehaŋe aluu sempe. Emma inniŋesee ma híluuŋu, Pútuun pa efipuwufan aluu pítin piti hifaku, ancuk nisiiŋiyaa kíp.14Ooto pákawiyam ti káyinan, nitey nípilaaŋ pínaati.15Inci oopa ti káakup niŋ aluu keecohatiye ka; nímiilool faŋ aluu eeha inci insoke ha, nipisincan man hiti tooñaa tom.16Elontoŋ ya eti kaasampan ka enka nuusokaa ka Pútuun pa apalaka kiteeteyo, niŋ ulaanaa teyyo, fo hinanfu tom ti hísim ha hiti Eenucee ya nuuyaakeyaa? Apan hímpuul eeha nuufiitaa ha, niŋ uliyaa ho, fo hinanfu tom ti enii ya eti Eenucee ya nuuyaakeyaa?17Páawoo hímpuul hoonool núupaacinoolaa, ekina éyisane nii unaa keemeeŋaa ka úyenooniyaa-yeno enii yoonool.18Nisincan ti pakati Israyel nipicuk: niŋ kaliyaa kaawaaseen ka kiti Pútuun pa, fo kananfut ti kaaciin etempo?19Weyme inci iyyem ti hisoku? Fo hisoku inci iyyaake nii paliyal peewaaseenee ti énaati pitaakaataak nafaa, niŋ fotom énaati etaakaataak nafaa?20Haani, pale uwaaseen wa uti kéemiit ka Pútuun pa, ti piseetaani nuuwaaseenee, pale ti Pútuun pa tom. Apan inci láfiit nipinanf kísaalumant.21Niyinaat pálaani ti elontoŋ ya eti Ateeteyo, innilaan lompo ti elontoŋ ya eti piseetaani pa; niyinaat hitaaku himpaac ti púus pa piti Ateeteyo niŋ ti púus pa piti piseetaani pa.22Fo úlafiyaalafi éwenii pasowe pa piti Ateeteyo? Fo uhaŋoo sempe?23Pakakee ti aluu nkasok: “Waah óo waah ucooneecoon.” Eehuu páni, pale waah óo waah tom unape ti aluu. “Waah óo waah ucooneecoon.” Eehuu páni, pale waah óo waah tom nuuyankanan pakan paka ti káyinan ka kiteyii.24An timpi ámiilool kiti faŋoo, pale ámiilool kiti pakakee paka.25Níyiniyini hili efoofa óo efoofa eenoomane ti énoomanuma. Nili yo niŋ kunuu keetempane, peecakanut man me eewaaseenee niŋ fotom eewaaseenutee.26Kaatuko hilim ha hiti Pútuun pa hisok: “Etaam ya, eti Ateeteyo, niŋ waah óo waah weeyem teyyo.”27Niŋ an éeyinanut ayonkalaa aluu hili te ínnilafi pikaayu, innicolaa po, nili waah óo waah ewwa naawufane aluu. Nili wo niŋ kunuu keetempane, peecakanut pa núufulii.28Pale niŋ an asokaa aluu: “Efoofa eyye eewaaseenee ti énaati,” ooto timpi nili yo, kamma eesoke ya aluu eehuu, ancuk kunuuwoo kitempanaa.29Inci sokut kunuuwi, pale kunuu oom an.
Pikee pa akee naasok: “Weyme uwune kaatempan kunuu akee kati kikitam íhinu waah weecoonee íhinu?30Niŋ inci sokaa Pútuun pa apalaka ti waah ewwa iyyem ti hili, weyme uwune kati kasok ti inci heenaput?”31Ooto niŋ aayeniyaa hili niŋ fotom pálaani, niŋ fotom waah óo waah ewwa ayyem ti íhinu, hín wo ancuk Pútuun pa pímakiyanee.32Pawenal aluu timpi puwas an kaamuuyen, man me Pusuwif niŋ fotom keeneetaat Pusuwif, focaa lompo kéeyinane ka pakati Pútuun pa.33Nicuk samat nii inci, iŋŋesŋes íhinu héesuume ha pakan paka púlooŋ ti waah óo waah ewwa ínhin. Inci ŋesut heenape ti inci, pale heenape ha ti pakakee paka, ancuk pikee pa hícump teyii kafakanee.
Pikee pa akee naasok: “Weyme uwune kaatempan kunuu akee kati kikitam íhinu waah weecoonee íhinu?30Niŋ inci sokaa Pútuun pa apalaka ti waah ewwa iyyem ti hili, weyme uwune kati kasok ti inci heenaput?”31Ooto niŋ aayeniyaa hili niŋ fotom pálaani, niŋ fotom waah óo waah ewwa ayyem ti íhinu, hín wo ancuk Pútuun pa pímakiyanee.32Pawenal aluu timpi puwas an kaamuuyen, man me Pusuwif niŋ fotom keeneetaat Pusuwif, focaa lompo kéeyinane ka pakati Pútuun pa.33Nicuk samat nii inci, iŋŋesŋes íhinu héesuume ha pakan paka púlooŋ ti waah óo waah ewwa ínhin. Inci ŋesut heenape ti inci, pale heenape ha ti pakakee paka, ancuk pikee pa hícump teyii kafakanee.
Wycliffe Bible Translators, Inc.