Mark8
1มีแฮ๋มเตื้อนึ่งตี้จาวเฮือนจะนักมาอยู่กับพะเยซู หมู่เปิ้นบะมีเข้ากิ๋น พะเยซูจึงฮ้องหมู่ลูกซิดมาอู้ว่า2“เอ็นดูคนหมู่นี้แต๊ๆเพาะว่าเปิ้นอยู่ตี้นี่กับเฮามาสามวันแล้ว และบะมีข้าวกิ๋นตวย3ถ้าเฮาส่งหมู่เปิ้นปิ๊กเฮือนไป๋ทั้งๆตี้ยังอ๊ดอยู่ หมู่เปิ้นจะต้องเป๋นลมกลางตางแต๊ๆและบางคนก็มาไกลจะนัก”4หมู่ลูกซิดอู้ว่า “ในตี้เปล่าเปลี่ยวแห้งแล้งจะอี้ จะไป๋หาเข้าตี้ไดมาเล่งคนจ๊าดนักล่ะครับ”5พะอ๋งซอยว่า “โบ๋สูมีขนมปังกี่ก้อน” หมู่เปิ้นอู้ว่า “เจ็ดก้อนครับ”6พะอ๋งจึงสั่งฮื๊อหมู่คนหลายนั่งลงกับพื้น แล้วพะอ๋งเอาขนมปังเจ็ดก้อนมา ขอบสูพะจ้าว แล้วหั๋กขนมปังส่งฮื๊อกับหมู่ลูกซิดเอาไป๋แบ่งฮื๊อกับหมู่คนหลายกิ๋นกั๋น7หมู่เปิ้นมีป๋าตั๋วน้อยๆอยู่บะกี่ตั๋ว พะอ๋งก็ขอบสูพะเจ๊าสำลับป๋าเหล่าอั่น และอู้ฮื๊อหมู่ลูกซิดเอาไป๋แจก8หมู่เปิ้นกิ๋นกั๋นจนอิ่ม และหมู่ลูกซิดเก็บเศษเข้าตี้เหลือได้ตึ๋งเจ็ดเข่งเต็มๆ9มีปะมาณสี่พันคนตี้อยู่ตี้ฮั่น หลังจากกิ๋นเสร็จ พะอ๋งส่งหมู่เปิ้นปิ๊กเฮือน10แล้วพะอ๋งกับหมู่ลูกซิดพากั๋นลงเฮอไป๋แคว้นดาลมานูธา11หมู่นักบวชจั๋นสูงได้มาโต้เถียงพะอ๋งและท้าฮื๊อพะอ๋งเยี๊ยะเรื่องอัศจรรย์ฮื๊อพ้อตี๋พิสูจน์ว่าพะอ๋งมาจากพะเจ๊าแต๊12พะเยซูถอนใจ๋ยาวและอู้ว่า “อะหยังคนสมัยนี้จ๊อบฮ้องฮื๊อเยี๊ยะสิ่งอัศจรรย์กั๋น เฮาขออู้ฮื๊อฮู๊ว่าจะบะเยี๊ยะสิ่งอัศจรรย์ไอหยังฮื๊อพ้อทั้งอั่น”13แล้วพะอ๋งก็ลงเฮอข้ามตะเลสาบไป๋แฮ๋มเพิ่ง14หมู่ลูกซิดลืมเอาขนมปังมาตวย มีขนมปังอยู่แค่ก้อนเดียวในเฮอ15พะเยซูย้ำหมู่เปิ้นว่า “ระวังเจื๊อ ของหมู่นักบวชจั๋นสูงและของเฮโรดฮื็อดี”16หมู่เปิ้นอู้กั๋นว่า “ตี้อาจ๋านอู้จะอี้ก็เพาะว่าหมู่เฮาบะมีขนมปังกิ๋น”17พะอ๋งฮู๊ว่าหมู่เปิ้นกำลังอู้เรื่องไอหยังกั๋น จึงอู้ว่า “อะหยังโบ๋สูตึ๋งอู้กั๋นแต่เรื่องบะมีขนมปัง ยังบะหันหรือเข้าใจ๋กั๋นแฮ๋มจะได๋ ใจ๋แข็งกระด้างจะนักขนาดอั่นเชียวหรือ18มีตาก็พ้อบะหัน มีหูก็บะได้ยิน จำบะได้แล้วก๋ะ19ตอนตี้เฮาเล่งคนห้าพันคนตวยขนมปังห้าก้อน โบ๋สูเก็บเศษตี้เหลือได้กี่เข่ง” หมู่เปิ้นอู้ว่า “ซิบสองเข่งครับ”20“แล้วตอนตี้เฮาเล่งคนสี่พันคนตวยขนมปังเจ็ดก้อนล่ะ โบ๋สูเก็บเศษตี้เหลือได้กี่เข่ง” หมู่เปิ้นก็อู้ว่า “เจ็ดเข่งครับ”21แล้วพะอ๋งจึงอู้ว่า “ขนาดเยี๊ยะฮื๊อพ้อจะอี้แล้วยังบะเข้าใจ๋แฮ๋มก๋ะ”22ตอนหมู่เปิ้นมาตึ๋งเมิงเบธไซดา มีคนพาคนตาบอดมาหาพะอ๋ง อ้อนวอนฮื๊อพะอ๋งแตะต้องเปิ้น23พะอ๋งก็จูงมือคนตาบอดออกมานอกหมู่เฮือน พะอ๋งถ่มน้ำลายใส่ตาทั้งสองข้างของเปิ้น และวางมือบนตั๋วแล้วซอยว่า “พ้อหันแล้วก๋ะ”24คนตาบอดเงยหน้าขึ้นมาพ้อและอู้ว่า “หันคนครับ แต่อย่างเดียวเก๊าไม๊เตียวไป๋เตียวมา”25พะอ๋งก็ลุวางมือบนตาของเปิ้นแฮ๋มเตื้อนึ่ง คนตาบอดก็ได้เพ่งพ้อ ตาของเปิ้นก็หายสนิท พ้อหันตุ๊กสิ่งกุ๊กอย่างชัดเจน26พะอ๋งอู้ฮื๊อเปิ้นปิ๊กเฮือนโดยอู้ว่า “อย่าเข้าไป๋ในหมู่เฮือนอั่น”27พะเยซูและหมู่ลูกซิดเตียวไป๋ตี้หมู่เฮือนไก้ๆ เมิงซีซารียาแคว้นฟีลิปปี ในจ้วงตางอั่นพะอ๋งซอยหมู่ลูกซิดว่า “คนอื่นๆเปิ้นว่าเฮาเป๋นไผกั๋น”28หมู่เปิ้นก็อู้ว่า “บางคนว่า เป๋นยอห์นคนเยี๊ยะพิธีจุ่มน้ำ บางคนว่า เป๋นเอลียาห์ และมีบางคนว่า เป๋นผู้อู้แตนพะเจ๊าคนนึ่ง”29แล้วพะอ๋งซอยว่า “แล้วโบ๋สูล่ะ คึดว่าเฮาเป๋นไผ” เปโตรอู้ว่า “เป๋นจ้าวแป่นดินซูงซู๊ดคนอั่น”30พะอ๋งจึงย้ำหมู่ลูกซิดบะฮื๊ออู้หมู่เปิ้นว่าพะอ๋งเป๋นไผ31แล้วพะเยซูเริ่มสอนฮื๊อหมู่เปิ้นฮู๊ว่า “ลูกมนุษย์จะต้องตุ๊กทรมานหลายอย่าง หมู่ผู้นำจาวยิว หมู่ตัวป้อนักบวช และหมู่คูสอนกฎปฏิบัติจะบะยอมฮับเปิ้น และเปิ้นจะต้องถูกฆ่า แต่เปิ้นจะฟื้นขึ้นมาแฮ๋มในวันตี้สาม”32พะอ๋งเล่าเรื่องนี้ฮื๊อหมู่เปิ้นฟังอย่างชัดเจน เปโตรจึงดึงพะอ๋งไป๋ข้างๆแล้วต่อว่าพะอ๋งตี้อู้จะอั่น33พะอ๋งก็หันไป๋พ้อหมู่ลูกซิดแล้วซวกใส่เปโตรว่า “ไป๋ฮื๊อพ้น ไอ้ซาตาน เพาะว่าสูบะได้คึดแบบพะจ้าว แต่คึดแบบมนุษย์”34พะอ๋งฮ้องจาวเฮือนกับลูกซิดเข้ามาแล้วอู้ว่า “ถ้าไผใค้จะติ๊ดต๋ามเฮา คนอั่นต้องเลิกตามใจ๋ตั๋วเก่า และหามไม๊กางเขนของตั๋วเก่าตามเฮามา35คนตี้ใค้จะเอาตั๋วรอดจะบะรอด แต่คนตี้ยอมสละตั๋วเก่าฮื๊อเฮาและข่าวดีอั่นจะรอด36มันจะได้กำไรต๋งได ถ้าได้โลกทั้งใบ แต่ตั๋วเก่าถูกทำลายไป๋37เปิ้นจะเอาไอหยังไป๋แลกฮื๊อจะได้ตั๋วเก่าปิ๊กคืนมาได้ก๋ะ38ในยุคจั๋วจะนี้ ถ้าคนไดอายตี้จะยอมฮับเฮาและคำของเฮา ลูกมนุษย์ ก็จะอับอายตี้จะยอมฮับคนอั่นตวยอย่างเดียวกั๋นในวันตี้ลูกมนุษย์เสด็จปิ๊กมาตวยสง่าราศีของอีป้อและตวยเหล่าเตวดาตี้อันศักดิ์สิทธิ์”
Empower Asia Bible Translation Movement