Mark9
1แล้วพะอ๋งอู้กับหมู่เปิ้นว่า “เฮาจะอู้ฮื๊อฮู๊ว่า มีบางคนในตี้นี้จะยังบะฮู้ตึงความต๋าย จนกว่าจะได้หันเมิงของพะเจ๊ามาป๊อมกับฤทธิ์เดช”2ห๋กวันต่อมาพะเยซูได้พาเปโตร ยากอบ และยอห์น ขึ้นไป๋บนดอยสูง แล้วพะก๋ายของพะเยซูก็เปี๋ยนไป๋ต่อหน้าหมู่เปิ้น3เสื้อเตี่ยวของพะอ๋งกลายเป๋นสีขาวแวววับ ขาวกว่าตี้คนฟอกเตี่ยวในโลกนี้จะฟอกฮื๊อขาวจั๊ดนี้4แล้วหมู่เปิ้นก็หันเอลียาห์กับโมเสส กำลังอู้อยู่กับพะเยซู5เปโตรอู้พะเยซูว่า “อาจ๋านครับ ดีจะนักลุตี้หมู่เฮาอยู่ตี้นี่ หมู่เฮาจะได้แป๋งเพิง ขึ้นมาสามหลัง ฮื๊ออาจ๋านหลังนึ่ง ฮื๊อโมเสสหลังนึ่ง และฮื๊อเอลียาห์แฮ๋มหลังนึ่ง”6(เปโตรบะฮู๊ว่าจะอู้ไอหยังดี เพาะว่าหมู่เปิ้นกำลังสะดุ้ง๋โก๊วจะนัก)7จากอั่นก็มีเมฆลอยมาปกกุมหมู่เปิ้น และมีเสียงอู้ก้องออกมาจากเมฆว่า “ตั้นผู้นี้คือลูกฮักของเฮา ฮื๊อเจื้อฟังตั้น”8หมู่เปิ้นก็หันไป๋พ้อรอบๆแต่บะหันไผลุ นอกจากพะเยซู9ขณะตี้เตียวลงมาจากดอย พะเยซูสั่งห้ามหมู่เปิ้นบะฮื๊อเล่าเรื่องตี้หันนี้ฮื๊อไผฟัง จนกว่าลูกมนุษย์จะฟื้นขึ้นจากความต๋าย10หมู่เปิ้นก็เยี๊ยะตามตี้พะเยซูสั่ง แต่ก็ซอยกั๋นเองว่าตี้พะอ๋งอู้ว่า “ฟื้นขึ้นจากความต๋าย” หมายตึ๋งไอหยัง11หมู่เปิ้นซอยพะอ๋งว่า “อะหยังหมู่คูสอนกฎปฏิบัติตึ๋งอู้ว่า เอลียาห์ต้องมาก่อน”12พะเยซูอู้ว่า “แม่นแล้ว เอลียาห์ต้องมาก่อน ฮื๊อมาเตี๋ยมกุ๊กอย่างฮื๊อเรียบร้อย แต่จะได๋ตึ๋งได้มีคำเขียนว่า ลูกมนุษย์จะต้องทนตุ๊กข์ทรมานอย่างแสนสาหัสและถูกเยี๊ยะฮื๊ออับอายขายหน้า13เฮาจะอู้ฮื๊อฮู๊ว่า เอลียาห์ก็ได้มาแล้ว และหมู่เปิ้นก็เยี๊ยะกับเอลียาห์ตามใจ๋จ๊อบของหมู่เปิ้น อย่างเดียวตี้เขียนไว้ในพะคัมภีร์”14ตอนหมู่เปิ้นลงมาตึ๋งตี้ๆหมู่ลูกซิดคนอื่นๆอยู่ ก็หันหมู่คนจะนักรุมล้อมหมู่ลูกซิดเหล่าอั่น หมู่คูสอนกฎปฏิบัติกำลังเถียงกับลูกซิดหมู่อั่นอยู่15ตอนหมู่คนหลายหันพะเยซู ก็ฮู๊สึกดีใจ๋จะนัก แล้วพากั๋นล่นมาต้อนฮับพะอ๋ง16พะเยซูซอยว่า “กำลังเถียงกั๋นเรื่องไอหยัง”17ป้อจายคนนึ่งในหมู่เปิ้นอู้ว่า “อาจ๋านครับ ผมพาลูกบ่าวมาหาตั้น เปิ้นถูกผีจั๋วสิงเยี๊ยะฮื๊ออู้บะได้18ตุ๊กเตื้อตี้มันแป๋งฤทธิ์ออกมา ละอ่อนจะจักหาย น้ำลายฟูมปาก กัดฟันตั๋วแข็งทื่อไป๋เมิ๊อด ผมขอฮื๊อหมู่ลูกซิดของตั้นขับผีจั๋วออกฮื๊อ แต่หมู่เปิ้นก็เยี๊ยะบะได้”19แล้วพะเยซูอู้ว่า “หมู่สูขาดความเจื้อ เฮาจะต้องอยู่กับโบ๋สูไป๋แฮ๋มนานเต้าได๋ เฮาจะต้องอดทนกับโบ๋สูไป๋ตึ๋งเมื่อได๋ พาละอ่อนอั่นมาอี่”20หมู่เปิ้นก็พาละอ่อนมา ตอนผีจั๋วในละอ่อนหันพะเยซู มันก็เยี๊ยะฮื๊อละอ่อนชักกระตุกอย่างแฮง จักหายกลิ้งไป๋กลิ้งมาบนพื้น น้ำลายฟูมปาก21พะเยซูก็ซอยป้อของละอ่อนว่า “เป๋นจะอี้มานานแล้วก๋ะ” ป้อละอ่อนอู้ว่า “เป๋นเมื่อน้อยลุครับ22ไอ้ผีจั๋วจะฆ่าเปิ้นหลายเตื้อแล้ว เยี๊ยะฮื๊อต๋กลงไป๋ในไฟบ้าง หรือต๋กน้ำบ้าง ถ้าอาจ๋านจ้วยได้ก็โปรดเอ็นดูจ้วยหมู่เฮาตวยเต๊อะ”23พะเยซูจึงอู้ว่า “อะหยังตึ๋งอู้ว่า ‘ถ้าอาจ๋านจ้วยได้’ ตุ๊กสิ่งกุ๊กอย่างเป๋นไป๋ได้สำลับคนตี้เจื้อ”24ป้อของละอ่อนจึงรีบฮ๊องอู้ท้นเต้าว่า “ผมเจื้อครับ จ้วยเยี๊ยะฮื๊อผมเจื้อจะนักขึ้นตวยครับ”25ตอนพะอ๋งหันว่าคนเริ่มมามุงพ้อจะนักขึ้น พะอ๋งตวาดผีจั๋วว่า “ไอ้ผีจั๋วตี้เยี๊ยะฮื๊อคนหูหนวกและเป๋นใบ้ เฮาสั่งฮื๊อสูออกมาจากละอ่อนคนอั่น และอย่าได้เข้าสิงเปิ้นแฮ๋ม”26ผีจั๋วก็กรีดฮ๊องเสียงดัง มันเยี๊ยะฮื๊อละอ่อนชักกระตุกอย่างแฮง แล้วออกจากห้างละอ่อนไป๋ ละอ่อนอั่นก็นอนนิ่ง มีเสียงจ่มกั๋นพึมพำว่า “เปิ้นต๋ายแล้ว”27แต่พะเยซูยั๊บมือของละอ่อนและพยุงเปิ้นขึ้น ละอ่อนก็ฮุกขึ้นยืน28ตอนพะเยซูเข้าไป๋ในเฮือน หมู่ลูกซิดมาซอยพะอ๋งส่วนตั๋วว่า “อาจ๋าน อะหยังหมู่เฮาตึ๋งไล่ผีจั๋วตั๋วอั่นบะได้ล่ะครับ”29พะอ๋งอู้ว่า “มีตางเดียวตี้จะไล่ผีจั๋วชนิดนี้ออกได้ คือต้องอธิษฐาน”30พะเยซูและหมู่ลูกซิดก็เตียวต่อโดยเลยแคว้นกาลิลี พะเยซูบะใค้ฮื๊อไผฮู๊ว่าพะอ๋งอยู่ตี้ได เพาะว่ากำลังสอนหมู่ลูกซิดอยู่ พะอ๋งอู้กับเปิ้นว่า31“ลูกมนุษย์จะต้องถูกยั๊บส่งไป๋อยู่ในมือของหมู่มนุษย์ และเปิ้นจะถูกฆ่า และหลังจากอั่นสามวันเปิ้นจะฟื้นขึ้นจากความต๋าย”32หมู่ลูกซิดบะเข้าใจ๋ว่าพะอ๋งกำลังอู้ตึ๋งเรื่องไอหยัง แต่บะมีไผกล้าซอย33ตอนหมู่เปิ้นมาตึ๋งเมิงคาเปอรนาอุม ขณะตี้อยู่ในเฮือน พะอ๋งซอยหมู่ลูกซิดว่า “ในจ้วงตางโบ๋สูเถียงกั๋นเรื่องไอหยัง”34ตุ๊กคนดั๊กเมิ๊อด เพาะว่าในจ้วงตางอั่นหมู่เปิ้นเถียงกั๋นเรื่องตี้ว่าไผใหญ่ตี้ซุ๊ด35พะอ๋งจึงนั่งลงฮ้องลูกซิดทั้งซิบสองคนเข้ามา แล้วอู้ว่า “ถ้าไผใค้จะเป๋นใหญ่ เปิ้นจะต้องเป๋นคนตี้ต่ำต้อยตี้ซุ๊ดและยอมฮับใจ๊ตุ๊กคน”36พะอ๋งเอาละอ่อนน้อยๆคนนึ่งมายืนอยู่ตึงหน้าหมู่เปิ้น พะอ๋งโอบละอ่อนอั่น แล้วสอนว่า37“คนตี้ต้อนฮับละอ่อนน้อยๆจะอี้เพาะว่าหันสู่เฮา ก็เท่ากับคนอั่นได้ต้อนฮับเฮาตวย และคนตี้ต้อนฮับเฮาก็บะได้ต้อนฮับแต่เฮาเต้าอั่น แต่ยังได้ต้อนฮับผู้ตี้ส่งเฮามาตวย”38ยอห์นเล่าฮื๊อพะเยซูฟังว่า “อาจ๋านครับ หมู่เฮาหันป้อจายคนนึ่งขับผีจั๋วออก โดยอ้างจื้อของอาจ๋าน หมู่เฮาก็ลุพยายามห้ามเปิ้น เพาะว่าเปิ้นบะใช่หมู่เดียวกับเฮา”39แต่พะเยซูอู้ว่า “อย่าไป๋ห้ามเปิ้นลุ เพาะว่าบะมีไผตี้อ้างจื้อเฮาเยี๊ยะสิ่งอัศจรรย์ แล้วแฮ๋มปะเดี๋ยวนึ่งก็มาใส่ฮ๊ายเฮา40คนตี้บะได้ต่อต้านเฮาก็เป๋นหมู่เฮา41ไผก็ตามตี้ฮื๊อน้ำโบ๋สูดื่มเพาะว่าโบ๋สูเป๋นคนของพะคริสต์ เฮาฮับฮองว่า เปิ้นจะได้ฮับรางวัลอย่างแน่แต๊42แต่การเยี๊ยะฮื๊อคนตี้ต่ำต้อยคนนึ่งตี้วางใจ๋ในเฮาหลงไป๋เยี๊ยะบ่ดี กับการตี๋คนอ้่นถูกถ่วงน้ำโดยหินโม่แป้ง อย่างหลังนี้ก็ยังจะม่วนกว่า43ถ้ามือข้างนึ่งของสูเยี๊ยะฮื๊อสูเยี๊ยะบ่ดี ตั๊ดมันขว้างเสีย เพาะว่ามือด้วนข้างนึ่งแล้วมีจีวิดอยู่กับพะจ้าว ก็ดีกว่ามีมือครบทั้งสองข้าง แต่ต้องต๋กนรกในไฟตี้บะมีวันมอด44ตี้เต็มไป๋ตวยตั๋วหนอนตี้บะมีวันต๋ายและไฟตี้บะมีวันมอด45ถ้าตี๋นข้างนึ่งของสูเยี๊ยะฮื๊อสูเยี๊ยะบ่ดี ก็ตั๊ดมันขว้างเสีย เพาะว่าตี๋นข้างนึ่งด้วนแล้วมีจีวิดอยู่กับพะจ้าว ก็ยังดีกว่ามีตี๋นครบทั้งสองข้างแต่ต้องถูกโยนลงไป๋ในนรก46ตี้เต็มไป๋ตวยตั๋วหนอนตี้บะมีวันต๋ายและไฟตี้บะมีวันมอด47ถ้าตาของสูเยี๊ยะฮื๊อสูเยี๊ยะบ่ดีก็ควักขว้างซะ เพาะว่าเหลือตาข้างเดียวแล้วได้เข้าไป๋อยู่ในเมิงของพะจ้าว ก็ยังดีกว่ามีตาสองข้างแล้วถูกโยนลงไป๋ในนรก48ตี้เต็มไป๋ตวยตั๋วหนอนตี้บะมีวันต๋ายและไฟตี้บะมีวันมอด49และตุ๊กคนจะต้องถูกชำระล้างตวยไฟแห่งความตุ๊กข์”50“เกื๊ออั่นดี แต่ถ้าเกื๋อเมิ๊อดรสเค็มแล้วโบ๋สูจะเยี๊ยะฮื๊อมันปิ๊กมาเค็มแฮ๋มได้จะได๋ ขอฮื๊อโบ๋สูมีเกลือ อยู่ในตั๋ว คืออยู่ตวยกั๋นอย่างสงบซุก”
Empower Asia Bible Translation Movement